جنان X جنان !!
ــــــــــــــــــــــــــــــــــــــــــــــ
أوقات بألاقى نفسى كاره للأخوان والسلفيين
ولكل لحية .. وساعات بأغضب على الثورة والثوار وألعن اليوم اللى قامت فيه الثورة
.. وساعات أحقد على الجيش وأقول إنه السبب
فى اللى أحنا فيه ..وتانى يوم أقول الجيش هو الدرع الواقى لمصر وشعبها داخليا
وخارجيا .. وساعات أسبّ الشرطة واللى حاكمينها واللى جابوها .. وبعدها بأيام أعذرهم وأتعاطف معاهم ومع شهدائهم اللى همه شباب
مصرى برضه .. أحيانا بأحب البرادعى .. وأحيانا الصباحى ..
وأحيان كتيرة بألعن جبهة الإنقاذ كلها .. ساعات أتسمّر أمام التليفزيون بالساعات
والأسابيع .. وساعات بأكره أسمع أى صوت غير صوت تنفسى.... فى بعض الأوقات ألاقى
نفسى رومانسى وعاطفى .. وبعدها بشوية ألاقينى عصبى غاضب كار ه لكل شىء وأتعامل مع
من حولى كأننى هتلر .. أوقات أبكى على أمور بسيطة .. وأوقات تانية أضحك على مصايب
كبيرة .. أحيانا أتواصل مع الفيسبك وتويتر ومدونتى بالأسابيع.. وساعات أبقى مش عايز أشوف اللاب توب
أصلا .. ده غير تقلب مزاجى المستمر بين
الأفلام العربى القديمة والجديدة .. والأفلام الأكشن والكوميدى الأجنبية والهندية ..
وساعات أعشق الموسيقى الكلاسيك .. وأحيانا بأتجنن وأسمع الهب هوب والترانس .. وساعات أكتب كل يوم مقال .. وساعات أكتر أبقى ماليش
نِفس أكتب ولا كلمة .. من الآخر مزاجى فى السنتين الآخيرتين أصبح متقلب وغير ثابت
وبيعجبه الشىء ونقيضه .. !!!!
اللى قلته ده حقائق عايشها يوميا .. ومش عارف
أنا أتجننت .. ولا حاأتجنن .. ولا ده الطبيعى فى ظل حالة الجنان الجماعى للمصريين
.!!!!!
ليست هناك تعليقات:
إرسال تعليق