بوش..بيشو..بشابيشو

بوش ..بيشو ..بشابيشو

مش عارف ليه كل ماأقرأ موضوع هام ، أو ظريف ، أو نادر ، ألاقى نفسى بأنسخة ، وأجيبه لكم علشان تقرأوه ، وتستفيدوا ، أو تستمتعوا ، زى أنا ماأستفدت أو أستمتعت ، ويارب ماأكونش بأفرض عليكم حاجة مش عايزينها ॥ ولو كان مش عاجبكم ॥ أرجوكم غيروا أتجاهكم لموضوع تانى ॥ وسيبوكم منى خالص .. ومعذرة ياأخوانى وأخواتى الأعزاء .. من يومين قرأت موضوع ظريف ، وكوميدى شوية ، وهو مقالة مش موضوع ، واللى كاتبة المقالة ، الكاتبة ( لميس جابر ) ، وهى قصصية قديمة ، وأيضا كاتبة سيناريو ممنتازة ، ومن أشهر أعمالها الأخيرة ( مسلسل الملك فاروق ) ، وتمتاز بروح سخرية عالية ، تعطى موضوعاتها نكهة محببة ، وقد أنضمت حديثا ( منذ شهر تقريبا ) لكتاب جريدة المصرى اليوم ،ولمن لايعلم هى زوجة الفنان الكبير يحيى الفخرانى ، وفى عمود ( 7 أيام ) المنشور يوم السبت 12 يناير ، وتحت عنوان ( حوار صحفى سريع مع بوش ) وبتقول فى المقالة دى :

صحفي علي السريع॥ مع «بوش»بقلم لميس جابر ١٢/١/٢٠٠٨بأحبه جداً «الرئيس بوش»॥ ذكي جداً.. لماح.. عباراته بليغة.. علمه واسع الصراحة.. راجل ميه ميه.. عشان كده قررت أخطف رجلي وأحاول أقابله وأعمل معاه حديث صحفي علي السريع، وسيكون انفرداً صحيفاً.. واجهتني مشكلة وهي أني ما أحبش أروح إسرائيل عشان شعبان عبدالرحيم مايزعلش.. هداني تفكيري أني أكيد هاأضمن أقابله في القدس لأنه رئيس مؤمن وبيصلي كل يوم الصبح في المكتب البيضاوي.. يبقي أروح القدس ولو حد من إياهم سألني هاستعبط وأهتف بأعلي صوت «القدس عربية» ولو فيه حد جدع يكذبني।توكلت علي الله وأخذت ميني باص العباسية - بيت لحم، ونزلت في محطة كنيسة المهد، لقيته يا دوب طالع بعد الصلاة، وصراحة وشه كان منور من كتر الإيمان، لبدت له ورا السور وطلعت فجأة، وقبل ما يتخض قلت

أنا: مش فاكرني يا بيشو؟بوش: أنا فاكر بيشو لكن انتي مين؟ آه افتكرت انتي عملت معايا حديث في واشنطن قبل كده॥ أظن كنتي مراسلة لجريدة «مناخير»أنا: جريدة «عين» يا أفندم ما شاء الله عليك وعلي دماغك.. أنا دلوقتي مراسلة جريدة «المصري اليوم»।بوش: عارفها.. يبقي إنتي من الصومال।أنا: لأ، يعني قصدي هو حضرتك تدي ضهرك للصومال وتطلع علي طول تاني ناحية يمين أو شمال.. اسمها مصر.. والجورنال «المصري» سهلة।بوش: مصر، مضبوط دي جنب قبرص علي طول।أنا: هامشيها قبرص يا عسل مش فارقة ممكن كلمتين علي السريع.بوش: بس بسرعة عشان عندي قعدة مهمة مع أبومازن.. عاوز أقرص ودانه وأوصيه علي أولمرت «سديكي» لأنه بيضايقه كتير وأولمرت اشتكي لي وانتي عارفه اللي يقرب لأولمرت أقوم له حرب عالمية تالتة.. أنا صعب قوي.أنا: حلو السؤال ده.. مين يا أفندم من دول العالم تتوقع أنه يتحالف مع أمريكا في حرب عالمية ثالثة عشان خاطر عيون أولمرت؟بوش: اللي هايدفع اشتراك يدخل معانا علي طول، وعموماً أمريكا هاتشن حرب عالمية شاملة لوحدها.. والباقيين يسقفوا ويتفرجوا.أنا: تمام يا أفندم.. العالم كله بيسقف ويدفع ويتفرج، تجنن يا سيادة الرئيس.. إيه إحساسك وانت في إسرائيل؟بوش: إحساس غريب قبل النهارده ماجربتوش.. أصل إسرائيل وطن الشعب اليهودي الغالي.أنا: مش شايف حضرتك إن حكاية وطن يهودي دي بترجع الحضارة للخلف آلاف السنين، لأن معني كده إن المسيحيين يعملوا وطن لوحدهم والمسلمين يعملوا وطن لوحدهم، والتلاتة ياكلوا في بعض وتنتهي من العالم الأعراق والأجناس والثقافة والحضارة والأوطان والانتماء، ويتحول العالم لتكتلات دينية متطرفة أكتر من كده.بوش: لأ طبعاً.. ده مش ممكن يحصل.. مين اللي قال إنه من حق المسيحيين ولا المسلمين يعملوا وطن لوحدهم؟ اليهود بس اللي ليهم وطن لوحدهم، لكن الباقيين مش لوحدهم إحنا معاهم في كل وطن وبلد خطوة بخطوة.أنا: أهلاً وسهلاً بكم في كل مكان.. متي تخرج أمريكا من العراق؟بوش: عندما تتحول الديمقراطية العراقية الحية إلي نموذج لباقي شعوب المنطقة.أنا: متي تتحول إلي نموذج مشرف أكتر من كده؟بوش: لما تستوي.. لسه فاضل لها غلوة.أنا: غلوة إيه يا أفندم، دي ديمقراطية العراق لسعت وشاطت وطلعت دخان وكمان إحنا عندنا نماذج كتير.. كل كتب المدارس نماذج.بوش: لأ.. لأ.. معلهش.. النموذج ده إجباري مش اختياري.أنا: «يا دي النيلة».. ماشي يا عسل.. ما هي الخطوة القادمة بعد «أنا مليش» سوري.. «أنا ما أفتيش» سوري قصدي «أنا بوليس» يا أفندم.بوش: أنا بوليس شغالة تمام.. ولو مانفعتش أنا هأدعو لإنهاء الاحتلال من الأراضي الفلسطينية عشان كده لازم كل الشعوب «التايلاندية».أنا: العربية يا أفندم.بوش: سوري العربية تتوجه «للخيار الصعب».أنا: والبلدي ماله يا أفندم ده جنابك لو كنت بدرت شهرين كنت أكلت عندنا خيار بلدي إيه.. يستاهل بقك.. هو صحيح خلص لكن فيه خيار صعب مالي الدنيا.. ليه «الخيار الصعب» بالتحديد؟بوش: ده نوع مختلف ولابد من استعمال الخيار الصعب لأن إيران مضايقاني وعاوز ألحق أقلبها ديمقراطية بسرعة قبل ما أمشي من البيت الأبيض.أنا: وإيه دخل الخيار، يا أفندم في موضوع إيران؟بوش: الخيار هايكون من نصيب أي دولة ترفض تأييد الديمقراطية في إيران وأنا بأحذر الخيار هايكون صعب جداً.أنا: تفتكر يا أفندم الرئيس الأمريكي القادم هايستعمل الخيار الصعب مع دول المنطقة برضه يا أفندم؟بوش: طبعاً الخيار يشكل عاملاً أساسياً في الاقتصاد الأمريكي وإحنا الوكيل الوحيد للخيار في العالم الديمقراطي النموذجي الحر المنتعش ومهمتنا إننا نملأ المنطقة خيار.أنا: لكن يا أفندم الخيار مالي الدنيا وباتنين جنيه بس.بوش: بس مش خيار صعب.. إحنا خيارنا حاجة تانية.. باي.. باي.أنا: جااااي.

*************