هل تسمعني يا أفندم

هل تسمعنى ياأفندم ... حوّل !!

.........

النهاردة فيه خبر بيقول : أن إسرائيل أعلنت عن البدء فى علاقات دولية ودبلوماسية كاملة مع جنوب السودان .. وأنا عارف أن فيه ناس حاتقوللى ياعم أصحى ، وأفتكر المثل اللى بيقول ( اللى بيته من قزاز .. مايحدفش الناس بالطوب ) !!..

وطبعا عندهم حق لأن مصر عملت نفس العملة السودة !! وبعلاقات كاملة مع إسرائيل ، من أكتر من 30 سنة .. وهو ده البيت القزاز .. لكن لا الشعب المصرى بناه .. ولا كان موافق عليه .. ولغاية النهاردة غالبية المصريين مش موافقين على كده .. بدليل عدم التطبيع طول السنين اللى فاتت ..

لكن أنا عايز ألفت النظر لحاجة مهمة جدا .. وهى أن إسرائيل بإقامتها علاقات كاملة مع جنوب السودان ، معناها إنها خلاص حطت رجليها التانية فى أفريقيا بعد ماحطت رجلها الأولى فى أثيوبيا وأوغندا ودول أفريقية تانية ..

بس كان الأهم هو السودان لأنها كده بتكون فى قلب العالم العربى والأفريقى فى نفس الوقت .

طبعا تواجد إسرائيل فى جنوب السودان فى هذا الوقت هو ذكاء شديد منهم ــ كما تعودوا وتعودنا منهم ــ فجنوب السودان دولة جديدة عطشانة لكل حاجة .. كهرباء ، مدارس ، مستشفيات ، تكنولوجيا ، نظام سياسى ، منظمات أهلية ، يعنى بالبلدى كده تنمية شاملة فى كل المجالات .. وفى نفس الوقت جنوب السودان هى

دولة غنية بكنوزها الطبيعية .. من البترول ، والغابات ، والأراضى الزراعية الفاضية رغم وجود كثير جدا من المياه ( أمطار موسمية هايلة + نهر النيل العظيم طبعا ) .

فرصة وجت على طبق من دهب لإسرائيل .. فتقوم بأعمال التنمية الشاملة بشركاتها ورجالها .. وتكسب مليارات الدولارات .. وكمان تكسب تعاطف السودانيين فى الجنوب لأنها بتساعدهم فى بناء دولتهم .. وبعد كده يبقى سهل عليها تستقطب أو تجند أو تكسب متعاطفين مع قضاياها ويؤيدوها ويساعدوها على تحقيقها ..

وفى نفس الوقت هنلاقيها خلال سنوات بسيطة بتسيطر على منابع النيل .. و بتجبرنا على توصيل النيل لإسرائيل من داخل الأراضى المصرية ( خطة معروفة من 20 سنة وأكتر ) ..

و بعد الهيمنة الإقتصادية على جنوب السودان , هتساعد وتوجه وتلهم ويمكن تأمر حكام السودان لنظم حكم وسياسات محددة تخدم أهدافها ومصالحها ..

وبكده تبقى تحكمت فى السودان إقتصاديا وسياسيا !!

إذاً مافيش شك أن وجود إسرائيل دلوقتي مكسب كبير قوى .. قوى لها .. سياسيا وإقتصاديا ..وكمان عسكريا ..

وأنا فى مقالات كثيرة جدا قلت إن إسرائيل دايماً تخطط لمائة سنة قدام .. ولو رجعتم للتاريخ وأحداثه هتتأكدوا من ده . لكن أحنا أجدع ناس نبص تحت رجلينا ..

ودلوقتي أقدر أقول لكم بالفم المليان إن الكلام اللى كان بيتقال عن تدخل إسرائيل فى إنفصال السودان بطرق مباشرة و غير مباشرة صحيح مائة بالمائة ..

كل ده والعرب فى الضياع والتوهان .. والكل ملخوم إما فى مكافحة الثورة والحرية فى بلده .. أو أخذ الإحتياطيات وتعميم الشعب بتاعه علشان مايثورش عليه ، أو متدّارى وكأنه فى الركن البعيد الهادى !! وبيقول ياحيطه دارينى !!

وأخيرا عايز أقولكم حاجة مهمة جدا جدا كثير مِنا نسيوها .. لكن أسرائيل مانستهاش أبدا .. ولسه شعارها وهدفها لغاية دلوقتي !

وهو أن تكون دولة إسرائيل ( من النيــل للفــــرات ) .. والهدف ده متحدد

من أول يوم لقيام دولة إسرائيل .. والتنفيذ جارى بنجاح ..

والخطة فى طريقها المرسوم بدقة وذكاء ياأفندم . هل تسمعنى ياأفندم ...حوّل !!!

صــلاح إدريـــس

مدون ( بالبلدى الفصيح )