خَللى بَالكْ عَلى قَفَــاكْ !!
=.=.=.=
طوارىء .. طوارىء .. إيه هو قانون الطوارىء ؟ .. أتحداك أن تعرف الفرق بين قانون الطوارىء ، والقانون الجنائى العادى ؟ .. احنا ياجماعة الخير بقالنا أكتر من 30 سنة تحت قانون الطوارىء .. يعنى كل الشباب أتولدوا ، وأتعلموا ، واتجوزوا ، وخلّفوا ، وهم وولادهم مايعرفوش غير قانون الطوارىء !!ّ.. مش بس كده ده احنا لو راجعنا موقف اللى بينفذوا القوانين نفسهم .. حانلاقى كل الضباط من رتبة ملازم ثانى لغاية رائد مايعرفوش غير قانون الطوارىء .. !! والرتب اللى بعد كده من مقدم إلى لواء نسيّت إن فيه أصلاً قانون تانى غير قانون الطوارىء !! 
أوعوا تفتكروا إن بمجرد إلغاء قانون الطوارىء (( اللى حايتلغى .. حايتلغى رسميا وقريبا بمشيئة الله )) ..يبقى خلاص حانبقى أحرار !! ، ونخضع للقانون الجنائى ، يمكن يكون ده صحيح من الناحية النظرية !! لكن تنفيذه بسهولة ويسر حاياخد وقت طويل !! ليه ؟ لأن القائمين على تنفيذ القانون مايعرفوش غير قانون الطوارىء .. ومحتاجين وقت من التدريب ، والتثقيف ، والتجربة ، والممارسة ، والخطأ .. لغاية مايقدروا يفرقوا بين القانون العادى وقانون الطوارىء !! لأنهم ببساطة شديدة شربوه شرب .. وهو اللى بيمارسوا بيه أعمال القانون من يوم ماعلقوا الدبابير لغاية النهاردة .
بينى وبينكم الحكاية برضه عايزه شوية تعاون وتفاهم مابين الشرطة والمواطنين .. فعلى الداخلية أن تكثف كل الجهد لتوعية وتدريب وتثقيف ضباطها وجنودها ، وعلى هؤلاء المنفذين للقانون نفسهم التصرف بحكمة ، ومراجعة كل الأمور ، قبل أى إجراء ضد المواطن .. وبرضه المواطن لازم يقدّر ، ويعرف أنه لازم يفهم ..ويعرف إن الضابط ده لو أخطأ فى تنفيذ القانون معاه ، أنه مش قاصد يظلمه ، أو يقهره ، أو يتمنظر عليه !! كل الحكاية أنه لسه مش مستوعب !!
وزى مابنطالب الداخلية بتدريب وتثقيف أفرادها .. لازم نطلب برضه من الدولة ومنظمات المجتمع المدنى تثقيف المواطنين وتعريفهم بحقوقهم وواجباتهم ..
علشان كده أنا حَأبدأ بنفسى ، وأقولكم النهارده أهم البنود اللى فى قانون الطوارىء .. واللى تهمك أنت كمواطن .. والتفاصيل المملة بقى اللى بتصاغ بيها القوانين ، فدى حَأسيبها للقانونيين ..
وقبل ماأقولكم أهم النقاط فى قانون الطوارىء .. لازم أقولكم إن عكس هذه النقاط يبقى هو القانون العادى اللى قريبا جداً حانكون تحت ظله بإذن الله .. بس ربنا يجعل كلامنا خفيف عليهم .. عليهم مين ؟ مش عارف آهو يكون خيف على أى حد وخلاص !!
*****
أَهم نِقَاط قَانُون الطَوارٍئ
===
(( 1 ـ وضع قيود على حرية الأشخاص ، في الاجتماع ، والانتقال والإقامة ، والمرور في أماكن ، أو أوقات معينة ، والقبض على المشتبه بهم ، 
أو الخطرين على الأمن ، والنظام العام ، واعتقالهم ، والترخيص في تفتيش الأشخاص ، والأماكن دون التقيد بأحكام قانون الإجراءات الجنائية ، وكذلك تكليف أي شخص بتأدية أي عمل من الأعمال .
2 ـ الأمر بمراقبة الرسائل ، أيا كان نوعها ، ومراقبة الصحف ، والنشرات ، والمطبوعات ، والمحررات ، والرسوم ، وكافة وسائل التعبير، والدعاية والإعلان ، قبل نشرها ، وضبطها ، ومصادرتها ، وإغلاق أماكن طباعتها
3 ـ تحديد مواعيد فتح المحال العامة وإغلاقها ، وكذلك الأمر بإغلاق هذه المحال كلها أو بعضها .
4 ـ الاستيلاء على أي منقول ، أو عقار ، والأمر بفرض الحراسة ، على الشركات ، والمؤسسات ، وكذلك تأجيل أداء الديون ، والالتزامات المستحقة ، والتي تستحق على ما يستولى عليه ، أو على ما تفرض عليه الحراسة .
5 ـ سحب التراخيص بالأسلحة ، أو الذخائر ، أو المواد القابلة للانفجار ، أو المفرقعات ، على اختلاف أنواعها ، والأمر بتسليمها ، وضبطها ، وإغلاق مخازن الأسلحة
6 ـ إخلاء بعض المناطق ، أو عزلها ، وتنظيم وسائل النقل ، وحصر المواصلات ، وتحديدها بين المناطق المختلفة ، ويجوز بقرار من رئيس الجمهورية توسيع دائرة الحقوق المبينة في المادة السابقة ، على أن يعرض هذا القرار على مجلس الشعب في أول اجتماع له . ))
*****
أنا رايى بقى إنك تحفظ النقاط دى جيداً .. لأنك أكيد حَتحتاجها فى حياتك اللى جاية .. ياإما علشان تبقى عارف اللى لك واللى عليك .. أو لتعر يف اللى قدامك باللى له واللى عليه .. أو لتنبيه ضابط الشرطة أو الأمين أو المخبر أنه لو ضربك على قفاك تانى يبقى تجاوز القانون .. وخللى بالك طول ماالشخص اللى قدامك حاسس أنك فاهم حقوقك وعندك فكرة ولو بسيطة عن تطبيق القانون .. يبقى حايفكر ألف مرة قبل مايضربك على قفاك !!
صــلاح إدريـــس
مدون بالبلدى الفصيح
عايز اقولك بجد اسلوبك كتير حلو
ردحذف