أنا لَسَعّتْ يارِجّالــَـة !!!
ــــــــــــــــــــــــ
ـــــــــــــــــــــــ
______________
______________
بعض أصحابى ساعات يقولولى : أنت سنة 2002 مثلا كتبت مقالة فى جريدة كذا بتقول كذا ..كذا .. وبعدها بسنتين كتبت مقالة فى جريدة كذا عكس مقالتك الأولى!! .. إيه الحكاية ياعم هو أنت مش بتخاف يقولوا عليك متردد ، أو متقلب ،أو مش فاهم !! ..
وردى دايما : لأ مابأخافش لأنى بأكتب من قلبى وحسب قناعاتى قدام الموقف الحاصل .. وطالما شفت الصح يبقى مافيش داعى أبدا إنى أعاند ، وأتفلسف ، وأقول كلام مجعلص علشان أبرر موقفى الغلط ..
اليومين دول بقى خلاص أنا لسعت يارجالة وشكلى أتجننت .. 
بكتب المقال وعكسه فى اليوم التانى .. ويمكن نفس اليوم ॥ وأحيانا خلال ساعات .. وكتاباتى بقت زى قرارات حكومتنا حسب رد الفعل .. مش بالدراسة ولا التفكير .. وساعات تلاقينى بأحب الشعر و سماع أغانى سيد درويش
، والشيخ إمام ، ومحمد عبد الوهاب .. وفجأة تلاقينى عايز أتفرج على هيفاء ونانسى وروبى ( من غير ماأسمعهم طبعا !! ) ..وساعات تلاقينى عايز أسمع بيتهوفن وباخت وعمر خيرت ..وفجأة تلاقينى قلبت على سعد الصغير وبعرور .. علشان كده قررت أنشر كل اللى بأكتبه حتى لو كان كلمتين وبس فى مدونتى الخاصة ( بالبلدى الفصيح ) .. عشان أدرس وأتفحص بعد كده براحتى السبب اللى خلانى أكتب وأقول كلام وعكسه فى فترة صغيرة .. أكيد فى الجو المهبب الزفت اللى أحنا فيه اليومين دول أنتم كمان بقيتم كده !! .. تقولوا كلام ، وتانى يوم تغيروه بكلام عكسه ..
وأوعوا تتخضوا وتخافوا 
من الحكاية دى لأن ده وباء وماشى فى البلد من أكبر راس لأصغر راس ..
يقولولك حرية ويقفلوا القنوات !!
يقولولك محاكمات علنية وبعدها مايسمحوش لا بالإذاعة ، ولا حتى دخول المحكمة ،إلا للمتهمين وصحابهم بس والجمبرى والسيمون فيميه اللى طلبه المتهمين من خدامينهم اللى بره !!
يقولولك حد أدنى للأجور 1400 جنيه ويرسى على 300 جنيه ( ده لو لقيتهم أصلا !! ) ..
يقولولك حانعدى من عنق الزجاجة .. وتلاقى نفسك مزنوق زنقة المطاهر ليلة خروجه على المعاش تحت فلة القزازة عدل !! يقولولك القضاء على الفساد وتبص تلاقى الفساد كتر وكبر واللى كان شريف فسد وبقى مرتشى !!..
يقولولك إنتخابات حرة ونزيهة وتلاقى الترتيبات والإستعدادات
معمولة علشان حبايبنا اللى وحشونا بتوع الوطنى !!..
يقولولك النوبيين والسيناوية حاياخدوا حقوقهم تالت ومتلت .. ومايتحركش حد أبدا إلا بعد إعتصامات وولعة وصراخ وصويت !! .. وبرضه يطلعوا يقولوا خلاص أحنا حاندرس الموضوع من كل جوانبه .
وخلاصة الكلام إنك ماتقلقش لو لقيت نفسك بتقول حاجة وترجع فيها .. فكلنا هذا الرجل .. ومش عارف إيه السبب ؟ يمكن سخونة الجو اللى زادت بعد رمضان !!
أو يمكن قلة أكل الفراخ واللحوم بعد ماالناس كلها فلست و بتسأل الله فى الإذاعة !
ولا يمكن بسبب التناحة والترنخة وقلة الشغل وسهر الليالى ونوم النهارى !!
أو يمكن بسبب ريحة الزبالة المتكومة أكوام .. أكوام .. أكوام .. فى كل شوارع مصر ..
عموما ياشباب مش مهم السبب إيه !! لكن أوعدكم بحاجة واحدة بس أنا متأكد منها .. وياريت توعدوا نفسكم نفس الوعد .. إننا لما نكتب أو نتكلم .. نكتب ونتكلم من قلوبنا .. لأن اللى بيطلع من القلوب أكيد .. أكيد حايدخل على طول للقلوب ..
مش مهم بقى بنقول إيه ؟
المهم إننا بنقوله من قلوبنا..
صــلاح إدريـــس
مدون بالبلدى الفصيح
ليست هناك تعليقات:
إرسال تعليق