قال ياآبا علّمنى الهيافة .. قاله تعالى فى الفارغة وأتصدّر ّ!!
ـــــــــــــــــــــــــــــــــــ
نبيل العربى مرشحا لرئاسة الجهورية .. ناس كتير قوى رحبت بذلك ، لأن الرجل تاريخه معروف ومشّرف .. وكمان الشهرين اللى مسك فيهم وزارة الخارجية ساب بصمة واضحة ، وتقدم ملحوظ .
لكن كعادة حكامنا المصريين والعرب .. لو شافوا واحد نجح ، وبدأ نجمه يظهر ، يقوموا يتجمعوا كلهم سواء بالأتفاق ، أو بالسليقة ، على هدمه ودفنه ، وفعلا تم دفن العربى فى المقبرة الكبرى ، اللى أسمها مدافن الجامعة العربية .. ولأن الجامعة العربية عاملة زى بيت جحا !! ومافيش حد يقدر يحيِرّ ، ويديِرّ فيها .. فقد أحتاس الراجل فى دهاليزها .. ولّزقوا له فشل مفاوضات سوريا وبشار.
وناويين يلزقوا له الفشل والبلاوى اللى حاتحصل فى مؤتمر القمة العربية ، فى شهر مارس القادم ، واللى حايكون فى بغداد .. برغم الحالة الأمنية اللى زى الزفت ..!!
وقالولك أيه : أن جدول الأعمال والبيان الختامى بتوع قمة بغداد جاهزين .. والملوك والرؤساء العر ب حايقعدوا ساعتين ، تلاتة بس ويرجعوا لبلادهم على طول .. طيب لازمته أيه أصلا ياأغبياء .. مابناقص مؤتمر ، هو عبارة عن نسخة مكررة ، وبايخة ، وسخيفة ، وماسخة بصراحة ، لمؤتمرات القمة السابقة .. لكن تقول أيه !!!!!! ( قال ياآبا علمنى الهيافة .. قاله تعالى فى الفارغة وأتصدّر ) .
خلينا فى نبيل العربى .. بعد مادفنوه وخلّصوا عليه .. دلوقت بعض الشباب طرحوا أسمه رئيسا للجمهورية .. وخلال يومين تلاتة ظهرت شعبية الراجل من ملايين المؤيدين .. برغم أنه أعلن وأنا سمعته بودنى وشفته بعينى ، وهو بيقول أنه خلاص مش عايز أى مناصب سياسية ، وعايز يرتاح بقى .. بس الظاهر أنه رجع فى كلامه .. وأتلّم عليه المجلس العسكرى ، والأخوان ، وبعض القوى السياسية التانية ، وكلهم بيلعبوا على مصالحهم والحصان الكسبان!!
وقالوا أنه فيه توافق على نبيل العربى .. وأنه رئيس توافقى ( وتوافقى دى من التعبيرات الجديدة اللى حاتسمعوها كتير فى الأيام اللى جاية ) .. وكانت النتيجة أن ملايين الناس اللى كانت مرحبة ، ومشجّعة ، رجعت فى كلامها .. وقالتلك يعنى هو الجيش والأخوان حايفرضوا علينا اللى همه عايزينه !! طيب خلاص أحنا بقى مش عايزينه !!
وأنقسمت الناس بين عايزينه .. ومش عايزينه .. وحانفضل نحكى فى الكلام ده كتير جدا وحاتشوفوا ..!!
والسؤال المهم جدا واللى لازم نسأله لنفسنا دلوقت : هل ترشيح نبيل العربى من المجلس العسكرى والأخوان مقصود به أن الناس تعترض عليه وترفضه لأنه من طرف الجنرالات والأخوان ؟
ولا همه فعلا عايزينه علشان يخلّصوا المرحلة دى وننتقل للى بعدها ، ويظهروا أمام الرئيس القادم بأنهم هم اللى جابوه وهم أسياده وتاج راسه ..!! ولازم يدين لهم بالولاء .. ويخللى باله منهم لما يتريّس على البلد ؟
ولا غرضهم يضربوا بيه مرشحين تانيين للرئاسة همه مش عايزينهم ؟
أنا عن نفسى لسه مش عارف !! وبينى وبينكم محتار لأن الصورة لسه مشوشة ومش واضحة قوى !! لكن أكيد حانعرف ونشوف كلنا الصورة قريبا !!و أيه هى اللعبة بالضبط ، وخيوطها ، ومسالكها ، ودروبها !! وعايزكم أنتم كمان تشاركونى وتقولولى رأيكم !!! مش تشيروا بالأعجاب وخلاص .. أحنا عايزين مناقشة حقيقية ياجماعة .. والفيسبك معمول لكده .. مش نشرة أخبار وخلاص ..
مش كده و لا ايه ؟
صــلاح إدريــس
مدون بالبلــدى الفصيــح
ليست هناك تعليقات:
إرسال تعليق