الشَبَاب السِييس !!
ــــــــــــــــــــــ
ـــــــــــــــــــــــ
كتير من العواجيز اللى زيّى ، ظلموا شبابنا الجميل ، وقالوا عليهم شباب سييس ، وخنافس ، وفافى ، وبتوع مامى ، وماينفعوش ببصلة ...!!
ولكن الشباب دول فاجئوا الجميع بثورة يناير ॥ وكسروا حاجز الخوف اللى عشنا وعيشّناهم معانا وراه !! .. وضحّوا بأنفسهم علشان العيش ، والحرية ، والكرامة ، والعدالة الإجتماعية .. وماكانوش عايزين أى حاجة تانية غير دول .. وقدروا يكسبوا تقدير وإحترام الكلّ .. خصوصا اللى كانوا بيتقّولوا عليهم بكلمات فارغة .. لأن الشباب دول أثبتوا أنهم أحسن ، وأشجع ، وأبعد نظراً، من كل الأجيال اللي سَبَقتهم ..
والنهادة بيتكرر المشهد مع شباب ألتراس الأندية الرياضية .. بمسيراتهم .. ومطالبهم العادلة نحو حقوق إخوانهم اللى أُستشهدوا فى مذبحة بورسعيد .. وإستكمال الثورة .
ولما تَفَحصنا فى وشوشّهم ، وعقولهم ، لقيناهم مايقلّوش أبدا ، أبدا ، عن شباب الثورة .. وأكتشفنا أنهم شاركوا فى الثورة ، وكانوا ضمن دروعها ، وقوتها .. شباب محترم ، مثقف ، واعى ، فاهم .. مش شباب صايع ، ومجرم ، وشوارعية ، زى ماكان بيتقال عليهم .. لكننا لقيناهم زى ماقال عليهم الموسيقار عمار الشريعى (( شباب طاهر .. نظيف ومتوضي )) ..
بأقول لكل اللى فوق الـ 40 سنة .. أترّكنوا أنتم بقى على جنب !! .. وسيبوا الشباب دول يأمّنوا خواتيم حياتكم .. ويأسسوا لحاضرهم .. علشان يبنوا مستقبلهم ، ومستقبل ولادهم .. بالطريقة اللى همه شايفينها صح .. وبلاش نَتَفزلَق ، ونَتَفلسَف ، ونقول ناقصهم الخبرة والمعرفة .. وفى الحقيقة همه مش ناقصهم أى حاجة .. أحنا اللى ناقصنا نظرة أشمل للمستقبل .. ولغة عصرية جديدة مابنعرفش نتكلمها ولا بنفهم فيها .. لكن شبابنا بيفهموها كويس قوى .. وبيتكلموها لبلب ... وكفاية أن
( شباب السييس .. أسقط نظاماً .. ورئيساً )
**********
صــلاح إدريــس
Salahedris@gmail.com
* تم نشرها بصفحتى الأسبوعية ( بالبلدى الفصيح )
بجريدة (عين الحقيقة ) عدد السبت 18 فبراير 2012
* ونشرت بالأهرام عدد 16 فبراير 2012
على الرابط التالى
http://gate.ahram.org.eg/User/Topics/7889/%D8%B4%D8%A8%D8%A7%D8%A8-%D8%B3%D9%8A%D9%8A%D8%B3.aspx
ليست هناك تعليقات:
إرسال تعليق