بالبلدى الفصيح ( 14 )
حرب 25 يناير 2013 .
ــــــــــــــــــــــــــــــــــــــــــــ
ــــ
( وَحـّدُووووووووووه )
لافتة جديدة على أبواب مطار القاهرة الدولى
.. بعد إحالة لافتة ( أدخلوا مصر بإذن الله آمنين ) .. إلى المعاش !!
ـــ
عَريضة الإتهامات لِمُبارك .. تنطبق بالميللي على طنطاوى .. ومرسى .. ياترى
حايتحاكموا معاه .. ولا لسه شوية ؟
ـــ
شكوى (العَبيد ) من مُجندى الأمن المركزى
فى قطار البدرشين من سوء مُعاملتهم
، وشتمهُم ، وضربهُم ، وعدم السماح لهم بالتدخين .. أو شرب الشاى .. أو دخول الحمام
.. وعملهم الأساسى خدَّامِين فى بيُوت
الضباط ( حتى بعد خروجهم للمعاش ) .. يجعلنى أطمئن أن ( ثورة العبيد ) قادمة ..
ويمكن ينضمُّوا (لِثورَة الجياع ) وهى
الأقرب !!
ـــ
خبرة الإخوان السياسية كسبوها من عملهم السِرّي تحت الأرض .. ولما طَلّوا
براسهُم فوق الأرض كسبوا خبرتهم من النظام السابق !! وماأكتفوش بكده لكنهم أبقوا وغَمْضُوا
عن الصف الثانى والثالث من النظام السابق ليستفيدوا من خبراتهم ..وليعملوا فى خدمتهم !! وهو ده سبب فشلهم .. وهو ده اللى حايخلصنا منهم بإذن
الله .
ـــ
قال الصحفى الكبير الشجاع إبراهيم عيسى :ـ
" ثلاث جهات فقط هى اللى كسبت من الثورة ( الإخوان
..و دُعاة الفضائيات .. ومُذيعى
الفضائيات )" .. وهذا صحيح!!
ـــ
رَغم رَفض الأزهر القاطِع لِمَشروع الصُكوك الإسلامية .. إلا أن المَشروع ماشى ..
ومش عارف ليه حاسس إن موضوع الصُكوك ده هو
سَك على قفانا !!
ـــ
كل مابأشوف وأسمع المُطربين الجُدد
.. يزداد شوقى وحنينى لأم كلثوم وحليم وفيروز .. وكل ماأشوف وأسمع مُرسى .. أشتاق
وبشدة لِجَمال عبد الناصر والسادات .
ـــ
شامِم ريحة وحشة داخل جبهة الإنقاذ الوطنى .. وبدء الخلافات والإنشقاقات بسبب ترشيحات مجلس
النواب القادم .. وأنا قلت الكلام ده من أسبوعين ........ ( شكلكُم حاتودونا فى
داهية يانُص ) .
ـــ
أؤيد جداً ويمكن أشارك فى مُظاهرات 25 يناير القادمة .. ولكنى لا أؤيد أبداً
أبداً دَعوات الحَشد والتسلح والتهديد التى
أطلقها الكثيرين فى مصر كلها ، وكأننا داخلين على حرب فعلا ً.. كفاية دَم ياشباب ..
أنتم ثروة هذا البلد .. وحرام نضيّعها هَدَر .. وحرام تسيل قطرة دَم واحدة .. من أى
مصرى مهما كانت إنتماءاته .. مُظاهراتنا أو حتى ثورتنا لازم تكون سلمية .. سلمية ..سلمية .
ـــ أنا أرسلت المقال ده للجريدة يوم الخميس
علشان يلحق يتنشر السبت .. بس مش عارف ليه خايف من هنا للسبت يتقلب 3 أو 4 قطارات ..
أو تقع شوية عمارات ..علشان كده بأدعى
وبأقول يارب .. وغلاوة حبيبك
النبى ( صلى الله عليه وسلم ) أن تُجنبنا
أى حوادث قطارات.. أو مراكب.. أو أتوبيسات .. أو عِقارات ..
وأن تحفظ مصر وأهلها .. ولأنك الرحمن الرحيم الخالق
القادر أدعوك بأن تترفق بنا ، وتتلطف فى قضائك .. فقد أخذنا نصيبنا من الكوارث والمَصايب فى أول
15 يوم من السنة الجديدة .. مايكفينا لشهر
أغسطس 2013
(( اللهم لانسألك رد القضاء .. ولكن نسألك اللُطف
فيه ))
بقلــــــــم
صــلاح إدريــــــس
ـــ
تم نشر المقال بجريدة ( المصرى
المهاجر ) الصادرة بلوس أنجلوس ـ كاليفورنسا ـ الولايات المتحدة الأمريكية ـــ
عدد السبت 19 يناير 2013
*****
almohager.com/Salah_Edris011913.php
للتواصل : ــ
مدون
بالبلــدى الفصيـــــح
تشريفكم
لمدونتى يسعدنى .. ويمتعّكم ، وقد يفيدكم
http://plackprince.blogspot.com/
ليست هناك تعليقات:
إرسال تعليق