حَركة كَتالة النوبيَّة المُسلَّحَة .
ـــــــــــــــــــــــــــــــــــــــــــــــــــــ
((
" حركة كَتالة " هى حركة مُسلحة لِمُناهضِة العُنصرية في
جُمهورية مِصر العَربية والرافضة لِتجاهُل نِظام الإخوان الناتج عن المُمارسات
الخاطِئة من قِيادات الجماعة العُنصرية)) ..
ده الكلام اللى
كاتباه حَركة ( كَتالة ) فى
صفحتها على الفيسبُك .. وكتال باللغة النوبيَّة تعنى الحَرب أو القِتال وتـُنطق بالنوبى
( كَتاليوس ) والمَعنى المقصود من إختيار الإسم هو إعلان الحَرب ، أو
دَق طبُول الحَرب ..
لكن قبل مانتكلم عن كَتالة لازم
أقول إنه فى مُعْظم مَقالاتى عن النوبة ، كنت بأحذر وأقول ((
إتَّقى شَر الحليم إذا غضب )) .. ولأن الحليم هنا هُم النوبيين ، اللى صبروا ولا صَبر أيوب .. ( الحديث عن صَبر أيوب
كان من 10 إلى 20 سنة على الأكثر ) .. النوبيون بَقى صَبروا أكتر من 60 سنة .. بعد
تهجيرهُم من بُيوتهم ، وأراضيهم ، وعِظام
أجدادِهم .. وظلوا طول الـ 60 سنة دى يترجُّوا
لِنيْل حُقوقهم .. ثم طالبوا .. ثم أشتكوا .. ثم غضبوا شويَّة .. وكل دَه
وكأنهم بيأدِِّنوا فى مالطة .. كل الحُكومات على إختلافها حُكومات
لا بتشوف ولا بتسمع .. وهنا
أستلم الراية جيل الوسَط .. وبدأت نبرَة الشكوَى تعلو ، وتعلو .. ثم
التهديد باللجوء للمُجتمع الدولى ، وتم دَعوتهم
بالفعل لبعض هذه الإجتماعات فى أمريكا ، وكان من أعضاء النوبيين المَدعوين
كاتبنا الكبير والروائى ، والناشط النوبى الصديق
حَجَّاج أدُول .. وقتها فقط بدأ لفت الأنظار للنوبة والنوبيين .. وبدأ
الحُكام فى قليل من الإهتمام .. وكثير من
الوعود .. ورا وعود .. وكلام ورا
كلام .. وماأخدوش من أى مَسئول فى أى حُكومة
منذ عبد الناصر وإلى الآن غير كلام .. كلام وبس
.png)
الجيل القديم كانت الطيبة الصافية العَفويَّة ،هى الغالبة على تعاملاته .. وبوصُول جيل الوسَط
أحتفظ بمَوروثه من الطيبة الصافيَة .. ولكن شابَها بعض الحَذر ، والترقـُب .. وبرضُه
الحُكومات المُتعاقبة ولا عَبَرِتهُم .. ولا سألت فيهم .. وهنا ظهر الجيل الثالث
.. جيل الثورة .. جيل الشباب .. المُستقبل المُشرق ، الواعِد
.. شَعَر جيل الآباء والأجداد إن هُمَّه
دُول اللى حايجيبوا حَق آبائهم .. وحُقوقِهم .. وحُقوق أبنائهم .. يمكن ساعات
بتعلىَ نبْرَة صُوتهم لما بيحسُّوا بسكين الظـُلم على رقابهم .. لما يحسُّوا أنهم
( تقريباً ) مُصَنفِين مِصريين درجة تانية
!! وإن أى حقوق لهم ممكن تتاكِل وتروح وتتنسى .. رغم أنهم بعد الثورة أعتقدوا أنهم
خلاص قرَّبوا قوى لحُقوقهم ، والعَودَة
لأراضيهم .. وظلوا ساكتين طول السنتين اللى فاتوا وهُمَّه بيتفرَّجوا على لِجان
المُتابعة النوبيَّة .. لجنة ، وَرا لجنة
، وَرا لجنة .. ومُقابلات مع رُؤساء
الوزارات ، والوزراء ، وحتى الرئيس .. ومافيش فايدة .. وأخيراً قرر الرئيس توزيع أراضى النوبة لِمَشروعات حُكوميَّة
.. والهدف المُعلن هو التنمية الإقتصادية .. ومشكلة البطالة .. والحَقيقة أن الهدف
تمييع القضايا النوبيَّة .. وتخفيف المُطالبات والإعتراضات ، ومَسْح الهَويَّة
النوبيَّة بأستيكة بتوطين أهالى وفلاحين بَحرى فى أراضى النوبيين .. وكأن مِصر
كلها مافيهاش غير أراضيهم .. ( مع إننا ياأخى كُلنا كِده عايشين على 3% من مِساحة
الأرض المِصريَّة ، والباقى هِوووو )
ده غير
الإهانات المُتعَمِّدة للنوبيين بدايَة من تصريحات الرئيس مُحمد مُرسى،
باعتبارهم (جاليَة نوبيَّة) ، وعِصام العِريان، نائب رئيس حِزب الحُريَّة والعَدالة
.. وزعِيم الأغلبيَّة ..
وعاشِق الصَهاينة .. اللى وَصفهُم بأنهُم (غـُزاة
) ..
وشَبَّههُم حِسين عبدالقادر القِيادى بالجماعة
بـــ بَربَر الجزائر . يعنى حُقوق ضايعَة .. وقضيَّة خسْرانة .. وظـُلم
واضِح .. وكمان سخافة وقِِلة أدَب
ده غير إن الشباب شايف إن كل حاجة بعد الثورة
بتتاخد بالقوة والصُوت العالى .. وماعادش فيه لا قانون ولاشُرطـَة ، ولا قضاء ،
ولارقابة من أى نوع ، ولا شُغل ، ولا أصُول .. وأبوإسماعيل وجماعته يُحاصر المَحكمة
الدُستوريَّة ثم مَدِينة الإنتاج الإعلامى
.. ومافيش حتى غـَفير سَأله أنت بتعمل إيه ياشِيخ حازم ؟ ومش بس كده ، لكن يفرض وجُوده ، وشُروطه ، بسهُولة
، وتِتنفذ ، ويتعزل وزير الداخلية
علشان خاطره .. وبانت الفُولة .. لو عايز حاجتك تخلص ، أو قريبك يخرج من الحَبس ، أو تأمَن على نفسَك . مش مَطلوب منك أى حاجة غير إنك تربِّى دَقنك
.. وتحُكّلك زبيبة حلوة ، وكل ماكانت كبيرة يكون أحسن !! وكتير قوى عملوا كده .. ولقينا ناس كِتيرة ، وقامات كبيرة كانت ثوريَّة ، إتقلبت
مِيَّة وتمانين درجة !! وتبنِت مبدأ ( ظَـَرَّفنِى تِعْرفنى .. وأَبّجْنِى تجدنى
.. وغـَدِّينى تِلاقِينى ولقيناهم فجَّأة بَقوا إخوان ، وقعدوا
على كراسى وزاريَّة ، و حُكوميَّة .. والكراسى دى نَسِّتهُم ثوريّتهُم .
لكن النوبيين مش كِده ياحبايبنا .. الحمدلله إنهم لغاية دلوقت مايعرفوش غير
الحَق والشَفافيَّة .. ومايقبلوش النِفاق والنفعيَّة .. ويكرهون الكذب والكذابين
.. علشان كده الشباب النوبى صَبره وَصل لآخره .. ورُوحه طِلعت فى مَناخِيرُه .. وبَدأوا
يُعبِّروا عن نفسهم حسب وجهات نظرهم .. ونتابع جميعاً آلاف الصفحات النوبيَّة على تويتر والفيسبُك ..
وعشرات المُنتديات النوبيَّة .. وكل واحد فيهم بيعبَّر عن غضبُه بطريقته .. مابين
عِتاب أو هُجوم أوتشكِيك أو تدْويل للقضيَّة
.. أو حتى الإنفصال .. ومنهم من كان غضبُه شديداً .. وشعوره بالظلم البيّن
.. وأن حُكومته بتعتبره عَبيط وأهْبل ومايضُرش
إنه يكون آخر إهتمامات الحاكم .. فقرروا يأسِسُوا حركة تعبر عن غضبهم بإسم ( حركة
كَتالة النوبيَّة المُسلَّحة ) .. وبرضُه بعَفويتهُم المَورُوثة ، وطيبتهم الصافيَة قالوا ده ونشروه فى الصُجف والمواقع الإلكترونية .. والحِكاية
فى نظرى هى مُجرد تعبير عن الغضب العارم بدماء شباب فايْرَة.. وإنذار أخير أن
الكأس إمتلأت لآخرها .. وأى نقطة زيادة حاتغرَّق الدُنيا .
وأنا بأقول لشباب حركة
كَتالة النوبيَّة المُسلحة .. خلاص ياشباب الرسالة وصَلت .. ومش مِحتاجين لِحَمل
السِلاح أبداً لا دلوقتِ ولا بعدين .. صحيح أجدادنا مثل أحمس ومينا
وطهراكا حاربوا أعدائهم وهزموهم وسجلوا أعظم إنتصاراتهم يدرِّسها
العالم كله فى التاريخ المصرى القديم ( اللى كتبه المُستشرقين الأوربيين .. مش مُؤرخينا
اللى أهملوا عمداً بتوصيَة من الحُكام كل مايربط النوبَة وتاريخها وتقاليدها
بالفراعِنة .. رَغم أن العالم كله يَعرف أكتر من المِصريين إن النوبيين هم سُلالة
الفراعِنة ..وأصْحاب الحَضارة المِصرية القديمة ) .. وفى كل حُروبهم كانوا
بيحاربوا الأعداء .. مش أخوانهم المِصريين .. ومهما كان حجم الخِلاف فإن
النوبيين لن يوجهوا سلاحاً أبداً فى وجه إخوانِهم .. أما الحديث عن الإنفصال ( عن
حُكم الإخوان وليس عن مِصر ) ، والكِفاح المُسلح .. كل دِى حاجات عايزة قعدَة
تانية طويلة نكون مستعدين لها كلنا ووسط أهلنا كلهم .. صغيرهم قبل كبيرهم
لأن الكلام في الموضوع ده طويل ومتشعب ... والآراء فيه مُتعددة .. ولازم
الجميع يقتنِع ، ويثِق ، ويطمَئِن بالرُؤيَة المَطروحَة لِمُستقبل النوبة .
وبأقول للرئيس مُرسِى وحُكومِة قنديل .. النوبيون مش حايسيبوا أرضهُم أو حقهُم .. ووعُودكم المُتكررة ده وقت
تنفيذها .. وبسُرعة .. وبأقول للمَرَّة الألف (( إتـَّقِى شَر الحَليم
إذا
غضَب ))
بقلـــــــم
صـــلاح إدريـــــــــس
***
***
للتواصـــــــل :ـــ
***
ـــ تم نشر المقال بجريدة (
المصرى المهاجر ) ــ الصادرة بلوس أنجلوس ـ كاليفورنيا ـ الولايات المتحدة
الأمريكية ــ
عدد السبت 12 يناير 2013
http://almasry-almohager.com
/Salah_Edris011213.php
***
للتواصـــــــل :ـــ
salahedris@gmail.com
مدون بالبلــدى الفصيـــــح
تشريفكم لمدونتى
يسعدنى .. ويمتعّكم ، وقد يفيدكم
http://plackprince.blogspot.com/
ليست هناك تعليقات:
إرسال تعليق