راحت السَكْرَة .. وجت الفِكرة ياريس !!
الأنتخابات الرئاسية أنتهت على خير ياريس .. و النتيجة كانت زى ماأغلب
المصريين عايزين .. وأنت قلت أنك مش حاتجدد .. ورغم أنى متأكد أن الكثير من
المحبين ..والأكثر من المنافقين حايتنططوا
.. ويبتكروا .. ويلفوا ..ويدوروا .. ويحاولوا تعديل الدستور لأستمرارك لفترات
أخرى .. لكنى متأكد أنك مش حاتوافق
..وحاتكون دى آخر فترة رئاسية لك .. ومن هنا يحق لنا أن نقلق ..ونوصل قلقنا ده لك .. ونقولك على كل مطالبنا
..ومخاوفنا .. لأننا ببساطة مالناش غيرك
نثق فيه .. ونطالبه بتأمين حياة المصريين الجاية بعد ماتسيبنا .
وعلشان
ماأطولش عليك ياريس .. وعلى القراء خوفا من أن يهربوا منى .. فسأورد كل المخاوف
والمطالب فى نقاط سريعة :
ـــ أول وأهم
حاجة هو العفو الشامل عن كل الشباب المحبوسين على ذمة قضايا الرأى ،والفكر ،والتظاهر
.. وأى مسجون سياسى لم يشارك فى أعمال العنف وسفك الدماء .
ـــ الدراسة
المتأنية ..وإعادة النظر فى الحياة السياسية المصرية .. وأنت عارف أن فى مصر 102
حزب .. المصريون لا يعرفون منهم غير 2 أو
3 ..والباقى مجرد عدد فى الليمون .. ومن
غير المعقول أن يكون عندنا كل هذه الأحزاب .. ومش لاقيين واحد بس نقدر نثق فيه
..ونسلمه قيادة البلد بعدك ياريس ..
عايزين قبلة الحياة للأحزاب دى .. أو نعدل الدستور ونلغيها
خالص ..ونسمح بحزبين تلاتة أقوياء .. يغنونا عن كل الزحمة اللى مالهاش لازمة دى .
ـــ تأهيل
وتجهيز الشباب ( وده الحاصل حاليا فعلا ).. بس أنا عايز أشوفهم قبل ماتنتهى فترة
رئاستك فى مناصب وزارية وقيادية .. أحنا جربنا العواجيز لأكتر من 100 سنة ..وأفتكر
أن من حق الشباب دلوقت نجربهم ونثق فى
قدرتهم ..والأكيد أنهم حايعملوا اللى ماعملهوش العواجيز طوال قرن كامل .
ـــ زيادة
الفرص للمرأة الشابة فى القيادة والمناصب العليا بالدولة .. وزى ماأنت قلت لقد
أثبتن جدارتهن .. وبنجاح غير مسبوق فى مواقعهن الحالية .. وطالما التجربة نجحت ,
يبقى ليه مانكررهاش .,وحتى لو رأست الوزارة
إمرأة .. وكانت أغلب الحقائب الوزارية بقيادات نسائية شابة .
ـــ كلنا
عارفين ياريس أنك مهتم جدا بمحدودى الدخل
.. وبتعمل كل جهدك للتحفيف عنهم من عواقب منظومة
الأصلاح الأقتصادى .. ولكن بصراحة ياريس
الناس دى جابت جاز خلاص .. وتعبوا جدا جدا !! ولازم وحتما الدولة تخف عليهم
شوية .. لكن إزاى بقى دى بتاعتك أنت بس
ياريس .. وهمه عشمهم فيك أكبر مما تتخيل .. فأوعى تخيب عشمهم !!
ـــ رغم أن
الرقابة الإدارية شايفه شغلها على أكمل وجه .. لكن لسه فيه فساد ، ومفسدين ، وفاسدين
كتير قوى ياريس .. ياريت يبفى فيه حوافز ومكافآت كبيرة معلنة لكل فرد يرشد على
فساد فى البلد ..مع ضمان كامل السرية .. وتأكد أن اللى حاينكشفوا ساعتها من
الفاسدين حايكونوا أضعاف اللى ضبطتهم الرقابة الإدارية فى كل السنوات الماضية !! ؟
ـــ النجاح
الساحق لقواتنا المسلحة والشرطة فى تطهير سيناء والبلد كلها من الأرهابيين وأذنابهم .. يعطيك الحق
بأستمرار هذه العمليات .. إلى أن تطهر البلد تماما من كل خائن ،وعميل ،وإرهابى ..
وأنا عارف أن هذه العمليات تكلف الدولة مليارات كثيرة .. لكن لابد منها ..علشان نجنى ثمار طيبة وحلوة فيما بعد .
ـــ الدولة
العميفة بموظفيها .. ومراكز القوى فيها .. والأخوان المسلمين المتغلغلين فى كل
مؤسسات الدولة .. والذين يعرقلون كل خير للبلد .. مطلوب علاج فورى ،وسريع ،وبات
لهذا السوس الذى ينخر من سنوات فى أساس وأعمدة الدولة .
ـــ أستكمال
مسيرات جذب الأستثمارات والناجحة بشهادة كل العالم .. ولكن مطلوب مزيد من
التشريعات ..وإعادة النظر فى قوانين الأستثمار ..والأهتمام الأول بالمستثمر
المصرى .. لأن راحته ونجاحه هما عنوان البوابة المفتوحة للمستثمر العربى
والأجنبى .
ـــ ضم وزارة
الطيران المدنى لوزارة السياحة تحت قيادة واحدة شابة ومتطورة .. فالخلاف والتضارب
بين الوزارتين عائد على المجال السياحى بخيبات ، وسقطات كثيرة ، سهل جدا تلافيها
..وعودة السياحة بقوة وكثافة لمصرنا الغالية .
ـــ وأخيرا
وليس آخرا .. المعاشات ياريس .. إن أصحاب المعاشات العواجيز المرضى المحتاجين ..
والذين نزلوا للتصويت لك أضعاف من نزل من الفئات العمرية الأخرى .. محتاجين نظرة
ومساعدة حقيقية ..ورغم أنهم يدينون الدولة
من أموالهم الخاصة بأكثر من 700 مليار
جنيه !! .. إلا أن أغلبهم بيستلف ثمن الدواء والعلاج والأكل !! .. لأن مايحصلون عليه قليل جدا .. ولا يضمن لهم
حياة كريمة !!.
ـــ مطلب شخصى
أخير ياريس .. وهو النوبة ، وقضاياها ، وأهلها ،وعودتهم لآراضيهم .. كل أملنا أن
تلقى على هذا الملف الحيوى ،والهام نظرة متأنية منك شخصيا ..ونحن على ثقة فى وعيك
وعدالتك .. لأن النوبيين يحبونك من قلوبهم .. وطالما من قلوبهم .. يبقى أكيد وصل
لقلبك .. فلا تتركهم لأصحاب المصالح ،والنفوذ ،والجاهلين بعمق قضاياهم !! .
ـــ سياستك
الخارجية ناجحة تماما ياريس .. لأتها بقيادتك المباشرة .. وخلينا ماشيين
دايما بالمبدأ اللى ماشى بيه العالم كله
وهو ( الدنيا مصالح ياأبوصالح ) .. ومصلحة بلدى أولا وأخيرا وقبل أى شىء آخر .
ولم
يبق لى إلا أن أشكر الله وأحمده .. وأشكرك لقيادتك ،وزعامتك التاريخية العظيمة .. والتى أخرجتنا .. ـــ أو كادت ـــ من عنق الزجاجة بإذن الله .. وأنا على ثقة أن
القادم أحلى .
حفظك الله ورعاك
.. وسدد على طريق الحق والخير والعدل والرخاء خطاك .
بقلــــــــــم
صـــلاح إدريـــــس
تم نشر المقال بحريدة ( الوطن ) عدد الأحد 8 إبريل
2018
http://alwatneg.org/tfr/2425
ليست هناك تعليقات:
إرسال تعليق