كلمتين من القلب..والرزق على الله

كلمتين من القلب ..

والرزق على الله

===============

ساويرس يتعرض لحملة ضخمة وموجهة من الإخوان المسلمين ، لأنه وضع على صفحته فى الفيسبك صورة ( لميكى وميمى ) وهما بذقن ونقاب ..

وقالوا أن هذا الكافر يهاجم الأسلام والمسلمين .. مع أنه كان يقصد الذقن والنقاب ..وليس الإسلام ولا المسلمين ..

وطلع الراجل تانى يوم واعتذر وقال أنه كان يمزح .. ومازال يعتذر يوميا لغاية النهارده .. والكل يعرف موقف ساويرس من الإسلام والمسلمين ، وإحترامه الشديد لهما ، ويحرص على تأكيد ذلك فى كل مناسبة .. لدرجة أنه فى زيارته للأزهر الشريف فاجىء شيخ الأزهر بتقبيل يده ، تأكيدا لهذا التقدير والأحترام ..

وبرغم أن المئات من الصحفيين والإعلاميين بيطلعوا علينا كل يوم ويهاجموا الإخوان واللحى والنقاب جهارا نهارا وبوضوح شديد .. لكن لم يرد عليهم أحد من الإخوان !!

ليه ؟ لأنهم ليسوا خصما أو منافسا فى الحياة السياسية !!

أما ساويرس فقد أسس ( حزب المصريين الأحرار ) 60 ألف عضو خلال شهر .. ميزانية مالية كبيرة .. منبرى إعلام - مرئى ومكتوب ـ ( المصرى اليوم ..و أون تى فى ) )

وقد يستخدمهما للترويج لحزبه ..( رغم أنه لم يفعل حتى الآن ) ..

لكن الإخوان شايفه أن هذا هو الحزب الوحيد اللى ممكن ينافسهم بسبب شعبية ساويرس ، ووطنيته المعروفه ، ومنافسته لهم فى أعمال خيرية كتيرة جدا ومعروفة .. وبكده يبقى منافس .. ومنافس قوى كمان .. يبقى لازم يتهاجم ويتشن عليه حملة كبيرة تشكك فيه وفى حزبه .. بعد ماكانوا بيدوّروا لساويرس على غلطة بالمنكاش !!

ونسى الإخوان حاجة مهمة وهو أن أعضاء حزب المصريين الأحرار كلهم ( ناس بتفهم ومثقفة وواعية ) يعنى يقدروا يميزوا بين الخطأ والصواب .. وبين الإهانة المقصودة للإسلام وغيرها ..

وأغلبية المصريين من الكادحين والمهمشن والطبقات المتوسطة .. يعرفون ساويرس جيدا ، ويثقون فيه .. وأى حملة على ساويرس ستنقلب إلى حملة لصالحة إذا تفرسنا فى الحقيقة والمواقف السياسية لمن يهاجمه ..

وسنجد قيادات إخوانية متضاربة التصريحات والمقالات والرأى والرؤيا .. وفصل رموز كبيرة محترمة ..ووجودها داخل الإخوان كان مكسب كبير للجماعة ..وفصل رموز إخوانية شبابية شاركت فى الثورة ولها تأثير جيد على الثوار كلهم ..

وتفاؤل الجميع خيرا بتفكيرهم الوسطى والواعى ..والقريب من عقول أكثر شباب الثوار ..

وساويرس كمان لاينقصه الذكاء ليعرف أنه لو هاجم الإسلام لخسر الكثير والكثير ..

والغريبة ياإخوانا إن مافيش ولا صحفى ولا إعلامى فى قنوات المكلمخانة الليلية ( برامج التوك شو ) خرج علينا ليدافع عن ساويرس .. ومش عارف ده خوف من الإخوان والسلفيين ؟.. ولا إدانة منهم للصور ؟.. ولا إيه بالضبط .. ؟

وأنا عارف أن ناس كتير حاتهاجمنى .. ويمكن يتهموننى بالكفر والزندقة كمان .. خصوصا وقد كتبت مئات المقالات الدينية فى مدونتى الخاصة ( بالبلدى الفصيح ) و المنتديات ، والصحف المختلفة .. يبقى كان المفروض ألغى عقلى وأمشى وراء الجماعة !!.. لأ .. مش حاأمشى وراء أى حد .. ولازم أشغّل عقلى .. وأنظر للموضوع بهدوء .. ومش حاأفكر كتير علشان أعرف أن المنافسة السياسية ــ ولا غيرها ــ هى المحرك الأول لهذه الحملة الظالمة ..

وقبل ماأختم كلامى أريد أن أؤكد أننى لا أعرف ساويرس .. ولا تربطنى معه أى صلة من أى نوع .. .. ولكنى قلت اللى فى قلبى وحاسس بيه .. ورزقى على الله .. ومستنى رأيكم لأنه هام جدا .

صــلاح إدريـــــس