سلعوة ..اسمها الثانوية العامة !!

سلعوة.. اسمها ..

الثانوية العامة !!

:::::::::

فيما يلى احدى مقالاتي .... تم نشرها يوم الثلاثاء الموافق 27 مايو 2008 بجريدة

( المصرى اليوم )

وياريت تقولوا رأيكم ... أدام الله عزكم ....

............

قُطعت الثانوية العامة .. وقُطعت سنينها.. غول وسلعوة مفترسة .. وحش كاسر يدخل بيوت الأسرة المصرية كل عام .. ويلبد فيه سنة .. أتنين .. تلاتة .. أنت وبختك .. وأنت وعدد أولادك .. وأنت وتفوقهم دون دروس خصوصية ( واسعة دى شوية . مش كده !! )... طيب أنت وقدرتك على الدروس الخصوصية ... يعنى من الآخر تقدر تستلف كام من أصحابك اللى أشتغلوا أعمال حرة ؟؟ومراتك كل ليلة تعايرك بتفوقهم عليك ..!!!...!! تصدقوا أنا لما قررت أكتب عن الثانوية العامة.. أضطريت أراجع كل ماكتب عن المدعوقة دى.. خلال العشرين سنة اللى فاتت ....!! لقيت نفسى فى متاهة كبيرة جدا .. ومش فاهم منها حاجة .. فكل وزير ييجى يغير من نظام الثانوية العامة ..مرة أدخال نظام تحسين المجموع .. والسنة اللى بعدها يتلغى .. .. ومرة مسموح بتغيير المسار .. والسنة اللى بعدها يتلغى .. .. ومرة زيادة المواد الأختيارية .. وتقليل الدراسية .. ومرة تحديد 7 مواد للمستوى الرفيع وللطالب حرية أختيار مادة منهم للأمتحان فيها .. والسنة اللى بعدها يتلغى كل ده .... ثم تطبيق نظام الساعات المعتمدة 160 ساعة كشرط للحصول على الثانوية العامة .. وبعدين يقولوا لأ .. لأ .. دى كانت فكرة بس !! ثم يتم تشكيل لجان .. وراء لجان .... ثم لجان داخلية .. وكل واحد يصحى بدرى من العاملين فى الوزارة .. يشكل لجنة لدراسة تغيير نظام الثانوية العامة ..!! صدقونى والله ياجماعة .. وأنا أجهز لهذا المقال .. وبدأت فى تدوين الملاحظات البسيطة ..علشان مصداقية الموضوع .. لقيت الملاحظات أخدت حوالى 12 صفحة.. يبقى الموضوع حاياخد أيه ؟ واللخبطة اللى شرحتها دى حاتترتب أزاى ؟ أنا شخصيا لو أمتحنونى فى اللى أنا كتبته فى المقال ده بنفسى .. أكيد حاأسقط بالثلث .. فما بالكم بأولادنا المساكين.. والكتب المتلتلة !! وجموع المصريين من الأهالى الغلابة !! اللى بيعيشوا فى كنف هذا الوحش الكاسر سنة كاملة.. ويمكن أتنين أو تلاته ... وبعد العذاب والمعاناة .... ينجح الواد أو البنت!( ده لو عدت سنوات الجامعة بدون إنحراف إجرامى .. أو دينى .. أو زواج عرفى أو ماشابه ...!!!) وبعد كده يقعدوا على القهوة لينضموا لطابور البطالة الطويل ... يبقى بذمتكم ليه بقى وجع القلب من البداية .. مش الأحسن ناخدها من قصيرها ونكتفى بأن نتعلم فك الخط وخلاص .. ويادار مادخلك شر .. ونريح نفسنا وأهلنا .. من السلعوة اللى أسمها الثانوية العامة .


****************