أحمدك يارب .. إنك رجعتنى عيــل !!
**********
أبشروا ياجماعة الخير .. خلاص وجع الدماغ اللى عندنا حاينتهى .. ومتابعة برامج الحوار فى سهرة الليل خلصت .. والدنيا خلاص حاتبقى بمبى .. بمبى .. بمبى .. لأن حكامنا ـ ربنا يطول عمرهم ــ قرروا يريحونا من وجع الدماغ والكلام الفاضى ده كله !! أول حاجة عملوها منعوا إذاعة المحاكمات كلها .. وكمان منعوا النشر عنها !! وخلوها جلسات سرية !! سرية ليه ؟ علشان فيها كلام قلة أدب مايصحش الشعب الصغير القاصر يسمعه !! علشان أخلاقه ماتبوظش .. ومش بس كده دول كما قفلوا قناة الجزيرة اللى الكل بيشوفها ويصدقها .. لأنها قناة عميلة .. مندسة.. خائنة .. وعندها أجندات ودفاتر ونتايج كمان ( مع أننا لسه فى نص السنة ) .. وتم إصدار بيان يشبه القانون بتحريم ترويج الأشاعات .. وتم تهديد كل القنوات التليفزيونية بطريقة (أضرب المربوط يخاف السايب .. أو الكلام ليكى ياجارة لو كنتى حمارة )॥ والكل لازم يلتزم ويسمع الكلام ॥.. إن الشكر واجب لقيادتنا الحكيمة لأنها خايفة على مصالحنا .. وعلى راحتنا .. ومن النهاردة تقدروا تفرفشوا كده .. وترجعوا تلعبوا السبع طوبات للكبار..
والبلاى ستشن للصغار .. أو الشايب للستات .. أو ألعب فى مناخيرك لوكنت لوحدك .. المهم تلعب فى أى حاجة ..وهذا هو أهم أنجازات ثورتنا المباركة ألعب .. ألعب .. ألعب .. أخدنا أيه من الجد ؟ ياراجل فكك من وجع القلب ده .. وشوف نفسك بقى .. بصراحة أنا راجل عجوز ومن زماااان قوى وأنا نفسى أرجع عيل صغير ، وألاقى حد يرعانى ويشوف مصالحى .. وحكومتنا الرشيدة حققت لى الحلم ده أخيراً ॥
أحمدك يارب أنك رجعتنى عيل على إيد الحكومة !!
صــلاح إدريــس
مدون ( بالبلدى الفصيح )
ليست هناك تعليقات:
إرسال تعليق