بدّل مايكحّلوها .. عَمـُـــــوها !!

بدّل مايكحّلوها .. عَمـُـــــوها !!

********

كلكم عارفين أننا جميعا بنسأل الله فى حق النشوق .. وكلنا بنستلف ونّربط على بطوننا ، لأننا كلنا بنصرف من اللحم الحى ، خصوصا اللى زى حالاتى وبيشتغل فى السياحة .. وطبعا كلكم عارفين برضه أن السياحة مضروبة بالجزمة القديمة .. واللى يلاقى سايح يسكّنه أو يفسحه بخصم 70% بيرقص على سعده وهناه ..

وعلشان كده أخونا الفاضل سعد الكتاتنى عضو مكتب إرشاد الإخوان المسلمين .. والأمين العام لحزب الحرية والعدالة .. تكرم علينا بمقابلة صحفية يوم الأربعاء 7 سبتمبر مع الصحيفة الأسرائيلية ( جيروزاليم بوست ) ..

وقال إيه بقى ـ لافض فوه ــ أن الإسلاميين حايكونوا هم صناع القرار فى المرحلة القادمة .. وتكلم فى موضوعات كتيرة ليس مكانها هنا ..

لكن عندما سألت الصحيفة عن سياسة الإسلاميين مع السياحة .. فقال مامعناه إنهم حايعّلموا السياح الصيّع ..الأدب والأخلاق. فالمايوهات لازم تكون شرعية !! ويمكن مايكونش فيه مايوهات أو سياحة شواطىء أصلا !! .. ومافيش خمور للأجانب !!.. وسنبحث آليات أخرى للتعامل مع السايح الأجنبى .. وكلام كتيرعن السياح ، وضرورة الأدب وإحترام العادات والتقاليد ، والتوجيه السليم و..و.. من اللى أنتم حافظينه وعارفينه ده ..

((وكله كلام كويس قوى وعظيم ومطلوب فعلا .. واللى كان من السهل قوى قوى تنفيذه من غير مانقوله ونخوف الأجانب .. ونوريهم أننا جايبينهم للتأديب والتهذيب والإصلاح !! لو كان عاجبهم )) ..

وعلى الفور قامت الجريدة السويسرية (20 دقيقة أو سبانسيك نيوتن ) بنقل الموضوع بحذافيره فى الجمعة 9/9 بعنوان ( الإسلام ضد السياحة ) ..

وبعدها بتمانية وأربعين ساعة بالضبط ، وصل لمدينتنا دهب بسيناء إلغاء حجوزات لعدد 4 أفواج سويسرية بعدد 186 سائح .. بعدد 9114 ليلة سياحية تساوى تقريبا 600000 يورو يعنى حوالى 5 مليون جنيه ..

وده لمدينة دهب فقط ولـ 3 أفواج سويسرية فقط .. شوفوا بقى شرم الشيخ والغردقة والأقصر والقاهرة وأسوان ..

وعلى فكرة دول السويسريين بس !! ..

ياترى إيه الموقف مع بقية جنسيات العالم .

وكان ممكن أعرف كل التفاصيل .. بس نفسى أتسدت خلاص .. لاعايز أعرف !!.. ولا عايز أسمع !! ..

ومش عارفين حانلاقيها منين ولا منين ؟

الثورة اللى كنا فرحانين بيها جدا برغم الخسائر!! .. وبنقول مش مهم إن شاءالله حانبقى أحسن ..وأحسن ... ماأخبيش عليكم فيه مستثمرين كتير وعاملين بالسياحة وغيرها، بيلعنوا اليوم اللى قامت فيه الثورة .. وبيكرهوها كل يوم أكتر من اللى قبله .. والإحباط ماليهم من صوابع رجليهم لغاية شعر رأسهم .. وماعندهمش أى إستعداد يسمعوا حد يقولهم دى حاجات فردية ..وإن شاء الله حاتبقى أحسن وماتقلقوش .. والكلام الأهبل ده اللى طلّع عينينا وزهقنا منه ..

وطبعا الخبر وصل لمرشد الإخوان.. وكالعادة مع الإخوان ،ــ وغيره من القوى السياسية المختلفة فى فترة مابعد الثورة ـــ .. أنكر وشجب كل اللى إتقال !!..

وتانى يوم أخد مجموعة من الإخوان فى زيارة للأماكن السياحية بالأقصر .. لإصلاح مافسد !!

ياجماعة الخير لحد أمتى واحد يقول تصريح ؟.. وبعدها بساعات يطلع واحد تانى يكذّبه وينكره !! ..

مره صبحى صالح ،ومره البلتاجى ، ومرة الكتاتنى ..

وناس تقول كلا م ، وبعد شوية يتقال عكسه تماما !!

وكلنا عارفين بإن الإخوان كانوا بيوعدونا بأنهم لو وصلوا للحكم ، سيحكمون بنظام حكم يشبه إلى حد كبير النظام التركى الناجح جدا .. وعند وصول أردوغان أول إمبارح أستقبله الإخوان فى المطار إستقبال الثوار الفاتحين ، وتقريبا ماكانش فيه غيرهم فى إستقباله من الفصائل السياسية ، وأستبشرنا خيرا ..

والنهاردة أجتمع أردوغان مع المرشد العام للإخوان ..

وبعدها فوجئنا أن الإخوان والإسلاميين يصرحون بأنهم يرفضون نظام الحكم التركى !!!!!

( حاتقرأوا الكلام ده فى جرايد الأربعاء 15 سبتمبر ).. أستقباله أس

وبرضه التردد والتضارب فى التصريحات بتعمله الحكومة والمسئولين ..

يقولولك تفعيل قانون الطوارىء ، ويبدأوا بالإعلام وإغلاق قناة الجزيرة مصر .. ثم ستفاجئون فى جرايد الأربعاء 15 سبتمبر ، أن قانون الطوارىء لن ينفذ بأى حال من الأحوال على الصحافة والإعلام !!

أمال اللى أنتم عملتوه ده إيه ؟ وعملتوه ليه ؟

وحتى الناشطين السياسيين يتفقوا على نقاط معينة وتانى يوم يختلفوا على ماإتفقوا عليه إمبارح !! .. ويطلع كل واحد لوحده ينكر ، وينتقد ، ويشجب !! ..وبعدها بأسبوع يتجمعوا تانى.. الكل بيتكلم .. والكل بيفتى فى اللى يعرفه واللى مايعرفهوش !! و مش مهم بقى كام مليون واحد حاينضّروا من الكلام ده .. المهم حضرته يطلع فى الجورنال والتليفزيون.. وعياله وصحابه وجيرانه يشوفوه .. ويقولوا هيييه بابا آهوه .. بابا آهوه ..

أرحمونا من فضلكم ..وكل واحد يعد لغاية خمسين قبل مايتكلم يمكن ربنا يفرجها عليه بكلمتين حلوين ، بدل ماالكل عمال يلطّش يمين وشمال ..ويخسرنا ملايين الدولارات كل يوم .. ويخسرنا الروح الثورية ، والأمل والعزيمة .. لمجرد إنه فاكر نفسه نجم ، وزعيم ، وماجابتوش ولاّدة ..

أرحمونا بقى يرحمكم الله .. والمشرحة مش ناقصة قتلى .. !!

وحاجة تانية أسخف حصلت برضه فى مجالنا السياحى .. فقد طلعت علينا جريدة ( أخبار مصر ) .. ودى بتطلع بعدة لغات وبرضه يوم 9 سبتمبر بخبر بيقول إن كل السياح القادمين لمصر لابد لهم من الحصول على تأشيرة مسبقا ..

علما أنه لم يكن هناك أى تأشيرات لمصر للأجانب .. خصوصا لمواطنى الإتحاد الأوربى وأمريكا والعديد من الدول .. ولأن الجريدة دى مقروءة جدا فى أوروبا فقد فوجئت شركات السياحة والفنادق بالعديد من الإلغاءات للحجوزات لأن السياح مش عارفين يعملوا إيه ؟

بعضهم حجوزاته بكرة ولا بعده .. بعضهم يبعد عن السفارة المصرية آلاف الكيلومترات !!

بعضهم فى جروب كبير ويحتاج وقت طويل ولا يملك هذا الوقت .. وغيره .. وغيره .. وبعد نزول الخبر تم إلغاء عدد كبير جدا جدا من الحجوزات ..

فأخذ إخواننا أصحاب شركات السياحة وأصحاب الفنادق ونوادى الغوص يصرخوا ويصوتوا بأعلى صوتهم .. لغاية ماسمعهم وزير السياحة .. فما كان منه إلا أنه قعد يصوت معاهم !! لغاية ماتم تصحيح الخبر !! لأنه بصراحة نزل بالغلط ههههههههه وضحكنا عليكم !! ولا التأشيرات أتلغت ولا حاجة !!.. وعليكم واحد هيييييييييييه !!!

بالذمة شفتم هبل ، وعبط ، وإستهبال ، وإستهتار ، أكتر من كده .. مصير الناس وإقتصاد البلد بيلعب بيه شوية ناس لاهى فاهمة !! ..ولا هى عارفة حاجة !! .. وتروح مصالح البلاد والعباد فى ستين داهية ..

ومافيش أمامى غير أنى أكشف رأسى .. ورأس كل المضرورين من المصريين .. وأدعى وأقول يارب يامنتقم ياجبار ..تعاقب كل من يتسبب فى خسارة هذا البلد الآمن ماليا ومعنويا .. بأن تكون خسارته ماليا ومعنويا أضعاف أضعاف ماتسبب به للبلاد والعباد .. وحسبنا الله ونعم الوكيل .

صــلاح إدريـــس

مدون بالبلدى الفصيح