حفيدتــــى ( رتــاج )

حفيدتــى ( رتــــاج )

.....

عايز أحكيلكم حكاية شخصية

جدا .. و يمكن كتير منكم يكون قابل حالات مثلها فى حياته

الحكاية ياأصدقائى أن عندى حفيدة

أسمها ( رتاج ) -بسم الله ما شاء الله عليها - وعمرها (خمس سنوات) ولسه فى الحضانة KG2 فى مدرسة (الفيوتشرز بدهب )

النهاردة حضرتها شرفتنى بالزيارة بعد غياب حوالى شهر .. وكنت قاعد على النت ، وكالعادة بأخاف تلعب فى الكمبيوتر، فقلت لنفسى أقفله أحسن علشان ماتقعدش تلعب فيه .. ولما جيت أقفله قالتلى من فضلك ماتقفلوش ياجدو .. ليه ياريتا .. قالت علشان عايزاك تعمل لى print لشوية صور .. قلت لها أعمل لك أيه قالت : print ياجدو .. يعنى طباعة .. قلت حاضر ياستى تطبعى أيه ياحبيبتى ؟ قالت : عايزة أطبع رسوم أطفال علشان ألونها بطريقتى .. حاضر ياريتا .. ولسه بأفكر أجيب موقع الصور ده أزاى ؟ قالت لى : أدخل جوجل بس وأنا حاأوريك .. دخلت جوجل وأنا مزبهل وفاتح فمى على آخره من الدهشة .. قالت لى دلوقت أكتب ( Coloring Games ) و قالتها بالأنجليزية السليمة ..وعندما بدأت الكتابة بدأت تملينى الأحرف

( C O L O R I N G G A M E S )

و لما وصلت للموقع حاولت أنقل الصور التى أختارتها ، ولكنى للأسف نقلت اللينك بالخطأ .. قالت بصوت عالى غاضب : أيه ياجدو أنت عملت ( Copy link ) والمفروض تعمل ( Copy image ) .. ((وعايز أقولكم سر شخصى هو أننى شخصيا فى حكاية copy link , copy image دى أتعلمتها من شهرين تلاتة بس )) .. المهم عملت لها البرينت اللى عايزاه .. ووجدت نفسى أترك لها الكمبيوتر كله .. لكنها قالت لآ لآ الكمبيوتر بتاعك ده قديم شوية ياجدو .. وأحضرت اللاب توب بتاع أخوها سيف الدين ( 8 سنوات ) من الغرفة الأخرى ، وفتحته وبدأت تراجع إيميلاتها من الأطفال اللى فى سنها 5 و 6 سنوات .. وأفتكرتها بتهزّر وبتسرح بى .. لقيتها فعلا فاتحة اللاب توب وفاتحة إيميلها على الياهو .. وبتراجع الأيميلات اللى وصلتها .... ولقيت نفسى بعد مامشيت بأبعت لها إيميل على عنوانها البريدى بقول لها وحشتينى ياريتا .. ومعاه شوية صور لأطفال وحيوانات . بس يارب تعجبها !!

أنا بصراحة كل يوم بيزيد أنبهارى مرة بالشباب .. وبعدين بالصبية 10 ــ 15 سنة .. ودلوقت بالأطفال 5 سنوات .. ومش عارف بكره حاييجى الدور على الرضع .. ولا أيه ؟

الهدف من الحكاية أنى أقولكم أن مصر بخير .. وبتتقدم بولادها .. وولاد النهارده بينهم وبين ولاد إمبارح ، وأول أمبارح فرق مابين السماء والأرض .. اللهم أحفظ لمصر رجالها ونساءها .. شبابها وشيوخها .. وقبلهم كلهم أطفالها لأنهم مستقبلها الواعد ...

وربنا يحفظ لكم أولادكم .. وأحفادكم .. ولو ماعندكمش يعطيكم .. ولو لسه ماأتجوزتوش ، تتجوزوا ، وتجيبوا الخلف الصالح إنشاءالله ... واللهم لاتحرم أنسانا من أن ينعم بأطفاله .. فالمال والبنون زينة الحياة الدنيا .. ومش مهم المال .. يارب لا تحرم أحدا من البنون .

صــلاح إدريــس

مدون بالبلــدى الفصيـــح