بالبَلدى الفصِيح (11 )
(( تخاريف ))
ـــــــــــــــــــــــــــــــــــــــــ
*
لو نِسينا اللى فات .. عُمرنا ماحاننجح فى اللى جااى .. والمَثل الشَعبى بيقول ((
لو نِسيتوا اللى جَرى .. هاتوا الدَفاتر تِتقرَى )) .
كَلِمة على لِسان وَالِدة الشَهيد عَلاء عبد الهادى ..
الشَهيد فى أحداث مَجلس الوزراء .
*
أدوية الضَغط والسُكر والأعصاب .. شَحِت قوى فى السُوق !! حَد عارف ليه ؟
*
الحَق يتقال ياأخوانا .. جَماعة الإخوان قِدْرت فى شُهور قليلة تحقيق اللى عَجزت عنه كل جُيوش الإستعمار
المُختلفة اللى أستعمرت مِصر .. وهو (( تفريق المِصريين )) .
* فى الوقت اللى مِصر كُلها مِحتاسة ، ومَلخُومة ، فى الدُستور والإستفتاء عليه .. الجَماعات
الجهادِيَة فى سَيْناء أستطاعت ترتيب أوضاعها .. وتنظيم صُفوفها .. وترسِيخ
أقدامْها .. وتجهيز مِيليشياتها وكتائِبها .. إنتظاراً لأى تعليمات .
* تم إنشاء 7 مَحاكِم شَرعيَّة فى سَيْناء .. وبَدأت العمل بالفِعل .. وهى بَديل عن المَحاكِم العُرفية البَدويَّة المَعرُوفة .. ومَحاكِم الدَوْلة اللى مش مَوجُودَة .. وقد توزعت المَحاكِم الشرعية كما يلى :ـ
عدد 3 مَحاكِم من نصيب الدَعوَة السَلفيَّة .
عدد 2 مَحكمَة من نصيب السَلفيَّة الجهادِيَة .
عدد 2 مَحكمَة من نصيب كتائِب التوحِيد
والجهاد .
( و
ماحَدش يسألنى هى المَحاكِم دى بتحْكُم فى إيه !؟
و لِيه
مَاخلوهاش مَحكمَة شَرعيَّة وَاحدَة مادام الحُكم بالشَرْع والشَرْع وَاحِد على
ماأظن !؟ ) ..
صَدقنى والله
العظيم ماأنا عارف !!
*
الإستفتاء .. جابللى فِتَاق !!
* مش عارف ليه حاسس إن مرسى وجماعته بينفخووا .. وينفخووا .. ويجهزووا حازم أبو
إسماعيل .. وبيسّهِلوُله يعمل مُصيبة سوُدة .. وبعدها يدبحوه ككبش فداء
..وكأنه السبب فى كل مايحدث فى مصر من خراب ،ودمار ، وتخوين ، وغياب القانون .
* 
رافع العيساوى وزير المالية العراقى
النهاردة أعلن عن أن ميلشيات إسلامية عراقية
، هجمت على بيته ، ومكتبه .. وخطفوا
عدد من موظفيه وحراسه ، وهو بيترجى
الخاطفين يفرجوا عن رجالته .. وأنا
بأواسيه وأقوله ( أنتم السابقون .. ونحن اللاحقون ) .
رافع العيساوى وزير المالية العراقى
النهاردة أعلن عن أن ميلشيات إسلامية عراقية
، هجمت على بيته ، ومكتبه .. وخطفوا
عدد من موظفيه وحراسه ، وهو بيترجى
الخاطفين يفرجوا عن رجالته .. وأنا
بأواسيه وأقوله ( أنتم السابقون .. ونحن اللاحقون ) .
* 
أنتم
عارفين طبعا إن الطيارين بتتحسب
خِبراتهم بعدد ساعات الطيران .. ودلوقت بتتقاس خبرة ، وكفاءة ، الرؤساء ، وحكوماتهم بعدد رجوعهم فى
قراراتهم .. وبكده يبقى أحنا نستحق المركز
الأول لأن لدينا حيثياتنا وهى :ـ
أنتم
عارفين طبعا إن الطيارين بتتحسب
خِبراتهم بعدد ساعات الطيران .. ودلوقت بتتقاس خبرة ، وكفاءة ، الرؤساء ، وحكوماتهم بعدد رجوعهم فى
قراراتهم .. وبكده يبقى أحنا نستحق المركز
الأول لأن لدينا حيثياتنا وهى :ـ
ــ مرسى رجع فى
قراراته 5 مرات .
ــ هشام قنديل
رجع فى قراراته مرتين .
ــ وزير
التنمية المحلية رجع فى قراره مرة .
ــ وزير المالية
رجع فى قراره مرة .
ــ النائب
العام الجديد رجع فى قراره 3 مرات .
( بذمتكم نستحق
المركز الأول بجدارة بقى ولا لأ ؟ )
* الدَوْلة بتقول إن نِسبة
الإشغالات السِياحيَّة فى جنوب سَيْناء 65% .. ومن وَسَط جنوب سَيناء بأقولكم إن
نِسبة الإشغالات فى ديسمبر و أعياد الكريسماس ورأس السنة كانت فى السابق بتتعدى ال110% كل سَنة .. وبَقالنا سَنتين
ولِغاية النهاردَة النِسبة لم تتعدى الـ 11 % .. والـ 65% بتاعِتكم
دِى يمكن تكونوا بتقصُدوا بيها أسْبانيا ولا هَاواى .. لكن مش مِصر أبداً
ياكَذابين !!
*
قبل الإعلان الدُستورى كانت فيه إشاعات بتقول إن مُرسِى ناوى يخللى يُوم
الجُمعة يُومين فى الأسبُوع ( الجُمعة والثلاثاء ) علشان يُخطب براحته
ويقول كل اللى عنده .. لكن بعد التظاهُرات ومُخطط خطف الرئيس نفس
الإشاعات بتقول إن الرئيس بيفكَّر يلغى يوم الجُمعة خااالص .
*
زوْجة مُرسِى بتقول إن كُل لِيلة دُموع الرئيس بتغرّق المَخدَة خِشيَة
من الله .. وأنا مِصدَقها طبعاً .. لكن لازم أسأل نفسى طالما البُكاء
بهذه القوة وكل لِيلة فمَعناها أن هناك أخطاء كثيرة .. ومُرسِى يَخشَى الله
فِيها !! طييييييب ياأخى .. لِيه ماتصَلحش اللى أنت شايفه غلط ؟ لِيه
ماتستمعش لِضميرك وتعمل اللى يقولك عليه ؟ ليه ماتضرَبش كل وَاحد بيحاول
يبعدك عن الحَق بالجزمَة .. وتحتمِى بالله وبشعبك ؟ على الأقل حاتنام مِرتاح
و من غير دُموع .. وتريَّح الحاجَّة من غسيل أكياس المَخدات كل يُوم ؟
*
الخلل .. والتضَارُب .. والعَشوائيَّة فى مُؤسسات الدَولة !! مالوش غِير
مَعنىَ وَاحِد هو إن هناك خلافات حادَة بين أعضاء مكتب الإرشاد .
*
بيتهيألى بعد أن أثبتت القوتان الأعظم فى مِصر .. الإسلام السِياسى ..
والمُستقلين .. قوتهُم فى الشارع من حَشد وتظاهُر وحِصار وضَرب ودَم ..
بأقولهم : مش تِختشوا على دَمكُم بَقى .. وتتتنيلوا تقعدوا مع بعض علشان
خاطر مِصر .. وتِطلعُونا من الأزمَة المَهببَة دِى .. لأن البَديل إنها تتطربَق
على دِماغكُم ودماغ اللى خلفوكم أنتم
الإتنين .. وبَعدكُم مُباشرَة على دماغ مِصر ودماغ اللى خلّفوها !!.*
فى وِسط
العَتْمة اللى أحنا فيها .. فجأة ظهرت شمعة جميلة أضاءت المكان كله .. وأعطتنا
الأمل فى الخروج من النفق المظلم ..
والشمعة هى ( المرأة المصرية ) .
* المقال ده
أتبعت الخميس علشان يلحق يتنشر صباح السبت .. يعنى حاتكون المرحلة الثانية من
الأستفتاء شغالة .. وخليكم عارفين إنه لو كانت النتيجة بـ ( نعم ) .. يبقى
حانشوف ذل ، وعنجهية
، وقلة أدب ، وتجاوزات ، وظلم ،
ومَرارْ طافح .. ده غير مظاهرات
وأعتصامات الرافضين واللى مش حاتنتهى
بسهولة !!
ولو النتيجة
كانت بـ ( لا ) .. يبقى حَضَروا نفسُكم لحرب بين مسلمى قريش ، وكفارها فى موقعة ( التحرير ) !!
((( اللى فى دماغك دلوقت صح .. أيووووه .. أحنا داخلين
على أسوأ ايام عرفتها ، أو حاتعرفها مصر فى تاريخها كله .. وحاتشوفوووا
)))
* أستأذِنكم علشان ألحَق الطيَّارة اللى طالعَة بعد ساعتين للمَحلة .. رَايح أعمل شُوبنج هناك .. وعايز أجيب جلابيتين ، ودَستة ملابس داخلية .. وفوطتين حلوين .. وإيشارب وعباية للحاجَّة .. وجُوز شَرابات من اللى الأستيك مِنه فِيه .. واللى عايز حاجَة يقوللى بَدرى علشان الوزن المَسمُوح به 20 كيلو بَس .. والجمارك المحلاوية صعبة قوى .
ذ****************
ـــ تم نشر المقال بجريدة المصرى المهاجر ـ
الصادرة بلوس أنجلوس كاليفورنيا ـ الولايات المتحدة الأمريكية ــ العدد الصادر
السبت 22 ديسمبر 2012
http://arabic-media.com/newspapers/americas/almasry-almohager.htm
بقلـــــم
صـــلاح إدريـــــــــس
salahedris@gmail.com
مدون بالبلــدى الفصيـــــح
تشريفكم لمدونتى يسعدنى .. ويمتعّكم ، وقد يفيدكم
http://plackprince.blogspot.com/
ليست هناك تعليقات:
إرسال تعليق