بالبَلدِى الفصِيح ( 12 )
حُكومَة بتطرقع صَوابعْها وهىَ بتِتْفلّىَ فى الشَمسْ !!
ــــــــــــــــــــــــــــــــــــــــــــ
* قعدوا يَصرخوا
.. ويلطمُوا .. ويتحسْبنوا علشان إلغاء القنوات الإباحيَّة ..فصدَر الحُكم بحَجْب
هذه القنوات .. ودلوقتِ بعد مُرور حَوالى شَهرين .. لا القنوات إتمَنعِت .. ولا
الحُكومة نَفِذِت .. ولا أهل الشريعة ثاروا .. ولا أى حَد من الناس أتكلم ، وكأنهم بيقولوا ( الحمدلله إن الحُكومة نِسيّت .. ومش عارفين
إن الحُكومة تَنَاسِت بِمَزاجها ) ... ويظهر إن الكل مُتَفِق ..من غير إتفاق على الإبقاء على القنوات الإباحيَّة !!!!!
* محمد محْسُوب
وَزير الدَولة للشئون القانونية ، قدَم إستقالته لرئيس الجُمهورية !! مع إن المَفروض
يقدِّمها لِرئيس الوزراء .. ولكنه لا يَعترف برئيس الوزراء اللى بيشتغل تحت
رئاسته.. وبيطالب بإقالة الوزارة اللى هو وَزير فيها ... وهو وهشام قنديل بيلِّسْنوا
.. ويلّقْحُوا على بَعض هو ورَئيس الوزراء فى مُؤتمرات صُحفية .. يخرب بيت سِنينكم
.. ده أنتم مَسْخرَرررررررررة !
* الرئيس قرر
تغيير وزارى مَحدود ولِمُدة مَحدودة ( شَهرين ) !!! بالذِمَة دَه كلام عاقلين .. تقدر تقوللى أنهى وَزير حايقبل الوزارة لِشَهرين!!
.. ولو قَبَل ياترى مُتوقِع مِنه أى إنجاز
.. أو خطط مُستقبلية .. أو حتى التوقيع على أى وَرقة .. والكلام ينطبق على باقى الوزراء اللى
حايفضلوا فى الوزارة .. يَعنى إحنا عندنا حكومة فى الشَهرين اللى جايين شُغلها
الشاغل طرقعِة صَوابع
رجليها وهى بتتفللى
فى الشَمس !!
* كلام وإشاعات
عن أن الأزمة الحالية .. وحالة الفقر الدَكَر
اللى فيها السِياحة المصرية .. هى بفِعل فاعل !!.. يَعنى مَقصودة !! .. للقضاء على
السِياحة فى مِصر .. بلا سٍياحة بلا قِلّة أدب .. وتمهيداً لِدَولة الخِلافة !! ..
ناس كتيرة مش مصدَّقه الكلام دَه .. لكن 4 مليون من العاملين بالسِياحة مِصَدقين لأن اللى بيحصل للسِياحة ورجالها وعُمالها غير
طبيعى .. أقسم لكم بالله العظيم أن مُستثمرين كُبار فى السِياحة عايشين بالعافية
.. بعد ماباعوا كل حاجة .. ومش فاضل غير هُدومهم
!! 
* أنا
بأقولكم وأُعلِنكم آهوه .. ( ومش بآخد
رأيكم ) .. رئيسكم القادم هو القائد الرُكن
الأمير حازم أبوإسماعيل .. وبأقولكم إيه .. غصب عنكم ، وعن اللى
خلفوكــــــــم ( لازم حَازم ) !!!
* كلها
شهر وأصدقاء وحُلفاء اليوم .. حاتلاقيهم
أتقلبوا بقدْرة قادر إلى أعداء الغد .. وأنا بأقصد الإخوان ، والسَلفيِّين ، وكل جَماعات الإسلام السِياسى .. خلاص رَاحِت
السَكرَة وجَتّ الفِكْرة .. والإنتخابات جايَّة .. وطمَع الدُنيا على الكراسى والمَناصِب
أبتدأ .. وحانشوف مَعارك ،وفضايِّح
، وتحالفات ، وحاجات كتيرة زى
الزفت .. بس أنا بأفرح لها قوى .. لأنها بتبيِّن الناس على حقيقتها ..
وياللا بَقى خللى
مُوسِم سُقوط الأقنعة يبتدى.
* مُجَرد
الكلام عن إحتمالية إستقالة فاروق العُقدَة ( مُحافِظ البنك المَركزى ) قَلَب عالم
المال والإقتصاد فوقه تحتانِى .. وماأتعدَلش لِغاية دلوقت .. مابالكُم لو إستقال
فعلاً .. ( على فِكرة هو حاول ينط من السفينة اللى مُتأكِد من غرقها .. بس الناس
اللى فوق قالواله (هأوأوأوأوأو .. يانغرق سوا يانعيش سوا ياعُقدة .. ومن غير ماحَد يعرف إن السفينة
بتغرق ياحلووو ) !!
* أنا متابع
مُرسى بتركيز من يُوم ماأستلم حُكم مِصر .. ودلوقتِ أقدر أقولك وبالفُم المَليان إن وَهج
السُلطة .. سَبق وقر المَسئوليَة !!
* أنا مُتأكِد
من نوايا الرئيس مُرسى الطيِّبة .. لكن بيشوشَر على دِماغى مُقولة ( إن الطريق إلى
جُهنم .. مَفروش بالنوايا الحَسنة ) .
* أوعى حَد
يفتكر إن هُدوء المِصريين الحَذِر بعد الإستفتاء المُزوَر هو رضا وخنوع وقبُول
بالأمر الواقع .. لأ .. وحياة
غلاوتكم ده أسمه هُدوء ماقبل العاصِفة ..
والعاصِفة المَرَّة دى حاتشيل كل الهاموش والناموس اللى عايز يمُص دَمِّنا .. وكل
يوم ثورى جديد بيتولد .. وكل يوم ثورية جديدة بتكبَر .. ومِصر فى السنتين تلاتة
اللى جايين مش حاتطلَّع إلا ثوار وثائِرات ... والثورة مُستمرة .. وأهدافها زى
ماهــى ( عِيش .. حُريَّة .. عدالة إجتماعيَّة )
بسم الله الرحمن الرحيم
" فَأَمَّا
الزَّبَدُ فَيَذْهَبُ جُفَاءً وَأَمَّا مَا يَنْفَعُ النَّاسَ فَيَمْكُثُ فِي
الْأَرْضِ ".
صدق الله
العظيم
بقلـــــم
صـــلاح إدريـــــــــس
salahedris@gmail.com
مدون بالبلــدى الفصيـــــح
تشريفكم لمدونتى يسعدنى ..
ويمتعّكم ، وقد يفيدكم
http://plackprince.blogspot.com/
ليست هناك تعليقات:
إرسال تعليق