|
بالبَلدِي الفـَصِيح ـ 13
( البَلبــــُـــــوص )
ـــــــــــــــــــــــــــــــــــــــ
ـــ إيه حِكاية الصُكوك الإسلاميَّة
دِى !.. الحِكاية ياجَماعِة الخِير إن الصُكوك دِى هىَ صُكوك مِلكيَّة ..
وأُكـَرر مِلكيَّة لِلأصُول المِصْرية .. وأُكـَرر لِلأصُول المِصْريَّة ..
ويـَقدَر أىّ حَدْ فى العَالـَم يشتري منها ! ويبقىَ شِريك فيها وبالتالى شِريك
فى الأصُول المِصْريَّة ! .. يَعني مُمْكن تِلاقي صُهيوني شِريك أو مالِك لِلنِيل
!! ويتـَحَكـَم فى شُرْبـِنا ، وزرَاعِتنا حَسْب مَزاجُه لأنه مِلكـُه
!.. ومُمْكِن تِلاقي هِندِي مالِك لِهَرَم خـَفـْرَع ! ويعمِل عليه حَوائِط ..
والدُخول بمَزاجُه وحِساباتـُه .. أو أمْريكِي يَمْلك طـَريق القاهِرَة /
الإسْكِندِريَّة الصَحْراوي ! وياخـُد الرُسوم الِلى عايزها من
المُسافِر على الطريق .. أو قـَطـَري يَمْلك قـَناة السِويس ويدَخَّل
ويخَرَّج مِنها اللي هُو عايزه وبالرسُوم الِلي يفرضْها !! .. علشان كِدَه الأزهر رَفـَض
مَشرُوع الصُكوك بإجماع هَيئِة العُلماء .. وقال إن دَه خُروج عن الشَريعَة
الإسلامية .. وعلشان كِدَه شِيخ الأزهر وعُلماؤه مش عاجْبين أصْحابنا البُعـَدَا
!! وبأقول لِصاحِب فِكـْرة الصُكوك الإسلامِيَّة دِى : والله إنتَ الِلي عاوز
تِتسِكِع على قـَفاك لِغاية مايحَبِّبْ !!!
ـــ وَلَدْ تـَرزى
مِفـَتـَّح وذكى أسمُه ( هِشام العَشرى ) .. إستطاع أن يُشهـِر نـَفسُه فى 48
ساعة فبمُجَرد ماقال إنه مُؤسِس جماعِة الأمْر بالمَعْروف والنـَهْي عن
المُنكــــــــَر ... و حايحَرَّم الخـُمُور، والسَجائر ، والجنس ، على السائِحِين
.. وللمِصْريين سَيمْنع السِينِما ، والمَسْرَح ،والمُوسِيقىَ
،والبنطـَلونات ، والشَعْر المَكشُوف على الرجال قبْل النِساء .. وأدَان الأزهَر
والشِيخ الطـَيِّب وتـَمَنَّى مُوتـُه ..وكـَلام أهْبَل من دَه كِتير..
وخِلال 24 ساعة من هذا الكلام فى جريدة الوَطن كان ضيفاً على 5 برامِج حِواريَّة
فى يُوم وَاحِد ( والبَقيَّة تأتِي ) .. ومُكافأة كُل برنامج لا تقِل عن 3000
دُولار .. وفجْأة الوَاد العَسَل دَه بقىَ مَشهُوروغـَنِي .. برَافو عليه .
ـــ توجد حَمْلة مُنظمَة
لِتشويه الأزهر وشَيخُه الطيّب .. تمهيداً لِما سَيحدُث قريباً جداً من تهْمِيش
أكتر وأكتر للأزهَر .. ثم إستبعاد لِكُل من يخالف فِكر الإخوان المُستنير من
عُلماء الأزهَر .. ثم إستلام مَقالِيد الأزهَر والسَيْر بالإسلام والمُسلمين حَسْب
فتاوى شِيُوخ الأزهر الجُدُد .. مش أنتم يامِصريين بتقولوا إن الأزهَر هو
مَرجَعِيـِّتكـُم الإسلامِيَّة الأهَم والأصْدَق .. خلاص إحنا حانتوَلىَ
أمُور الأزهَر .. أنتم زعْلانِين لِيه بَقىَ ؟
ـــ خدوا بَالكُم .. مُوسم
المُؤامَرات ، والإشَاعَات ، والخَوازيق ، ونَشْر الغسِيل الوسِخ ..
وفضِيحَة المِطـَّاهِر لِيلة خرُوجه ع المَعاش والمَشهُور بـ ( مُوسِم
الإنتخابات ) .. هَلِتْ رَوايحُه العَفِنة !!
ـــ كانت الكـُورَة وإنتصاراتها
هى الفرحَة الوَحِيدَة فى حَياة المِصريين لِسِنين طويلة .. وبعد إنتصارات الأهلى
الأخيرة إتأكدِت إنه مش مَكتوب علينا نفرح إلا فى اللعِب !!
ـــ مَذبحَة قادِمَة ضِمن
مَذابح كثيرة جايَة أسمْها مَذبحَة الإعلام .. وضَحاياها هم
الإعلاميين ، والصُحفيين ، والقنَوات المُعارضَة .. وأول القصَيدَة كـُفر ..
فهُناك 12 قضيَّة مَرفوعَة ضِد إعلامِيين ، وصُحفيين وجَرائِد ،
بتهمِة إهانة الرَئيس ، أو تكدِير الصَفـْو العام .. وكِفاية كِدَه .. وأفهمُوا
أنتـُم الباقي بَقىَ .. لإنِي مش عاوز أكـُون المُتـَهَم رقم 13 .. دَه حتى
رقم نَحْس حايوَصَلنِي للمْشنـَقـَة !! 
ـــ كـُنتـُم زعلانِين على سَلق
الدُستور .. خلاص ماتزعَلوش ... فِيه شَوْي ، وتـَحْمِير لِعَشَرات
القوانِين فى مَجلِس الشُورَى لازم تِخلص ، وتِستوي بسُرعَة ، قبل إنتخابات
مَجلِس الشَعْب .. وسِمعت إن الـ 100 عُضو اللى عَيّـنهُم مُرسى ، كان شَرْط
دِخُولهم للشورَى هو جَمْع أكبَر كِميَّة من الفـَحْم والخـَشَب لِزوم
الشَوْي السَريع ( لـَكِن الزيت مُتوفِر عند الإخوان ) .. وأى وَاحد ماشِي
جَنب مَجلِس الشُورَى يقدَر يشِم ريحَة الفحْم اللى إتوَلـَع من دِلوقتِ ..
وسَيَبْدأ الشَوْي والتحْمِير خِلال أيام .. والدَعْوَة مَفتوحَة لِكـُل الإخوان
وألادِيشْهُم .. وبَقيِّة الشَعب المِصرى مش مَدْعُو .. لـَكِن الوَعْد
إن الفـَحْم والزيت الوَالِع بعد إنتهاء الشَوْي والتـَحْمِير
حايندِلِق على دِماغـْهُم !!
ـــ كـُنا زمان خايفين من
إنقسام مِصر إلى قِسمين .. مُسلمين ومَسيحِيين .. لكن الحَمْدُلِله دِلوقتِ
إتقـَسِمت مِصر لِمِائة دَوْلة هُم : دَوْلِة القـَضَاء .. دَوْلِة
المُحاماة .. والأطِباء .. والإعلاميين ..والشُرطـَة .. ودَوْلِة حازم أبوإسماعيل
.. ودَوْلِة التـَحْرير .. ودَوْلِة الفيسْبُك .. ودَوْلِة الإنقاذ .. والعَديد من
الدُويْلات التانيَة .. والغـَريب إن كـُل دَوْلـَة بتفـَكـَّر وتـُقـَرر وتنـَفِذ
كل اللي هىَ عايزاه من غِير حَد ماينـَبهها حتى للصَح والغـَلط !! .. والأغرَب إن
مُواطِني هذه الدُويْلات بَرضُه بيعملوا اللى عايزينه فى الوَقت اللى
يناسِبهُم بحِماية وتأييد دَوْلِتهُم !!
ـــ زمان لمَّا كان وَاحد يحاول
يكذِب أو ينصُب عليك تقوله ( لِيه ياأخويا .. هو أنتَ فاكِرنِي هِندِي !! ) ..
دِلوقتِ بَقىَ .. ومن يُومِين الرَئيس الباكستاني خـَطـَب وَسَط حُشود
هائِلـَة من شَعبُه وقال : أوعِدكـُم أن نِظام الحُكم الإخواني فى مِصر لن
يُطـَبَق أبَداً فى باكِستان .. ولن نـَرضَاه لِشعبنا المُسْلِم الطـَيِّب ..
وإنتخاباتنا سَتكـُون نـَزيهَة وشَفافـَة بنسْبة 100% .. ولن تكون أبداً على
الطـَريقة المِصريَّة !!!!!!!!! آه يازمَن !! .. فِضِيحتنا وَصَلت لِلهـِند
وباكِستان .. الله يفضِحْكـُم !
ـــ الرَبيع العَربي فى
تـُونس ومِصْر واليَمَن ولِيبيَا وسُوريَا أنبَت وزَهـَّر وأثـْمَر والحَمْدُلِله
.. بَس مش عارف لِيه ثـَمَراتـُه مُرَّررررررررة ؟
ـــ بَعد تـَصْريحات العِريَان بعَودِة اليَهُود
المِصْريين لِمِصْر وأمْلاكهُم .. والأفرَاح اللي تسَبَب فِيها كـَلامُه على
الشَعْب الإسْرائِيلي الشَقِيق .. شَاف المِصُريين إسْم العِريَان شِوَيِّة
عَلِيه .. وقـَرَرُوا من هِنا ورَايْح يسَمــُّـــــــــــوه ( البِلبـُـوص ) .
***
تم نشر
مقالى الأسبوعى بجريدة ( المصرى المهاجر )* الصادرة بلوس أنجلوس ـ
كاليفورنيا ـ الولايات المتحدة الأمريكية ــ عدد السبت 5 يبناير 2012
http://www.almasry-almohager.com/Salah_Edris010513.php
بقلـــــم
صـــلاح إدريـــــــــس
salahedris@gmail.com
مدون بالبلــدى الفصيـــــح
تشريفكم لمدونتى
يسعدنى .. ويمتعّكم ، وقد يفيدكم
http://plackprince.blogspot.com/
ليست هناك تعليقات:
إرسال تعليق