نقووول طور .. يقولوا أحلبوووه !!
بقالنا عشرات السنين بنكتب ، ونقول ، لغاية
لساننا ماأتدلدل ، ونشف .. ياأخوانا .. يادولة .. لو عايزين تِحموا ، وتأمنوا سيناء بحق يبقى تعمروها ، وتملوها بالناس ، وده
مش حايحصل إلا بتشجيع الشباب على ترك المدن ، والذهاب ‘إلى سيناء ، و نوفر لهم أعمال ، وشقق ، ومدارس ، ورعاية
صحية ، وأجتماعية .
لكن اللى حاصل هو العكس تماما ، فقد عقّدوها أكتر ، بشروط الحصول على شقة للشباب ، بعد ماكانت التأمينات المطلوبة لمدة 3 سنين ، خلوها 15 سنة !! وكمان البطاقه تكون من
15 سنة إقامة بجنوب سيناء .. يعنى شاب
عنده 24 ــ 30 سنة يبقى عنده بطاقة فى جنوب
سيناء إزاى من 15 سنة .. وشروط كتيرة
تعجيزية ، ده غير إرتفاع إيجار المحلات
بصورة مبالغ فيها ، ومطالبة البنوك للقروض الصغيرة ، وعداد الفوائد شغّال على ودنه
.. والكل عارف أن سيناء والسياحة كلها
بقالها 5 سنين بتشحت ومش لاقيين ياكلوا !! يبقوا حايسددوا منين ؟ لا
الدولة بتساعد !! ولا حتى رجال الأعمال مُلاك المولات والمحلات بيساعدوا !!
وفى الوسط ببنطحن ، ويتفعص ،الشباب
الغلابة اللى طالع ميتين أبوهم !!
فكانت النتيجة الطبيعية هى الهجرة للخلف ،
وكله بيتك .. بيتك ، كل واحد يرجع محافظته
أو قريته !! ونسيب سيناء صحراء واسعة ، أوفاضية
علشان الأرهاب يعمل فيها مابدا له !!
تصدقوا أن
جنوب سيناء بمدنها الثمانية عدد سكانها مايزيدش عن 450 ألف نسمة !! يعنى أقل من نص مليون فى الـ 8 مدن .. يعنى
ربع عدد سكان حى صغير بالقاهرة !!
والكلام فى هذه المواضيع طويل ومتشعب ، والمسئوليه كبيرة ومتوزعه على كل أجهزة
الدولة .. لكن أحنا النهاردةعايزين نتكلم عن مشكلة جديدة قديمة ، فكل كام سنة
يطلع واحد ماأعرفش من الداخلية ،ولا المحليات ،يقولك عربيات النصف نقل لازم
تمشى .. وأسمحوا لى أن أتكلم هنا تحديدا عن مدينة دهب .. فمنذ عشرات السنين
وسيارات النصف نقل بتعمل فى نقل الركاب المصريين والأجانب .. وكل الأجانب بلا أستثناء يفضلون ركوب النصف
نقل وفى الصندوق الخلقى كمان !! عن أى سيارة أخرى ! بيلاقوها ممتعة ، وجديدة عليهم
، ( زى مرسى مطروح زمان )..المهم أنهم بيحبوها وعايزينها .. ولكن الدولة كل كام
سنة يطلعوا يلموا العربيات ، ويعملوا مخالفات ويحجزوا العربيات لمدد طويلة
، وبعد كلام وخد وهات يقتنعوا ويفرجوا
عن العربيات ،بعد مايكونوا دفعوهم الآلاف من الجنيهات ،
وخسروهم برضه الآلاف بسبب الرَكنة ، والسواقين أصلا معاهمش يدفعوا الأقساط ، ولا حتى
ياكلوا ويسكنوا لأن السياجة بحّ ، والشغل
معدوم !!..
المهم اليومين دوول رجعت ريمه لعادتها
القديمة .. وبقالهم أسبوعين دلوقت بيمسكوا
عربيات النصف نقل ، واللى يتمسك ومعاه راكب واحد بيدفع 2500 جنيه مخالفة ، وتتحجز عربيته فى جراج مجلس المدينة فى
الشمس ، لغاية ماتبقى خردة ويبان لها صاحب
!! يعنى موت ، وخراب ديار !!
السلطات بتقول أن النصف نقل هى للنقل ،وخطر
ركوب الناس فى الصندوق .. ماشى ياباشا وكلامكم على عيننا وراسنا .. طيب أيه العمل فى رأيك ؟ يقولك الناس تركب التاكسيات المتوفرة
بالمدينة !! وهنا بقى لازم أقول وأوضح أن عدد التاكسيات الموجودة بدهب الآن
لاتتعدى الـ 15 سيارة .. فى حين أن سيارات النصف نقل أزيد من الـ 350 سيارة .. دى
حاجة .. والحاجة التانية أن سيارات التاكسى بتمشى بالبنزين الغالى ، وبناءا
عليه التسعيرة مابتقلش عن 10 جنيه وطالع !! والنصف نقل ممكن 2 أو 3 جنيه بالكتير ياخدك
لأى مكان !!! ..أدونى عقلكم أنتم بقى !!
يبقى الحل هنا حاجة من أتنين ياإما توفروا
سيارات تاكسى كتيرة ورخيصة ،علشان تسد عجز النصف نقل اللى
سواقينها وعائلاتهم وعربياتهم حاتسيب البلد !! ( علما أن المحافظة موقفة أى تراخبص سيارات
تاكسى جديدة !!! ) .. وياريت تخلصونا وتعلنوها
رسميا أنكم مش عايزين حد فى سيناء ..
وقالهالى النهاردة سواق ووجعتنى جدا ، قاللى بالحرف (( والله العظيم الدولة
عايزانا نمشى ونسيب البلد )) !! يادولة حرام عليكم .. أرحموا من فى الأرض ،يرحمكم
من فى السماء .. ولازم تبصوا للأمر من كل الزوايا ، وماتبقاش نظرتنا واحدة وقديمة ،
وبتضر أكتر مابتنفع .. هو أحنا حانفضل كده على طووول ، مافيش أى تفكير فى أى قرار
.. وكل اللى بيحصل ييجى موظف كبير
شوية وينفخ فى النار ( لمصلحته أو مصلحة
غيره ) نقوم أحنا كلنا ونساعده ، وننفذ له
تعليماته من غير تفكير .. والله العظيم البلد دى مش ناقصها غير عقل ، لأننا كده
كلنا رايحيين مستشفى المجانين عِدل .. قولوا آمين !!
بقلـــــــــــــــــــم
صـــلاح إدريـــــــــس
تم نشر المقال بجريدة الوطن الجمعة 6 نوفمبر 2015
http://alwatneg.org/article/4007/%D9%86%D9%82%D9%88%D9%88%D9%88%D9%84_%D8%B7%D9%88%D8%B1_.._%D9%8A%D9%82%D9%88%D9%84%D9%88%D8%A7_%D8%A3%D8%AD%D9%84%D8%A8%D9%88%D9%88%D9%88%D9%87_!!
ليست هناك تعليقات:
إرسال تعليق