بالبلدى الفصيح

 إمتى تتجوزوا ؟؟

ــــــــــــــــــــــــــــــــــــــــــــــــ

اتجوزي لما تحسي إنك ممكن تصحي من أحلى نومة في عز البرد عشان تعمليله كوباية شاي ، وانتي مبسوطة  ، مش وانتي بتقولي بالسم الهاري!!.. اتجوزي لما تلاقي نفسك تقدري تستحملي عصبيته وتكشيرته .. اتجوزي لما تلاقي نفسك عايزة تخرجي وتمنعي نفسك من الخروج عشان تقعدي معاه.. اتجوزي لما تحسي إنك تقدري تضحكي على نُكتُه البايخة ، وتلاقيها تعجبك .. أتجوزى لما تلاقي نفسك مختلفة معاه في الرأي ، بس مش عايزة تعبري عن رأيك عشان ماتضايقيهوش ..  أتجوزى لما تلاقي نفسك مستعدة تضحي بشغلك عشان تقعدي في البيت تريحيه ، أو تسافري معاه لمكان بعيد .. أتجوزى لما تحسي إنك ممكن تطلعي من بيت أهلك اللي عشتي فيه مش أقل من 20 سنة عشان تعيشي معاه .. أتجوزى لما تحسي إنك قادرة تستحمليه .. أتجوزى 

لما تحسي إنك قادرة تتنازلي عن جزء  من أحلامك وطموحاتك ــ أو حتى كلها ــ عشان تبسطيه

أما أنت عزيزي الشاب  

اتجوز لما تحس إنها تكفيك عن كل ستات الدنيا..

 أتجوز لما تحس إن أكلها حلو ، ومش لازم يكون زي أكل مامتك.. أتجوز لما  تقدر تهزر معاها زي أختك.. اتجوز لما تكون شايفها حلوة ، حتى لو معووجة ،ومرهقة ،وهلكانة وبرضه تشوفها حلوة  أكتر من اى واحدة تانية  .. اتجوز       لما تلاقيها راجعة معفرة ومجفرة  ، لكن برضه تقدر تحكيلها أسرارك ومتاعبك .. اتجوز لما تحس إنك تقدر تستحملها في حالات اكتئابها ، ونكدها ، وزعلها ..  

 اتجوز لما تلاقي نفسك مش فارقة معاك هيه طويلة ، واللا قصيرة، واللا تخينة ،واللا رفيعة، واللامنكوشة ..واللا

 مسرحة ..اتجوز لما تحس إنك تقدر تستحمل رغيها  ، ولكَّها  ،وصداعها .. حتى لو كانت بتحكيلك عن خط سير عفاف زميلتها ، من أول ماتصحى من النوم ، لحد ماتنام بالليل

اتجوز لما تستحمل غيرتها.. وصوتها العالي ، ونرفزتها....

اتجوز لما تقدر تشاركها أحلامها ،وتساعدها فى  تحقيقها ، وتشوف أن نجاحها من نجاحك .. 

اتجوز لما تلاقي نفسك خايف عليها  ،وبتخاف تجرحها أو تأذيها .. 

من الأخر .. اتجوزوا لما تلاقوا روح تستريحولها ..

 قال رسول عليه الصلاة والسلام: (( الأَرْوَاحُ جُنُودٌ مُجَنَّدَةٌ ، مَا تَعَارَفَ مِنْهَا ائْتَلَفَ ، وَمَا تَنَاكَرَ مِنْهَا اخْتَلَفَ ))

بعد ما فكرت في كل ده لقيت إجابة سؤال (اتجوز ليه؟)

اتجوز عشان تزيد أسباب سعادتي .. الجواز من وجهة نظري وسيلة لتحقيق السعادة ..مش هدف ....

 الجواز سكة سفر لازم نسافر فيها  ،واحنا مطمنيين ومستريحين .. عشان محدش يقدر يرجع المسافة اللي مشيها من أول وجديد .. ولوحده !!

مش عارف ليه بعد ماكتبت كل ده حسيت أن محدش حايتجوز !! ولا أنت أيه رأيك ؟

*****

( كلام عجبنى ــ مع بعض تعديلاتى وإضافاتى )