هو فيه أيه ياجدعااااااان؟

هو فيه أيه  ياجدعااااااااان ؟؟

عارفين أكتر تلاتة محيرينى فى الدنيا مين ؟

الرئيس السيسى ... ومصطفى مدبولى رئيس الوزراء .. وهالة زايد وزيرة الصحة !!

العالم كله مقلوب فوقه تحتانى .. والحاج ترامب ( أبوحنان ) جايب دجالين من المغرب يبخروه ويعزّموا عليه .. والطليان بيرموا الفلوس من البلكونات .. وماليين بيها الشوارع !!  لأنها مالهاش لازمة .. وبيصلوا مع المسلمين فى الشوارع  ( مع أنهم مش عارفينهم بيقولوا أيه .. بس نوع من الأيمان والثقة فى صحة عقيدتهم) .. و غليان كتير حول العالم كله !!

وأحنا ولا أحنا هنا !! .. الرئيس السيسى طلعلنا هادىء جدا جدا  أكتر من المعتاد  !!  والثقة والطمـأنينة فى صوته وملامحه  .. وكمان رئيس الوزراء  على طول متشيك ومتأنق  وبرضه هادىء جدا ..وكل كلماته وتوجيهاته محسوبة .. والدولة كلها الحقيقة  بتتعامل وكأن مفيش حاجة خالص!! .. فالشرطة كل يوم بتقبض على تجار مخدرات ..ومهربين ..ومخالفين ..وترجع عربيات مسروقة  ..وتمسك حرامية التيار الكهربائى ..والمطلوبين فى تنفيذ الأحكام .. وأى متعدى على أراضى الدولة  .. واللى بيبنى مخالف وفاكرها ميغة زى زمان !!

ياراجل دى كمية الجرائم والضبطيات فى التلات شهور دوول أكتر من أى وقت تانى !!!!

أما وزيرة الصحة بقى دى حكايتها حكاية .. راحت الصين فى عز الأزمة  وزارت ( يوهان ) اللى تفشى فيها الفيروس للعالم كله !!.. ومن غير ماتلبس كمامة ولا جوانتى ..وأبتسامتها مالية وشها .. ومن يومين راحت إيطاليا  مع وفد أطباء عسكرى على أعلى مستوى .. وقدمت لهم مساعدات من كمامات وجوانتيات واجهزة تنفس .. وغيرها من الحاجات اللى كانوا محتاجينها فعلا .. والأتحاد الأوربى بجلالة قدره قالهم اللى يعوزه البيت يحرم ع الجامع !!.. ولم يساعدهم بكمامة واحدة .. وبرضه كل الوزراء الأيطاليين  لابسين الجوانتيات والكمامات ..والرعب على وشوشوهم .. ووزيرتنا الهمامة مش لابسة كمامة  ولا حتى جوانتى وأبتسامتها من الودن دى للودن دى !!! ..وكأنها فى زيارة ترفيهية للجنوب الأيطالى الجميل !!!

هو فيه أيه ( بصوت القرموطى ) ؟؟

الصين بعد زيارة الوزيرة بدأت تتعافى والحمدلله  والنتائج مبهرة !!!!

وإيطاليا حانعرف النتائج النهاردة وبكرة وبعده !!

والكلام اللى فى المطبخ الصحفى أن الوزيرة حاتروح ألمانيا وبعدها أسبانيا .. وحاتاخد معاها ضحكتها الحلوة طبعا !!

والغريبة بقى أن كل ده بيحصل  ومصر بتوزع المعونات الطبية بكميات كبيرة جدا يمين وشمال .. فى الوقت اللى فيه أمريكا وأوروبا وتركيا بيسرقوا أى معونات طبية تمر بأراضيهم وموانيهم لأى دولة تانية تكون محتاجاها !!! ..واللى ناس كتير ماتعرفوش أن مصر بدون دوشة ولا دعاية أرسلت إعانات طبية كاملة  للسعودية والأمارات وسوريا واليمن وغزة والسودان ..والحقيقة مش عارف فيه دول تانية ولا لأ ؟

كل مخابرات العالم وعلى رأسهم أمريكا حايتجننوا ,, ومش عارفين أيه الحكاية .. والحاج أبوحنان حاول ينكش السيسى ويعرف منه الحكاية .. لكن السيسى رجل مخابرات دوقرم وراسى  ..وأبوحنان ماعرفش يطلع منه بجملة مفيدة !!

المطبخ الصحفى والأعلامى فى مصر وفى دول الخليح خاصة ..والعالم كله عامة  بيتهامس ويقول أن مصر عندها علاج الكورونا .. واللى حصل فى الصين وحايحصل فى إيطاليا  وألمانيا وأسبانيا  ..هى تجارب فعليه تتم بهدوء على أرض الواقع .. وأن نجاحها والأعلان عنها مصر سايباه للدول الكبيرة تقوله بنفسها .. بس فى الوقت اللى مصر تحدده !!!!

عايزكوا تتخيلوا حجم المكاسب اللى  حاتعود على مصر لو الكلام ده صح .. ومااقصدش المكاسب المادية ..ولكن مكاسب معنوية .. للسيادة ..والقوة .. والأنسانية .. والريادة اللى مصر قادتها طوال تاريخها القديم والحديث ..وتأكيد أن مصر أم الحضارات وأم الدنيا ..وحاتكون أدد الدنيا .

 أدعوا معايا أن تكون الحكاية حقيقية زى ما الكل بيؤكد .. آآآآآآآآمين يااااااارب .

بقلـــــــــــــــــــم

صــــــــلاح إدريــــــــــس

Salahedris@gmail.com

ألحقيتى ياامة .. عطينى وصوتى !!!

ألحقينى ياأمه .. غطينى وصوّتى !!

فلوسك فى البنك أو تحت البلاطة .. هدومك البرندات الغالية متكدسة فوق بعضها فى الدولاب .. عربيتك مفولة بنزين 95 وواقفة مستنياك  زى العروسة  أمام البيت ..والجزم أشكال وألوان فى الجزامة الشيك اللى على المدخل .. وطبعا الأكل مالى التلاجة أشكال وألوان .. وموبايلك الحديث جدا مليان رصيد وزى الفل !!!

الله  الله .. أومال فيه أيه ؟ .. مالك مش مبسوط ..ولا مرتاح ؟  ومش على بعضك علشان الفلوس مالهاش  !! والهدوم مفيش نفس تلبسهم .. والأكل خلاص مابقاش ينزل المعدة !! والتليفون مفيش نِفس تكلم أى حد  .. لآن اللى حاتكلمه حايزود همومك ومشاكلك وأنت مش ناقص ..

عارف ليه ؟  علشان أنت كل اللى يهمك دلوقت سلامتك أولا .. ثم سلامة أهلك وحبايبك .. حتى لو كل اللى تملكه راح فى ستين داهية !!..

دلوقت بس  أنت عرفت .. والناس كلها عرفت أنه لا الفلوس ولا الهدوم ولا أى حاجة تفرق معاك .. المهم سلامتك وأمانك !!

وخللى بالك ماتسمعش الكلام بتاع أن ربنا بيعاقبنا .. ربنا مش بيعاقبنا ولا حاجة  .. لأنه اللى خالقنا ..وعارفنا كويس قوى .. هو بس بيقرص وداننا .. وبيشاور لنا على الصح والغلط .. وبيدينا دُش جامد علشان نقوق من الغفلة اللى أحنا فيها !!.. وبيعرفك أنه مهما كان عندك فلوس .. وقصور وكماليات ماتتعدش .. ييجى مخلوق ضعيف جدا جدا أقل من البعوضة .. شقلب كيانك كله ..وخلاك ماتِفرِقش بينك وبين أفقر واحد فى الدنيا .. وعمّال تصوت وتولول وتقول : ألحقينى ياأمه .. وغطينى وصوّتى !!

   لكن أوعى تنسى أن العقاب الحقيقى حايكون فى الآخرة  بقى ..وربنا يعطيكم طولة العمر .. وقتها حايكون الحساب الحق العادل .. من الحق العدل سبحانه .. بس يارب تكون فهمت كويس  وأتعظت .. وناوى تغير من أسلوب حياتك ,,واتأكدت  أن هناك رب عادل رحمن رحيم .. وأيضا عليم خبير ومنتقم جبار .. دلوقت  تقدر تقول ياحلو  : راحت السَكرة .. وجتّ الفِكرة !!

اللهم أحسن ختامنا جميعا ياكريم

 ))إِنَّ اللَّهَ لَا يَسْتَحْيِي أَن يَضْرِبَ مَثَلًا مَّا بَعُوضَةً فَمَا فَوْقَهَا ۚ .. فَأَمَّا الَّذِينَ آمَنُوا فَيَعْلَمُونَ أَنَّهُ الْحَقُّ مِن رَّبِّهِمْ ۖ..  وَأَمَّا الَّذِينَ كَفَرُوا فَيَقُولُونَ مَاذَا أَرَادَ اللَّهُ بِهَٰذَا مَثَلًا ۘ .. يُضِلُّ بِهِ كَثِيرًا وَيَهْدِي بِهِ كَثِيرًا ۚ وَمَا يُضِلُّ بِهِ إِلَّا الْفَاسِقِينَ ))

بقلـــــــــــــــــــم

صــــــــلاح إدريـــــــــــــــــس

Salaherdris@gmail.com

https://www.facebook.com/photo.php?fbid=2829362543810745&set=a.602514186495603&type=3&eid=ARC81T4ajH39igM6ucvi4ST9IV_2UgGCNBpnvsGOj_8dRzhUxiGxNntZSfDVG0GeXGXXzJ33DBdYBbl6

أتفاق الذئاب والكلاب !!

أتفاق الذئاب والكلاب !!

ــــــــــــــــــــــــــــــــــــــــــــــــــ

الليلة او بكرة بالكتير سيتم تنفيذ الآتفاق بين الذئاب والكلاب والخنازير على أحتلال الجزء الشمالى من سوريا   .. وحنى الآن تم أجتياح وأحتلال 11 قرية سورية بمساحة تتعدى الـ 100 كيلومتر ,, وعاد السوريين مجددا للنزوح من بيوتهم وأراضيهم بعدما قتل منهم وأصيب العشرات .. وقد بدأ منذ قليل الهجوم التركى  بالدبابات والسيارات المصفحة والمشاة ..  والزحف مستمر لآحتلال اكبر مساحة ممكنة . بحجة تكوين ملجأ آمن للأرهابيين الدواعش .. وتجميع كل أشكال وأنواع الآرهابيين  المهاحرين من تركيا وغيرها  لمنطقة محددة ومعروفة ومراقبة ومعزولة من وجهة نظرهم الغبية .. وأعتقد أن الذئاب والخنازير فى الدول الكبرى موافقون بالثُلث!!  حرصا على أمنهم ..   والذى  هددهم  به قردوغان بإإطلاق الآرهابيين  إلى دولهم  لو أعترضوا على خططه وضربه سوريا يالطائرات من فجر اليوم تمهيدا لآحتلال كامل الآرض التى يريدها !!

رغم أن العالم كله يدين الهجوم والآحتلال بصورة علنية .. لكن أستمرار هجوم القردوغان فى خططه .. مالوش غير تفسير  واحد هو حصوله على الضوء الآخضر  من الجميع ومجرد التعبير بالشجب والآعتراض ماهى إلا صورة يصدرها الخنازير لشعوبهم  .. والغريبة أن الدولة الوحيدة الموافقة رسميا وعلنيا بكل بجاحة ووساخة وقلة أدب هى دويلة قطر !!! ..

وأخيرا أؤكد أن اللى يربى تعبان فى بيته ويرعاه  سيأتى يوما ليلدغه لدغة قاتلة تقضى عليه .. والآيام بيننا ..

أما الحديث عن الحمل الوديع  ( الرئيس والحكومة السورية ) ..  يجاهدون ويدافعون  حسب إمكانياتهم ولكنهم ىــ للأسف ــــ لايسنطيع الحملان  شيئا أمام هذه الوحوش الكاسرة المتعطشة للدماء ..

والسؤال الآهم بقى .. ياترى العرب حايعملوا أيه؟ .  ولا حايستنكروا .. ويشجبوا كالعادة  ,, ويكتفوا بذلك لغاية ماييجى الدور عليهم ..والدور جاى جا  لو لم تكن هناك وقفة صارمة وحازمة وقوية !!

وإننا لهنا منتظرون !!

بقلـــــــــم

صــــــلاح إدريـــــــــس

بلد الثورات تعزف سيمفونية ثورية جديدة  .

         زمان كان يقال على السودان ( اللى يصحى بدرى ..هو اللى يحكم ).. والسبب أن السودان كانت أكثر دول العالم زخما  بالثورات !!

        بدءا من  ثورة أكتوبر في سنة 1964 ضد نظام الرئيس السوداني الراحل الفريق إبراهيم عبود مطيحةً بنظامه . 

         ثم قامت ثورة أو انتفاضة أبريل في 6/4/1985 ضد نظام الرئيس السوداني الراحل، جعفر نميري .. وكانت أول ثورة شعبية فى افريقيا والعالم العربي

              وبعدها اندلعت انتفاضة سبتمبر في سنة 2013 ..  ومايحدث فى السودان الآن هو إمتداد لانتفاضة سبتمبر 2018 .. بعد أيام من انعدام الوقود  ، وشح في العملة النقدية المحلية ، والارتفاع الشديد لسعر الدولار مقابل الجنيه السوداني .

       وبين كل ثورة وأخرى كانت هناك أنتفاضات .. وإنقلابات .. فشعب الثورات لم يكن يرضى بالحرية والعدل بديلا .

            والثورة الحالية تسير على خطى كل ثورات الربيع العربى الأخيرة .. فالثوار فى الميادين السودانية بالملايين .. وفى ميادين العالم بالآلاف .. والفنانون والمثقفون السودانيون نزلوا والتحموا بالجماهير يلهبونهم حماسا ..وعزة .. وكرامة .

           والجميع يتغنون بأغنيات ثورية قابعة فى قلوب السودانيين .. للفنانين محمد وردى ،  وحَمِدّ الريح .. ، ومحمد الآمين وغيرهم .. والهتافات فى الشوارع : سلمية .. سلمية ....و أغنية ( جبشنا ياجيش الهنا .. ياحارس مالنا ودمنا ) .. تأكيدا لآنحياز الجيش للشعب فى ثورته .

      عمر البشير حكم السودان ثلاثون عاما .. شاركه فى بداية حكمه الزعيم الأخوانى الراحل حسن الترابى .. ثم أنقلب البشير عليه طمعا فى السلطة ..وليس رفضا للأسلام السياسى الذى يخدم مصالحه .

        ولآن الشعب السودانى مثقف وواعى وقارىء جيد للتاريخ الأسلامى .. فقد تيقن أنه لايوجد شىء أسمه ( الحكم الآسلامى ) ,, فكل المحاولات لإقامة حكم إسلامى منذ وفاة الرسول ــ صلى الله عليه وسلم ــ  وحتى الآن باءت بالفشل ..وكانت نتائجها مئات الآلاف من القتلى ..وبحور لاتنضب من الدماء .. فالديانه طهارة ..والسياسة نجاسة .. ولا يمكن أن تجتمع الطهارة مع النجاسة .. والتاريخ الآسلامى بكُتبه ومراجعه شاهدا على ذلك .

        ولابد لثوار السودان أن يعوُا  ذلك جيدا .. وينتبهوا لكل الحركات الآسلامية التى تسعى لركوب الثورة وسرقتها بكل الطرق .. بدءا من المسكنة ..والتقرب ..والحديث بأسم الآسلام ..  مرورا باستخدام الآموال المتلتلة التى تصلهم من الخارج .. وانتهاءا بالوقيعة بين الثوار والجيش بقتل الثوار فى الظلام برصاص مدنى من ميليشياتهم ..ولكن  مكتوب عليه عسكرى .. لإحداث الفوضى ..والتشكك .. والبلبلة .

      وستظهر وجوه سياسية ودينية قديمة ..وجديدة .. هدفها الوحيد هو مصالحها فقط ..وليس مصلحة الوطن

      السودانيون الآن  يعيشون أجمل أيام حياتهم .. يتغنون فى الشوارع أغانى جماعية على العود والدف .. يتقاسمون اللقمة  ،ومعها الآحلام ، والأمنيات الثورية .. ورغم تلاحم الملايين فى كل ميادين السودان .. إلا أنه لم تُسجل  أى مشاجرات .. ولا تحرشات ..ولا سرقات .. فقد تحولت السودان بقضل ثورتها إلى المدينة الفاضلة ..كما حدث مع كل ثورات الربيع العربى ــ فى بداياتها ـــ وندعو الله ألا تتحول نهايتها  كنهاية كل ثورات الربيع العربى ( بلا أستثناء )!!!.

       أنتبهوا  ياأهلى بالسودان .. ثورتكم النبيلة أمامها خياران لا ثالث لهما .. إما التقدم بالسودان إلى الآمام ، إلى الحرية ، والعدل ، والتنمية .. أو العودة إلى عهود الظلام ، والعبودية ، والقهر ..ووقتها لن تقوم للسودان قائمة بعدها أبدا !!

بقلــــــــــــــم

صـــــلاح إدريــــــس

تم نشر المقال بجريدة ( الوطن ).. عدد الآربعاء 10 أبريل 2019

http://alwatneg.org/tfr/2939

اللى مايشوفش م الغُربال يبقى أعمى !!

الكلام النهاردة بمناسبة الحوار المجتمعى حول تعديلات الدستور .. واللى حايتحول أهم قراراته لمجلس النواب لمناقشتها والموافقة أو عدم الموافقة عليها ..وبعدها سيتم الأستفتاء الشعبى الرسمى على هذه التعديلات !!

كتير من أصحابى اللى كنت معاهم معارضا لكل العهود الماضية .. زعلانين منى لآنى لم أعد معارضا الآن .. وكأن المعارضة صفة شخصية .. وليست حالة !!

أيوه أنا كنت معارض لما كانت كل حاجة ــ بلا أستثناء ــ سيئة .. حاضرنا كنا بنعيشه يوم بيوم .. والمستقبل مبهم وغير واضح .!!

أنا فكرت أعدد لكم إيجابيات وسلبيات السيسى فى قائمة واحدة .. لقيتنى محتاج عدة مقالات لحجم الإيجابيات الضخم ..والسلبيات البسيطة ( والتى يتم حلها أولا بأول ) .. ولما راجعت الإيجابيات بره وجوه .. لقيت أننا كلنا ( مؤيد ومعارض ) .. شايفينها ..وحاسينها كويس قوى .. وعارفين إن اللى حصل وبيحصل فى مصر فى الأربع سنين اللى فاتت هو معحزة بكل المقاييس .. وده مش كلامى .. ده كلام كبرى المؤسسات المالية والأقتصادية فى العالم.. وأصبحت مصر قدوة ومثل يُحتذى للدول اللى عايزه تنمو .. مصر يااخواننا بتكير .. وتخلصت من عجز الموازنة .. وحققت فائض محترم بيتزايد كل يوم .. والغريبة أنها بتبنى ، وتعمر ـ وتشق طرق ـ وتقيم مشروعات عملاقة .. وعلشان محدش يقول الناس مش لاقية تاكل .. صدرت القرارات بتحسين الآجور والمعاشات .. واللى مش عاجبه القرارات دى .. وطمعه وطفاسته مخلياه عايز أكتر وأكتر .. بنقوله اهدى على نفسك وبلدك شوية ياعم الحاج .. دى نواية تسند الزير .. واللى جاى أحسن بإذن الله وعونه .

وكلنا بقينا شايفين النور اللى أبتدى يبان فى آخر النفق المظلم اللى كنا فيه !!

يبقى لازم أقول لشوية الآرهابيين والكولجية والعصابات اللى بيهاجموا مصر والسيسى عاطل على باطل .. وبيشّهروا بالبلد .. وبيروجوا الآشاعات كل يوم ، وعن كل حاجة !! وحايبتدوا يلكوا .. ويعجنوا ..وبهجصوا ..على مواقع التواصل بكلامهم الخايب اللى لا بيودى ولا يجيب .. ولا حتى يشترى زمارة لعيل .. بأقولهم لو حضرتك معترض ومش موافق ، يبقى تنزل تقول رأيك فى الأستفناء .. ونشوف عددكم كلكم على بعضكم كام ؟ .. ومش حاتطلعوا أكتر من 20% .. وساعتها ياريت تحطوا لسانكوا جوا بُقكم ..ومانسملعكمش صوت تانى !!

عارفين ياأهل مصر الطيبين الحكاية فى كلمتين أيه ؟؟.. زى مايكون عندك قزازة كولا .. والقزازة أترجت كتير ، وأتمخمصت كتير قوى .. من الآرهابيين .. والكولجية .. والمصلحجية .. ولو أنت فتحت القزازة وهى كده يبقى ياحلو حاتغرّق نفسك وهدومك .. وحاتتبهدل آخر بهدلة .. لكن لو سبتها شوية لغاية ماتهدى وتركز.. والغطاء مقفول عليها عمرك ماحاتتبهدل .. والسيسى هو الغطاء بتاع القزازة اللى لازم نحتفظ بيه مُحكم الغلق على القزازة .. علشان نحافظ على بلدنا من مصير لايعلمه إلا الله .

ولو أنت بقى مش شايف ولا حاسس ولا لامس التحسن والخير اللى بيحصل فى بلدك .. تبقى ــ لامؤاخذة ــ البعيد أعمى !!!

بقلــــــــــــــم

صـــــــلاح إدريــــــــــــــس

تم النشر (بجريدة الوطن) .. عدد السبت 6 أبريل 2019

http://alwatneg.org/tfr/2935

بتحسسوا ليه ؟

بتحسسوا ليه ؟

ــــــــــــــــــــــــــــــــ

           والنبى تخليكوا معايا شوية .. علشان أنا محتار فينا أحنا المصريين .. وعلشان الموضوع ده حايبقى هو أهم موضوع  على الساحة الأيام الجاية !!

الحكاية ياسادة أن الدستور بيقول علشان نغيره أو نغير أى بند فيه لابد من : إما طلب من رئيس الجمهورية .. أو طلب من  خُمس أعضاء مجلس النواب.. وفيه نقاش طويل من شهور بين أعضاء البرلمان على ضرورة تغيير بعض المواد ، وتعديل أخرى ..   والنهاردة الأحد 3 فيراير وافقت اللجنة العامة على المذكرة المقدمة من حوالى 150 عضوا تقريبا يمثلون خمس المجلس .. ويقال أن العدد زاد لـ 250 عضو.

والنواب بيقولوا عن البنود اللى عايزة تتعير .. أنهم عايزين يزودوا  كوتة المرأة ويثبتوها ..وكوتة  لفئات أخرى زى الأحتياجات الخاصة ..والمسيحيين والفلاحين وغيرهم ..  .. وتعيين نائب للرئيس .. وفى الآخر أن تصبح المدد الرئاسية مرتين ..وكل مرة 6

سنوات مش 4 زى ماهو حاصل دلوقت !!                               حلو لغابة كده لكن اللى مش حلو بقى إن كل الجرائد .. وكل المواقع .. وكل الفضائيات بيتكلموا عن هذا الموضوع بشويش خاااااالص .. ليه ؟ علشان مايتقالش إن الغرض الحقيقى لتغيير الدستور هو الأبقاء على الرئيس السيسى لآطول فترة ممكنة !!

آآآآآآه هو كده بقى !! وأيه المشكلة ؟ .. 75% من المصريين على الأقل عايزين السيسى يقعد مدة أطول .. أيوة أحنا شايفين أنه راجل وطنى ..وعنده رؤية مستقبلية .. ونشلنا من البص تحت رجلينا ..يمكن النتائج لسه مش ملموسة فى أيدين الناس .. لكن الغريبة أن كل الناس عارفه وشايفه المستقبل .. بس برضه طمعانة فى شوية راحة دلوقت آهوه .

         والأغرب أن الأعلام عارف الهدف الأساسى من تغيير الدستور .. وكل المصريين  عارفين  برضو .. والعالم كله عارف على فكرة !! يبقى أنتم عاملين حساب مين ؟ لو على البُعدا  اللى بيحاربوا مصر بره وجوه  .. فى ستين خرارة .. ونشد عليهم السيفون ونلحقهم بجردلين ميه كمان !!

طبعا الكلام كتيييييييييييير فى  حكاية  التغيير والرئاسة وماحولهما .. وضرورى حانتكلم فيه .. بس دلوقت كلامى للأعلام : أنتوا بتحسسوا على الكلام ليه ؟

بقلـــــــــــــم

صــــــــــــــــلاح إدريــــــــــــــــس

تم النشر بجريدة ( الوطن ) عدد الأخد 3 فبراير 2019

http://alwatneg.org/tfr/2898

فكرونـــــــــــــــــــــــــــــــــــــــــــــــى

فكـــــــــــــــــــــرونى !!

ـــــــــــــــــــــــــــــــــــــــــــــــــ

لما بتيجى ذكرى 25 يناير ,, مابأقتكرش غير :

ـــ   الـ 18 يوم الأولى ,,

ــــ  الحب ..والأحترام .. والأخوة الحقيقية بين الملايين فى كل ميادين مصر .

ـــ   فرحتى وأنا بأقرأ وأشوف الصدى العالمى للثورة .. ووصغنا باننا (أحفاد القراعنة) .. وثورتنا هى (الثورة الضاحكة)..  من كثرة السخرية والنكت  على كل أحداثها .

ـــ   مابنساش أنه رغم ألتحام الملايين فى الميادين .. إلا أنه لم تسجل حالة سرقة واحدة .. أو تحرش واحدة .. أو حتى مشادة كلامية لآى سبب !!

ـــ  ومش ممكن أنسى الأمل اللى شفته فى العيون والقلوب  بين المتظاهرين .. و مشاهدي التليفزيونات !!

ــــ  وأكتر حاجة ماتتنسيش .. همه الشهداء من الشباب اللى زى الورد .. أغتالتهم أيادى غادرة قذرة .. وكل جريمتهم أنهم حلموا وتمنوا الخير لبلدهم وأهلهم .

كل الأحداث اللى حصلت بعد تنحى مبارك .. مالهاش أى دعوة بالثورة ..ولا بالشباب النقى الذى شارك فيها بوطنية وعفوية ورغبة حقيقية فى التغيير .

ثورة يناير فى رأيى همه الــ 18 يوم الأولى ..وخلاص !!!

بقلــــــــــــــــــم

صــــــــــــــــلاح إدريـــــــــــــــــــــــس

تم نشر المقال بجريدة ( الوطن ) عدد الجمعة 25 يناير

http://alwatneg.org/tfr/2893