يارب ياكنز الغلابة
أنا كنت من أشد المعجبين بالشاعر الدكتور / صلاح
عبدالله ..حين كان مليان بالوطنية الحقيقية .. ومن سنتين تقريبا أتقلب مرة واحدة
مش عارف ليه ؟ .. وأصبح إعجابى به مقتصرا على أشعار الحب والأجتماع .. لكن السياسى لم أعد أقرأه.. بعدما أصبح له إتجاهات مختلفة ..ولقاءات على الجزيرة
ومكملين وغيرهما ..وأعطاهم الفرصة ليستغلوه .. وأنا عايزكوا تقرأوا القصيدة
الجميلة دى كويس قوى .. لأنها من قصائده القديمة .. والأهم أنه كمن يصف نفسه فى
وضعه الحالى .. رأيكم يهمنى جدا ياصحبتنا الحلوة .
يا رب يا كنز الغلابة...
كترت على بلادي الديابة...
وبدال ما تبقى الغابة جنة...
هما خلوا الجنة غابة...
خلوا الطرق ما بتنتهيش...
والأسئلة ما ليهاش إجابة...
أرضك يا رب في كل شبر...
بقت خلاص تطرح عصابة...
وبقي الضلالي في وسطنا...
شاعر يادوب ناقصه الربابة...
عايش في قصر وهو نفسه...
بالكتير جواه خرابة...
خلونا بتنا مخونين...
العاشق المغرم صبابة...
غلوا الندالة والخباثة...
ورخصوا سعر الطيابة...
وإلي يغني في حب مصر...
نقيم عليه حد الحرابة...
ناقص يا رب إن اللصوص...
في بلادنا يبقى لهم نقابة...
يا رب في بلادنا الوحوش...
داسوا بجزمهم ع القرابة...
وملوا البيوت بعد المحبة...
والسلام غربة وغرابة...
وعشان ما يقتلنا العطش...
بيفتشوا حتى السحابة...
يا رب يا كنز الغلابة...
إحنا اتفلقنا من الخطابة...
عايزين قلوب تعرف تحب...
وإيد بتملاها الصلابة...
تعرف تطبطب إنما...
عند اللزوم جامدة ومهابة...
مش حد يغتال النبي...
ويلبس لنا لبس الصحابة...
