من مذكرات بنوتة

من مذكرات بنوتـــــة

ــــــــــــــــــــــــــــــــ

قصيدة جديدة أكثر من رائعة للشاعر الدكتور / صلاح عبدالله .

من مذكرات بنوتة

ارجعلي يا عنيد يا أناني...
أنا من جوا بقيت ما أنفعش لراجل تاني...
بعدك حاسة بغربة فظيعة...
من كل ما في الكون واخداني...
من إخواتي. ومن أصحابي...
ومن زملائي. وكل جيراني...
من مراياتي. ومن تسريحتي...
ومن مكياجي. ومن فستاني...
كل شوية أحط الأكل وأشيله...
وأبص له. مش قادرة أبلعه...
إيدي في كم الفستان لكن أنا مش فاكرة...
أنا بالبسه ولا أنا بأقلعه...
كل ما أقابل صاحبة في حتة...
وأسمعها بحبيبها اتباهت...
أدعي في سري وتخرج مني...
ضحكة بلون الروج الباهت...
قاعدة في وسط الناس وأنا حاسة...
بيني وبينهم حيطة وباب...
حاسة بقلبي جوا ضلوعي...
يشبه للوردة الناشفة الدبلانة جوا كتاب...
مش عارفة. بقيت ناسية الدنيا؟...
ولا الدنيا بقت ناسياني؟...
ارجع لي يا عنيد يا أناني...
كل ما باعرف راجل غيرك...
باسأل نفسي هاودعه إمتى...
يمكن يملا عيون الدنيا بحالها. إلا عيوني...
ما فيهوش عيب غير إنه مش أنت!!...
وأتهمك بيني وبين نفسي...
وأغضب قوي بس أرجع أسامحك...
كل ما أبص لراجل غيرك...
ما باشوفش في وشه إلا ملامحك...
عايزة أقعد قدامه أوصفك...
عايزة أسأله يمكن يعرفك...
هاتصدقني؟ في عز الزحمة...
أنا باسمع همسك في وداني...
ارجع لي يا عنيد يا أناني...
أنت ما كنتش حب في عمري...
حب نسيته واطمنت...
أنت في عقلي. وقلبي. وروحي. ونفسي. وكل ما فيَّ سكنت...
كنت باحس في وسط الناس إن أنا موجودة...
وأنت لوحدك بتحسسني بإن أنا بنت!!...
خايفة أوصف لك باعمل إيه...
لتقول عني إني اتجننت...
ساكن بين صدقي وبين كذبي...
ساكن بين فرحي وبين جرحي...
ساكن بيني وبين إحساسي...
ساكن بين عقلي وجناني...
ارجع لي يا عنيد يا أناني...
أقفل أوضتي عليَّ وأقرا...
كل كلام الحب إلي أنت عشاني أنا كاتبه...
وأكتب اسمك عشرين مرة...
مرة أأهمسله. ومرة أخاصمه. ومرة أعاتبه...
وأفضفض لك عن أسرار...
ما أقدرش لغيرك أشرحها...
وأما دموعي تبل الورقة...
أستناك بإديك تمسحها...
أنا عايشة إلي ما بيني وبينك...
ساعة بساعة وثانية بثانية...
وأحس إن إديك واحشاني...
أمسك إيدي بإيدي التانية...
لمسة إيدك مش على إيدي. ومش على شعري...
لمسة إيدك جوا كياني...
ارجع لي يا عنيد يا أناني...
أنت بجد بتصحا الصبح...
وتعرف تبدأ يومك عادي!!...
تفطر. تتغدى. وتتعشى...
وتروح شغلك. وتروح قهوة. وتروح نادي!!...
أنت بجد نفضت إديك...
ولا عاد شيء في الدنيا مهم؟...
أنا نفسي أعرف مين سهاك؟...
مين حط في إحساسك سم؟...
جبت منين لشفايفك ضحكة؟...
ياه على قسوة قلبك ياه!!...
ولا تكونش لقيت في ضلوعك...
قلب جديد أنا مش جواه!!...
قلب جديد علمك القسوة...
غير القلب إلي أنا حبيت. وكان مخلوق علشاني!!...
ارجع لي يا عنيد يا أناني...
إوعا تقول لي إن دا كان وهم...
وصبح وليل كنت باغرده...
لا. كان حب بجد بجد...
وكل ما فيك كان بيؤكده...
كنت تقول لي أبيع الدنيا بحالها...
وأشوفك وأنتِ بتبتسمي...
كانت دقات قلبك ملكي...
وأيامك مكتوبة باسمي...
كنت أما أخرج إيدي في إيدك...
أحس إن أنا متزوقة بيك...
كنت باسيب شَعري أما بيطول...
علشان خايفة أقص بإيدي...
خصلة تكون لمستها إديك...
دا أنا كان نفسي أسمي الكل باسمك...
علشان أفضل طول العمر أنادي عليك!!...
كان قلبي تايه في ضلوعي...
خدت بإيده بقيت جنته...
كان مكسور غرقان في دموعه...
وأنت بقيت فَرَحه وحِنته...
أنت ما كنتش حب بعيشه...
كنت كمان اسمي وعنواني...
ارجع لي يا عنيد يا أناني...
دا أنا باتزلزل لما بييجي في بالي...
أول بوسة وطعم الكسفة...
لما شعرت بكهربا ناعمة بتسري في جسمي...
من ربكتي دلدقت القهوة...
واتبسمت وقلت أنا آسفة...
لما ألقاك تفاجئني وتنطق...
بالكلمة إلي أنا كنت هاقولها...
لما أكلنا بمعلقة واحدة عشان نستطعم...
أكلة قعدت أنا وأنت ناكلها...
وأأكلك اللقمة بإيدي...
وأنت تعض صوابعي برقة...
عضة لذيذة بشكل!!...
وأقول لك عضيتني. تقول أنا آسف...
قلت أحَلِّي في نص الأكل!!...
لما تسهيني وتحضنني...
وأتلخبط خالص وأتلخِم...
لما تمد إديك وتنعكش شَعري...
وأضحك وأقول لك يا رخِم...
أنا مشتاقة لكل ما فيك...
ضحكك. سرحانك. وهمومك...
للبوسة إلي بطعم القهوة...
ولريحة التدخين في هدومك...
مشتاقة أسمع دقة قلبك...
وحشتني بجاحتك وكسوفك...
لما أقصد غيرك أنده لك...
وإن بصيت في مرايتي أشوفك!!...
أفتكرك وأغمض عيني...
وأتنهد وأفتح أحضاني...
ارجع لي يا عنيد يا أناني...
بكرة هاتعرف قيمة حبي وقيمة حضني...
لما تدوق أحضان مغشوشة بتنزف قسوة...
بكرة تحس بعيد عن حضني إنك عريان...
ياما عرايا وهما عليهم أحسن كسوة...
ما هو مش كل بيوت الناس بتدفي وتأوي...
ولا كل المية إلي شربها العطشان تروي...
قل لي إنك ندمان وهاترجع...
مش هاستحمل أشوف الدمع في عينك...
مش هاستحمل أسيبك تركع...
مش هاستحمل أسمع قلبك يصرخ جوا ضلوعك...
ليل ونهار ينده لحناني...
ارجع لي يا عنيد يا أناني...
كل ما فينا من أحاسيس مخلوق للتاني

Top of Form

Bottom of Form