أسرة فيوتشرز دهب .. نحن فخورين بكم

أسرة فيوتشرز دهب .. نحن فخورين بكم .

بانوراما  الصور دى  من صفحة المربية الفاضلة الأستاذة / جيهان عمر ــ مديرة مدرسة فيوتشرز دهب .. وأنا يسعدنى نشره على صفحاتى لــ 5 أسباب :

الأول : أن الفيديو رائع جدا ..وأطفالنا رائعين جدا جدا بحق .. وبيوضح أنشطة أطفالنا الأعزاء فى كل المجالات .

الثانى :  أن من نشرته هى الأستاذة / جيهان عمر ــ مديرة المدرسة الممتازة .. والتى أستطاعت أن ترتقى بالمدرسة ،  وبكل تلاميذها ، ومدرسيها ،وإدارييها.. إلى مستوى عالى وراقى .

والثالث : هى دعوة للعائلات التى تتمنى الأستقرار بمعشوقتى الساحرة دهب .. لنؤكد لهم ، ونطمئنهم بأن لدينا مدرسة عالمية .. على أعلى مستوى تعليمى ، وتربوى ، وأبضا ترفيهى .. وأن مدرسة فيوتشرز دهب لاتقل بأى حال من الأحوال عن المدارس العالمية كلها .. سواء بمصر أو أوروبا .

الرابع : وبصراحة تامة  لأن أحفادى بهذه المدرسة الراقية .. وأكيد حاتعرفوهم من الصور .

والخامس : علشان نقول لمس جيهان .. والمدرسات والمدرسين ..والأداريين .. ولكل تلميذات وتلاميذ المدرسة .. شكرا لكم .. بنحبكم ..وبنفخر بكم

 https://www.facebook.com/gihan.omar/videos/1556813077662318/

حبيشة فى الجيش .

حِبِـيشَـــــة فى الجيش

ـــــــــــــــــــــــــــــــــــــــــــــ

                من يومين تلاتة الفنان الشاب محمد رمضان  تقدم فى موعده المحدد للألتحاق بالجيش .. وكتب على صفحته الشخصية :

 ((اليوم قدمت اوراقي للتجنيد .. يوم انتظرته منذ طفولتي .. اقل واجب تجاه بلدي .. الخدمة العسكرية .. بإذن الله فى  العريش )) ,

            ويارب بقى تهدى نفوس الناس ، ناحية رمضان .. لأنه أكتر فنان أتظلم فى مصر  ، ويمكن فى العالم كمان  !! لأنى بصراحة أول مرة أشوف فنان بيتعاقب على حُسن آداؤه ، وقدرته على إقناع الناس أنه هذا المجرم ،أو البلطجى اللى بيمثله ،  حتى أن أغلبية متابعيه صدقوا ، وبدأوا يتعاملوا معاه على هذا الأساس .. بدءا من ضابط البوليس الذى أوقفه من سنتين تلاتة ،وأصر على تفتيش سيارته ، والتعدى عليه بالقول .. وألتقطت الصحافة  الخبر ، ونشرته على كل الصفحات .. ومن وراها الفضائيات وبرامج التوك شو .. ومعاها طبعا مواقع التواصل ... وكل دوول وبلا أستثناء  عايزين جنازة ويشبعوا فيها لطم .. وكلنا عارفين كده فالكلمات الراسخة فى بلاط صاحبة الجلالة (( إذا كلب عض إنسانا  فليس خبرا .. ولكن الخبر الحقيقى  إذا عض الأنسان كلبا ))..  فالأخبار السلبية والسيئة هى الأكثر جذبا للكاتب والقارىء .. وبالتالى هى الأكتر أنتشارا .. وبعدها أنطبع فى ذهن أكثر الناس أن محمد رمضان بلطجى فعلا  ، لأتقانه تمثيل أدواره .. ولملامحه المصرية الشعبية الصميمة .

                وحاجة تانيه أهم جعلت الناس لا تتعاطف مع رمضان  ، وهو  التوقيت .. فقد كانت أغلب أدواره عن البلطجة ،والبلطجية، تم فى وقت أنتشار هذه الظاهرة السيئة فى الشارع المصرى ، بعد ثورة يناير .. وتخوف المصريين منها .. وكرههم لها .. ثم يطلع لهم رمضان ممثلا لهذه الشخصيات الكريهة .. فلم ييتعاطفوا معه ، أو بالآوضح كرهوه .. وهم لم يكرهوه هو شخصيا ، ولكن كرهوا الشخصية اللى بتخوفهم ، فى شارعهم ،وحارتهم ،والأسواق ،والقرى .. كرهوا الفعل  مش الفاعل .

              والدليل أن فريد شوقى والمليجى والدقن وعادل أدهم وغيرهم من أشرار السينما  ضربوا وقتلوا آلاف الشخصيات  فى أفلامهم .. ولكننا لم نكرههم  بهذا الشكل .. بل بالعكس كنا بنحبهم ونقدرهم ..وأحيانا كثيرة بنتعاطف معاهم وناخد صفهم ضد الآخرين .

              لكن من ناحية تانية  اللى يضايق فعلا أن فيه ناس حقودة وغلاوية .. بيبصوا لما يقبضه  رمضان من ملايين .. ياعم  أحنا مالنا ، ربك هو الرزاق .. والحكاية عرض وطلب .. فلو صناع السينما مابيكسبوش منه أضعاف أضعاف اللى بيدفعوه  ماكانوش دفعوه أصلا .. وبعدين تخيل نفسك فى عمل وصاحب العمل قالك حاأزودك 5 أضعاف مرتبك علشان أنت شغال كويس .. ياترى ساعتها حاترفض وتقوله  لأ   مش عايز .. ولا حاتاخدهم وتحمد ربك على النعمة .. مشكلتنا ياأخوانا هى فى الرضا .. لو كل واحد فينا راضى باللى ربنا قسمه له ، ومابيبصش على اللى فى أيد غيره حانكون ساعتها أحسن ناس فى الدنيا .

               يارب بقى بعد مامحمد رمضان أعلن دخوله الجيش ، ورغبته فى الخدمة بالعريش ، رغم أنه من الممكن ن يخدم فى القاهرة مثلا بنادى الضباط أو ماشابه ذلك .. ولكنه أراد أن يثبت للكل أنه مصرى وطنى أصيل ، لايزيد عن أى مجند آخر .. ولعله يكون قدوة حسنة  ،ومثل يُحتذى للكثير من شبابنا  وخصوصا الذين قلدوه فى أعمال البلطجة .. ويارب يقلدونه فى أعمال البطولة .

بقلــــــــــــــم

صــــلاح إدريــــــــس

salahedris@gmail.com

تم نشر المقال بجريدة ( الوطن )عدد الخميس 20 أكتوبر 2016

 http://www.alwatneg.org/tfr/1062

صاحبة السعادة إسعاد .. تسعد مصر وأهلها .

نمـــازج مشـــــــرفة

صاحبة السعادة إسعاد .. تسعد مصر وأهلها .

ـــــــــــــــــــــــــــــــــــــــــــــــــــــــــــــــــــــــــــــــ

لازم أرفع القبعة .. وأحيى صديقة صفحتنا الصديقة الغالية  صاحبة السعادة / إسعاد يونس .. فقد أستطاعت هذه السيدة العظيمة ببساطتها وروحها الحلوة وأداؤها الطبيعى على الشاشة .. وفى لقاء بسيط جدا ـــ ودون شوشرة  ـــ مع بعض الشركات المصرية التى عشنا على منتجاتها لسنوات طويلة  ثم نسيناها  وتهاوت منتجاتها .

لقاؤها من أسبوعين مع مديرى شركات باتا ،وكورونا ، وقها  ، أستطاعت أن تُحفز المصريين على شراء المنتج المصرى .. وأستطاعت ببساطتها الجميلة أن ترفع مبيعات كل هذه الشركات إلى أكتر من 5 أضعاف خلال أيام قليلة .. بل أن شركة قها  قامت بإنشاء 4 خطوط أنتاج جديدة  بعد  تهافت المصريين على شراء منتجاتها ..

الصديقة الجميلة صاحبة السعادة إسعاد .. أسمك على مسمى .. بنحبك ياإسعاد .. أطال الله فى عمرك لتسعدينا أكتر وأكتر بما تقدمينه من سعادة متواصلة .. وأكثر الله من أمثالك .

ميادين مصر تتجمل بتماثيل أم بعجر والسلعوة وأبو رِجل مسلوخة !!

ميادين مصر تتجمل بتماثيل أم بعجر والسلعوة وأبو رِجل مسلوخة !!

ـــــــــــــــــــــــــــــــــــــــــــــــــــــــــــــــــــــــــــــــ

زمان  كانت ميادين مصر مليانة بـأجمل مامثله فن النحت من تماثيل وصور تعبيرية .. والتى نحتها بأنامل فنانة  ،عظماء فن النحت  زى أدهم وسيف وانلى .. وأحمد عثمان ، والسجينى ،وغيرهم من عظماء الفنانين .... وكنا نقف مبهورين أمام (  أسدين قصر النيل ،ونهضة مصر، وسعد زغلول فى الأسكندرية ، وأبراهيم باشا )وغيرهم من آلاف التماثيل التى دخلت التاريخ مع صناعها .. وعشقها جيل وراء جيل .. وبعد ماكنا ومنذ 7000 سنة ونحن ملوك الفن والنحت والحضارة  التى تشهد عليها معابدنا وآثارنا ، فى كل العهود وحتى التسعينات.. ويشهد بها العالم كله !!!

دلوقت  ــ وأعوذ بالله من الشيطان الرجيم ـــ بقالنا كام سنة كده وأحنا بنشوف تماثيل فى ميادين مصر  أقل مانقوله عليها  أنها ( زبالة من القُبح ) .. وبدلا من أن تمتع نظرك وخيالك بها .. تبقى عايز تتف عليها .. أو ترفع قضية على اللى نحتها  ،واللى وضعها ،واللى سمح بوضعها .. ويظهر أن عصابات المحليات بقت تسترخص !! وبدل ماتتفق مع فنانين حقيقيين .. بقت تتفق مع أى عامل محارة  يعمللها تماثيلها بتلاتة جنيه للواحد !! وآهى أى حاجة تترص فى الميادين وخلاص .. ومش مهم بقى الذوق العام .. ولا جرح شعور المصريين بهذا القبح المتعمد .. ولا قتل ذوق الأطفال ودفن مواهبهم فى الطين ..وقتل أى قدرة أو خيال لهم على الأبداع .

 بارب أنزل غضبك ومقتك على كل قبيح ، نشرلنا هذا القبح .. من أصغر واحد لأكبر واحد ..

وأمّنتك أمانة ياشيخ تدوس على الصورة الأولى اللى عليها الرقم بالماوس ،علشان تشوف مسلسل صور الرعب والقبح كله ووصل لغاية فين !!!

وحسبنا الله ونعم الوكيل .

شعب دولة الفيسبك وتويتر المتحدة .

شعب دولة الفيسبك وتويتر المتحدة .

ـــــــــــــــــــــــــــــــــــــــــــــــــــــــــــ

                    النخبة والأعلاميون والمسئولين ومستخدمى النت  فاهمين حاجة غلط خالص .. وهى أن  مستخدمى مواقع التواصل  هم عموم الشعب المصرى .. وأى كلام بيتقال على المواقع دى يبقى هو رأى المصريين .. وأى إستطلاع رأى  عن موضوع ما   ، فالحسم فيه يكون عبر مواقع التواصل الأجتماعى .

           لا  .. لا  ..  لا ...  ياأخوانا  أنتوا فاهمين غلط خالص !!.. مواقع التواصل دى مابتمثلش أكتر من 20 % من الشعب المصرى ،  ده لو ضربها الدم .. لكن الـ 80 % الباقيين  دووول الشعب المصرى الحقيقى ..  تلاقيهم فى الشوارع، والحقول ، والمصانع  .. بينكتوا ، ويتريقوا  على الأفندية ،والكولجية  بتوع   الفيسبك ..وكمان نسبة كبيرة من االمثقفين لايعترفوا  بمواقع التواصل ، ولا بيحبوا  التعامل معاها  ولا حتى شوفوها  من أصله .

           ده غير  بقى  أن أكتر من 50% من اللى بيستخدموا مواقع التواصل  أجهل من دابة ( لامؤاحذة ) .. فهو يقرأ المقال أو البوست  من دووول .. وبعدين يشوف أول واحد علق عليه قال أيه ؟ .. وياللا هو وراه بنفس الرأى  !!  وغيره ، وغيره ، كالقطيع .. وأؤكد لكم أن أوقات كتيرة بعض هؤلاء القطيع لا يقرأ البوست أصلا ، ويعلق زى االلى قبله ، بس علشان يثبت حضوره ، وأن له رأى !!

          ولو دققت النظر فى البوستات اللى بتتنشر ، والتعليقات عليها  حاتلاقى  نص اللى كتب وعلق مابيعرفش يقرأ ولا يكتب كويس !!  بدليل أن كل 10 كلمات فيهم 3 أو 4  غلطات أملائية شنيعة .

         كل ده كوم .. وحكاية أن صحفى ولا إعلامى عايز يشتهر أو ينشر خبر معين  ده كوم تانى خالص ..فتلاقيه  كاتبلك عنوان الخبر أو المقال بالبنط العريض   ، وبشرط يكون  عنوان (سخن ومشطشط ) ..  ويجبرك على قراءة الخبر .. فلما تقرأ ماتحت العنوان تلاقى كلام أقل من العادى!!   وفى أكتر الأحيان هايف ، ومالوش علاقة  إطلاقا بالعنوان المولع اللى فوق .. لكن تلاقى قطيع مواقع التواصل   واللى همه أصلا مابيقرأوش  ..بيقرأوا بس العنوان المشطشط  ده  ..ويبنوا عليه جزء من خيالهم المريض الجاهل .. وجزء من الأشاعات اللى بيسمعوها سمع  من هنا أو هناك ، ودايما بتكون من مصدر باإما أجهل منهم .. ياإما قاصد الشوشرة ، واللخبطة ،ونشر الإشاعات .. ودى فى حد ذاتها  فى رأيى  أم المصايب .. (وبلاش أقول أم الكبائر  علشان أخوانا المتأسلمين مايصطادوليش غلطة زى عاداتهم معايا من سنوات !! .

        يبقى أى حد بيعتبر مواقع التواصل هى النبض الحقيقى للشعب المصرى بأقوله أنت غلطان ياباشا .. رواد مواقع التواصل مابيمثلوش أى نسبة من الشعب المصرى .. وحتى لو كانوا ا 20% زى ماقلت فى أول المقال  ، فإن منهم المثقفين ،والفاهمين بالفعل لايتعدوا الـ 10%  !! والباقى ناس بتتسلى وتضيع وقت .

          عارفين مين أكتر المستفيدين بمواقع التواصل .. هم أخوان الخنازير .. وكل جماعات الأسلام السياسى المتطرفة .. فالأخوان بيشغلوا كتائبهم الأليكترونية  فى عمليات الأحباط  ، والتخويف ، والشوشرة  ،وطبعا ألأشاعات  اللى اللى عايزينها لخراب البلد !!  وفورا تلاقيها زى النار فى الهشيم !! بيلقطها  آلاف من اللى قلنا عليهم  ،وينشروها بغباء على  صفحاتهم ..  ومن جوه الفيسبك تنتشر فى الشارع المصرى ..  وتلاقى الأشاعة أتنشرت  بسبب جهل وغباء مستخدمى مواقع التواصل .. أما جماعات الأسلام السياسى  دى بقى بتستخدمه  لتعليم كوادرها  ،وغيرهم من المجانين اللى بيعملوا عمليات أرهابية  لوحدهم وبيسموهم ( الذئاب المنفردة ) !! كيفيىة تصنيع المتفجرات  ، وللتواصل مع بعضهم البعض .. ولديهم مواقع وشفرات خاصة بينهم  صعب ضبطها ، رغم كل التكنولوجيا المتقدمة اللى وصللها العالم .

           إذا من الضرورى واللازم أن الكل يعرف  أن رواد الفيسببك وتويتر هم شعب الموقعين دوول بس ..  لكنهم مش الشعب المصرى أبدا .. يبقى مش لازم أبدا  لا نحطهم فى حساباتنا خالص .. ولا نخاف ونكش ونتخض  من الهجمات على هذا الشخص أو ذاك .. أو هذه المجموعة أو تلك .. او حتى هجوم على الجيش من دووول  ولا دوووول

           ياأحبائى  الفيسبك أيام ثورة يناير كان حمادة .. ودلوقت حماااااادة تانى خالص !!!

بقلــــــــــــــــم

صــــلاح إدريـــــــــــس

salahedris@gmail.com

تم نشر المقال بجريدة ( الوطن ) عدد الأثنين 5 سبتمبر 2016

http://alwatneg.org/tfr/769

أنا أعلم أننى كلب !!

أنا أعلم أننى كلب!!

إذا كنت حزين .. سأكون بسمتك ..

إذا بكيت .. سأكون راحتك..

لو أى شخص كسر قلبك .. يمكننا أستخدام قلبى لنحيا ..

سأكون دائما إلى جانبك ..

هيصة هيصة هيصة .. عند العروسة هيصة !!

هيصة   هيصة  هيصة  .. عند العروسة  هيصة  !!

ـــــــــــــــــــــــــــــــــــــــــــــــــــــــــــــــــــــــــــــــــــــــ

كان بيت العروسة دايما يبدأ  أفراحه .. وتسمع زغاريده .. وضحكاته  قبل الزفاف بعشرات الأيام .. يتخللها غناء الأطفال والكبار .. وزفة التنجيد من مراتب وألحفة ومخدات  ومعاهم النحاس وأدوات المطبخ ،وموكب عربيات الكارو ، أو النصف نقل  حسب إمكانيات  أهل العروسة ..  مع الأغانى الفلكلورية الجميلة  ورقص البنات الصغار والأطفال على دقة طبلة الست أم صابر .. وطبلية الغداء والعشاء  فى بيت العروسة المفتوح طول اليوم .. وتقديم ما قسمه الله ، و الطبلية ماتتشالش من على الأرض لأن اللى جايين يهنوا كتير من الأحبة والجيران والأهل .. وصوانى الطعام القادمة من الجيران محبة للعروسة  .. وتكافل طبيعى وعادى من الجيران .. صورة جميلة عشناها  .. ومازالت بعض الأحياء الشعبية .. وقرى الريف تعيشها ..

اللهم لاتحرم بنت ولا أسرة من هذه الفرحة ,, وأتمم كرمك على كل البنات بالسعادة وراااحة الباااال يااااارب .

صورة قديمة تنبض بالحب والأحترام .. نفتقده بشده الأن !!

صورة قديمة  تنبض بالحب والأحترام .. نفتقده بشده الأن !!

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

علماء أزهريون أفاضل .. كان لهم مريديات .. ومحبات ..ومعجبات من النساء ، كما لهم من الرجال  ... لم يترفعوا يوما عن السلام عليهن باليد ،وهن سافرات .. ولم تُرهبن الفتيات أو تخافن أو تنفرن من المشايخ الأفاضل ..  أما المشايخ فقد أعزوا الأسلام الجنيف الوسطى بهذا السلوك المحترم.. فحببوا الشباب والشابات لدينهم ، ولم ينفروهن ، أو يكرهوهن فيه .. فكما ترى بالصورة  الأبتسامة على كل الوجوه .. والحب والأحترام فى كل القلوب .. وسبحان الله ياأخى  فرغم أن هذا الحب فى القلوب إلا أنه واضحا جدا بالصورة .

البوسطجية أشتكوا من قِلة مراسيلى !!!

البوسطجية أشتكوا من قِلة مراسيلى !!!

ـــــــــــــــــــــــــــــــــــــــــــــــــــــــــــــــــــــــ

تصدق أن دوول ( سعاة البريد ) أو ( البوسطجية ) .. أيام الدولة الخديوية ، وفضلوا بألتزامهم ،وزيهم الموحد  لغاية الدولة الملكية .. وحتى بعد ثورة يوليو ، ويمكن لغاية أوائل أو منتصف التمانينات .. لكن بعد كده  الظاهر أن الناس عواطفها جفت .. ولقمة العيش والجرى وراء القرش  بعدت الأهل والأقارب ،وصلة الرحم .. ومابقوش يبعتوا لبعض جوابات وأكتفوا بالتلغرافات فى حالات الوفاة أو قرب الوفاة  ــ لاقدر الله ــ ومع مرور الوقت  ودخولنا فى عالم التكنولوجيا اللى ضيعتنا ..ولسه بتضيع فينا !!وأحنا مستسلمين لها تماما   مابقاش لهم لا قيمة .. ولا  لازمة .. لا  للبوسطجية  ،ولا للجوابات أصلا  .. وتحولت مكاتب البريد لتقديم خدمات تانية كتيرة مالهاش أى علاقة بالمشاعر الجميلة اللى كانت بتحملها السطور بين الناس وبعضها ..

وأنضمت  الجوابات   لنادرى  الوجود  كالغول والعنقاء والخِل الوفى .

ناوى تتبرع لمصر .. ولا طناش بلا خَوتة ؟؟

ناوى تتبرع لمصر .. ولا طناش بلا خَوتة ؟؟

ـــــــــــــــــــــــــــــــــــــــــــــــــــــــــــــــــــــــــــــــ

المواقع والصفحات المُغرضة العدوة لمصر مابطلتش سخافة ،وسخرية ـوقِلة أدب ، من قول السيسى : (( لو كل مصرى أتبرع بجنيه ممن يملكون موبايلات  حانجمع كل يوم 30 مليون جنيه )).. ونسيوا أن هذا ليس جديدا على المصريين ، فدائما يقفون مع وطنهم وقت الزنقة .. ومين يقدر ينسى سيدة الغناء العربى أم كلثوم  بعد حرب 67  وهى تقيم الحفلات فى كل مدن مصر ،والمدن العربية ،والعالمية ، وتجمع ملايين الجنيهات لدعم مصر وقتها .. وكانت كل حفلاتها تبرعا منها  ،وكانت تدفع أجور الفرقة الموسيقية من جيبها الشخصى .. وسيدة الشاشة العربية فاتن حمامة  كانت تركب الأتوبيسات ،والترومايات، لتجمع ماتستطيع لدعم مصر .. وكذلك العديد من الفنانين ،وغير الفنانين .. صحيح أن الحالة الأقتصادية سيئة ، وكلنا مش لاقيين حق النشوق .. لكن أيه المانع أنك تتبرع بجنيه من موبايلك .. ده أنت ياراجل لو أشتركت فى أى مسابقة على الفضائيات  بتدفع 5 جنيه  .. يبقى حاتستخسر فى بلدك جنيه .. أرجوك لاتتردد .. ولا تفكر .. ولا تقول  ياعم وأنا مالى .. لأ   مالك ونص كمان .. لأن البلد دى مش حاتقوم ، وتتقدم من عثرتها إلا بوقوفنا كلنا معاها ،ومع الرئيس .. يمكن نكون مش راضيين عن الحكومة ،أو البرلمان .. لكننا متأكدين من إخلاص السيسى  ،ورغبته الصادقة فى إزدهار مصر وشعبها .. يمكن تختلف معاه فى بعض حاجات .. لكن ماأفتكرش أنك ممكن تختلف مع مصر ، وخصوصا لما تحتاجك  !! مش كده ولا أيه ؟