طمعانجى بنى له بيت .. فلسنجى سكن له فيه !!
०००००००००००००
هذه احدى مقالاتى فى جريدة المصرى اليوم )
وتم نشرها اليوم السبت 29 مارس 2008 – يارب تعجبكم !!
الأمين العام للأمم المتحدة اللى أستلم من كوفى عنان ، وبقاله أكثر من سنة ، بذمتكم حد عارف أسمه أيه ؟
+ إلى كمال بك الشاذلى ( ماتعرفش قيمة الأم .. إلا لما تجرب مرات الأب !! ) + بعد إنتشار صور وزير المالية ، مع ممثل إعلاناته محمد شومان .. سمعت إنه معروض عليه بطولة فيلم ( طمعانجى بنى له بيت... فلسانجى سكن له فيه ))...
عمرو موسى ياولداه ... إتقطع نفسه من النفخ فى القرب المخرومة !! )
+ السفينة بدر المختفية من شهور ومش لاقيينها لغاية دلوقت !! أفادت مصادر عليمة ببواطن الأمور أنها فى مهمة رسمية للبحث عن الصحفى المختفى رضا هلال .. ربنا يرجع الأثنين بالسلامة !!
هدأت نفسى كثيرا بعد زيارتى للمرحوم الدكتور سمير سرحان – رئيس هيئة الكتاب السابق ، وقراءة الفاتحة له ، ولهيئة الكتاب المدفونة معه !
الدكتور البرادعى – رئيس الوكالة الدولية للطاقة الذرية .. أفاد بأن مصر أمامها عشرات السنوات من الدراسات والأبحاث حتى تتم الموافقة لها على البرنامج النووى السلمى ... ومع ذلك ياأخى أقلام كثيرة بتبارك وتهنى بدخولنا عصر الطاقة النووية ... صحيح الجعان يحلم بسوق العيش !!! وللعلم أحلام سوق العيش بيحلم بيها كل المصرييندلوقت بأستمرار، بعد أزمة العيش الخانقة ..
شراء القمح من الفلاح المصرى بالسعر العالمى .. خطوة حقيقية أولى لحل أزمة رغيف العيش !!
+ مبادرة رجل الأعمال محمد فريد خميس بإنشاء مخبز للعاملين بشركاته ، وساكنى العاشر من رمضان .. لتوزيع الخبز مجانا على محدودى الدخل ممن يقل راتبهم عن 1200 جنيه .. خطوة حقيقية ثانية لحل أزمة رغيف العيش .. بس لو أحتذى حذوة آخرين من رجال الأعمال .+ إصابة نصف مليون مصرى سنويا بالتسمم من تلوث المياة !! والله كويس إن الدولة لديها خطط طموحة لتحديد النسل !!
بعد التفكك والخلافات والأستقالات من حزب الصفوة ( الجبهة الديمقراطى) لم يعد هناك أى أمل فى أى إصلاح سياسى حالى أو مستقبلى !!+ فى الوقت الذى ترتفع فيه الأسعار 4 أو 5 مرات فى 40 يوم !! أجد على الجانب الآخر أنخفاض كبير جدا فى سعر المخدرات .. !! بعد زيادة المعروض منها بكميات كبيرة !! ماتعرفوش أيه السبب فى التناقض ده ؟
+ نزاع وقتال ووفاة 10 أشخاص بسبب نزاع على قطعة أرض بوادى النطرون بين قضاة وطيارين !! هو تأكيد على ضياع تام لهيبة الدولة !! وحقك لازم تاخده بايدك .. وإلا مش حاتاخده أبدا !!
سرقات الغسيل من على الحبل .. وسرقات الدقيق والعيش من أيد الأطفال .. مالهاش غير تفسير واحد إن الحالة فى بلادنا بقت سودة .. سودة .. سودة !!
حبس جماعة الأخوان المسلمين .. ومطارداتهم المستمرة .. هو دعاية مجانية لهم يسعدون بها .. لأنها أعادت شعبيتهم كما كانت وأحسن !! بس تقول لمين ؟ ومين يسمع ؟ فأصحاب العقول فى راحة !!
كلما زادت المظاهرات والأعتصامات والأضرابات ... كلما زادت كثافة تدريب قوات الأمن المركزى وفرق الكاراتية .. كما وكيفا !! .
०००००००००००००००००
ليست هناك تعليقات:
إرسال تعليق