لو عاوز نذيع .. قول ذِيع !!

لو عَاوز نذِيع .. قول ذِيع !!

ــــــــــــــــــــــــــــــــــــــــــــــــــ

عندى فزورة ظريفة .. وعايزكم تحلوها معايا أحسن أنا محتاس فيها ومش عارف أحلها ..

وحاأقولها لكم نقطة .. نقطة علشان ماتتلخبطوش.: ــ

* ألحق ياجدع منظمات المجتمع المدنى بتتجسس على مصر !!

· القبض على 43 جاسوسا من منظمات المجتمع المدنى ومنهم 19 متهما أمريكيا وتم ضبط مئات المستندات الدالة على عمليات التجسس والأتهام الموجه للمتهمين هو :ـ

ـ تكدير السلم العام .

ـ الأخلال بنظام البلاد .

ــ التخطيط لتقسيم مصر .

ـ الأتيان بعدة أعمال أستخباراتية تهدد الأمن القومى المصرى .

* عقوبة هذه الأتهامات تصل للأعدام !!

· أمريكا تحاول الضغط على مصر بخصوص الأمريكان لكن أحنا ولا يهمنا .. والقضاء المصرى الشامخ حر .. ولا دخل له بالسياسة .

· تهديد أمريكى بإلغاء المعونة الأمريكية لمصر بسبب المتهمين الأمريكان .

· * تهديد فى الكونجرس الأمريكى بقطع المعونات الأقتصادية والعسكرية عن مصر .

· * الشيخ محد حسان يتبنى مبادرة للأستغناء عن المعونة الأمريكية ، ويبدى مقدرته على جمع مليارى دولار فى يوم واحد .. ويلعن أبو الأمريكان ومعوناتهم .

· * تجاوب كامل من المصريين مع مبادرة الشيخ حسان .. و موافقة كبيرة على الأستغناء عن المعونة ..

· * هجوم أمريكى شديد يهدد بكارثة بين القاهرة وواشنطن .

· * الحكومة المصرية تؤكد أن مافيش حد يقدر يلوى دراعها وخصوصا الأمريكان .

· مصر كلها مشغولة ومهتمة بالقضية .

· * هيلارى كلينتون أمبارح الثلاثاء 28 فبراير قالت أن المشكلة فى طريقها للحل قريبا جدا .

* هيئة المحكمة تؤجل القضية إلى 26 أبريل 2012.

· * أمبارح برضه وفجأة هبئة المحكمة بكاملها اللى بتنظر القضية تتنحى عنها تماما لأنها أستشعرت الحرج

· * النهاردة عرفنا أن سبب الحرج هو أن قاضى كبير جدا طلب ألغاء قرار منع السفر عن الأمريكان المقيمين فى السفارة الأمريكية .. ولم يحضروا للمحكمة ولا مرة مع المتهمين المصريين .

· * مع أن هيئة المحكمة اللى ماسكة القضية هى برئاسة المستشار محمد محمود شكرى ( رئيس محكمة جنايات وأمن دولة شمال القاهرة ) ... إلا أن المستشار عبد المعز أبراهيم ـ رئيس محكمة أستئناف القاهرة طلع علينا بخبر ظريف أن القضية أصلها جنحة بسيطة ، وليست جناية ولا حاجة ..وعقوبتها لاتتعدى الـ 300 جنيه غرامه .. وبناء عليه تم ألغاء قرار المنع من السفر للأمريكان .. وسافروا خلاص لبلدهم !! ههههههههههههههههههاااااااااااى

بذمتكم دى بلد .. ولا دول حكام .. ولا دى حكومة .. الموضوع ده لو ماسكاه سنية شلاضيم .. ولا بعجر العكر .. أو حتى فتاكات بشلة .. كانوا أتصرفوا أحسن من كده .. وكانوا حبكوا الرواية كويس قوى ولبّسوا العمة ، للمصريين من غير مايحسوا .. لكن الفُجر ، والبجاحة كده زادوا عن حدهم قوى قوى .. وأحنا خلاص بقينا ملطشة لكل من هبّ ودبّ .. يقولولنا دول جواسيس ولازم يتعدموا .. موافقون .. دول أخذوا تمويل بملايين الدولارات .. موافقين شفت الجواسيس الكلاب .. وهجوم من الأعلام والصحافة .. وتوفيق عفاشة الشهير ببطوطة يصرخ ويولول ويقولك شفتم كلامى طلع صحيح أزاى ؟ آهم الجواسيس اللى عايزين يدمروا مصر وشعبها .. ويطلع وراه كل المنافقين والسذج يؤيدوا كلامه وكلام الحكام .. ويتهموا منظمات المجتمع المدنى وشبابه ورجاله بالخيانة العظمى .. وفى الآخر يضحكوا قوى .. ويقولولك أحنا الكاميرا الخفية .. لو عايز تذيع .. قول ذيع ..هههههههههههههههههههههههههههههاااااى

لو حد فيكم فاهم حاجة يشرحلى .. أحسن أنا خلاص مابقيتش فاهم أى حاجة .

صــلاح إدريـــــس

مدون بالبلـــدى الفصيــــح

http://plackprince.blogspot.com/