المليارات فوق السندرة !!

المَليَارَات فوقَ السَنْدَرَة .

ــــــــــــــــــــــــــــــــــــــــــ

فَاكرِين بُطرُس غالِى وزير المالية الهارب سنة 2007 لما قال إن فيه 2 مليار جنيه مش لاقيينهم !!.. وقلَبْنَا

عَليهُم الدُنيَا ومَافِيش فايْدَة !! .. سَاعِتهَا هَاجِت الدُنْيَا عَليه ، وعلى الدولة البَايظة ، وهَاجم الإعلام الحكومة ، ووزير مَالِيَتِهَا .. والناس طَلَّعِت نُكَت بِالهَبَل .. وبَعْدَهَا بكَام يُوم طِلع عَلِينا الوَزِير مَرَّة تانْيَة بطَلعِتُه البَهِيَّة وقال إنُّه لَقى الـ 2 مليار جنيه اللى كانوا ضايْعِين والحمدلله .

أنا بصَرَاحَة أتْغظت جدَّاً ، وأتفقعِت مَرَارْتِى ، وأىّ حَاجَة تِتفِقِع عَندِى !! وكَتبْت مَقاَلة فى جريدة (المصرى اليوم ) عدد الخميس 19/7/2007 بعنوان ...

( العثور على المِليَارَات الخَفِيَّة ، فى الجيب

الخلفِى للبنطلون الجينز ) ورَابط المقالة هو :ــ

((http://

www.almasry-alyoum.com/article.aspx?ArticleID=691

89))

والآن نفس السِيناريو يَتكرر .. فقد خرجت

عَلِينا الوَزِيرة فايزة أبو النجا ــ واللى مِصَدَّرَاهَا الحُكومة فى كل الأخبار الوِحْشَة ، لِدَرَجة أن الناس كِرْهتهَا ، مع أنها وزيرة كِويسَة ـــ قالت أبو النجا .. إنهم لَقوا 8 مليار جنيه من الصَنادِيق الخَاصَة .. مِش مَعْرُوفة الصناديق دِى بِتَاعِة مِين !! ولا المِليَارَات دُول بتُوع إيه !!!! .

والنبى أدونِى عُقولكم بَقَى وأمشُوا حَافيين ... يَعْنِى دَوّلَة عَظِيمَة ..وحكومة مَسْئُولَة .. ومجلِس عَسْكَرى مِن 22 وَاحِد بيُحكُمُوا بَدَل وَاحِد !.. ومَجلِس شَعْب الثورة !.. وكَلَام إنشَا كِبير ، وكِتير .. وبَعْد مَاالدُنيَا هَاجت ، ومَاجت فى الإعلام ، وفى الشارع ، عن الصناديق الخاصَّة ، وعن إنَّهَا مُمْكِن تِسَدِد عَجْز الخزانة

.. وتِطَلَعْنَا من الزَنْقة المِهَببَة اللى أحنا فيها ! تطلع علينا الحكومة ببيَان تقول إنَّها لَقت الفلُوس !!! .. طيَّب لَقِيتهُم فِين ؟ مِش عَارفه !! طيّب بتُوع إيه، ومِين ؟ بَرضُه مِش عَارفه !!

بذمتكُم دِى بَلد تِطمَئِن فِيها لِحُكَامْهَا ، وحُكومَاتهَا .. دِى بَلد تِطمَئِن فِيهَا على نفسَك وأسْرِتك !!

يَعْنِى عَايزين تِفَهِمُونا ، وتلَبِسُونا العِمَّة ، إنّكُم فِعْلاً مِش عَارفِين الفِلوس دِى بتاعِة إيه ؟ وبتاعَة مِين ؟ انتُم كِدَّه بتأَكِدُوا للشعب المَصرى إنكُم حِكومة غبيَّة ॥ وحكومة لِصُوص ॥ وحُكَّام خَابُوءَة !! ومِش عَارفِين رَاسهُم مِن فاسْهُم ! .. لإنكم لو عَارفِين ومِخَبِيين تِبقَى مُصِيبَة سُودَة !!! ولو مِش عَارفِين تِبقى قُفَّة مَصَايب بِكُل الألوان على دِمَاغكُم يابُعَدَا !!

بَس أنا عِرفت مِن مَصَادرى الخاصَة إن المِليَارَات التمَانيَّة لَقُوهَا مَلفُوفَة فى جَرانِين ، ومَحْطُوطة فى صَنادِيق كَرْتُون ومِتْحَاوْطَة بِنَفتَالِين بليَة ، ومَزنُوقِين فوق السَندَرة .. ومِستَخَبِيين مَابين صُندوق الجِزَم القدِيمَة بِتَاع بُطرُس غَالى الجِد .. وبين صُندوق كُتب أرْسِين لُوبِين بتاعة المرحوم زكى بدر !!

عَلشَان كِدَه أنا بأرجُوكُم تِدَوَّرُوا على بَقِيِّة الـ 88 مِليَار الضَايّعة .. يمْكِّن تِلاقُوهَا فى زِرِيبَة البَهَايم مَدْفُونَة تَحْت رِجل البَقر .. أو فى عِشِّة الفِراخ فُوق سُطُوح وِزَارِة المَالِيَّة !!.. أو حَتَّى فى جِيب أىّّ جَلابِيََّة من جَلالِيب عَاطِف عِبيد المَرْكُونَة مِن مُدَّة !! ومِش وَاخدِين بَالكُم مِنهَا !! دَوَّرُوا وفَتشُو كِوَيس .. ياحَرَامِيَّة ياوِلَاد الــ .....

صـــلاح إدريـــــــــس

مدون بالبلــدى الفصيـــــح