الدُستور والإعلان الدُستورى ..
تُوووور ..ويقول إحلبونــى !!
ــــــــــــــــــــــــــــــــــــــــــــــــــــــــــــ
أكتب هذا المقال بعد خطاب مُرسى مساء الخميس مباشرة .. وعايزك تحُط فى دماغك وأنت بتقرأ
المقال إن الإعلان الدستورى المُكبل للحريات ده ماشى لغاية الإستفتاء على الدُستور
.. فلو قال الشعـــــــــــب " نعــم " ( بالزيت والسُكر والسَمْع
والطاعة )!! يبقى حاينتهى العمل بالإعلان الدُستورى .. ولو قال الشعب ( لا ) .. يبقى
أتدّبَسنا خلاص فى الإعلان الدُستورى لِغاية مانأسِس بَقىَ جمعية تأسيسية جديدة
للدُستور .. وده حايكون بعد إنتخابات مجلس الشعب علشان تكون الجمعية من أعضاء مجلس
الشعب ..وناخُد لنا سِنين عايشين تحت رَحمة مُرسى وإعلانه لِغاية مايبان لنا صاحب
!!
كنت مجَهز كلام كتير أقوله عن الدُستور والإعلان الدُستورى .. لكنى تراجعت
لأن الجمعية التأسيسية نفسها غير شرعِيَّة أى باطلة .. ومابُنىَ على باطل فهو باطل
.. ومواد الدُستور المعَيِبة معروفة ومتحددة فى كل وسائل الأعلام ..
لكن خلاص فات وقت الكلام عن الدُستور وإعلانه .. وسقف المطالب فى الشارع علا
وعلا وعلا لِفوق .. والناس فى الشارع بتقول بالصُوت الحيانى ( إرحل .. إرحل ..
إرحل ) .. والحقيقة مش فاهم ليه مُرسى مصمم على أن يقلد مُبارك فى كل نهاياته
خطوة بخطوة .. ومش عايز يفوَّت ولا خطوة !!
وفاضل له زلطة ويطلع بَرَّه !!!
عارفين حكاية الدِبة اللى قتلت صاحبها .. لما شافت دِبانة على وِشه فضَرَبتها بحجر .. فطارت الدِبانة .. وتهشم رأس صاحبها ..
والدِبة هنا هى الجماعة .. وصاحبها مُرسى ..
90%
من قضاة مصر ، وفقهاءها الدُستوريين .. ورجال سياسة مُخضرمِين .. ومُثقفين ،
وفقهاء فِكر، وقانون ،ودِين .. وملايين من المصريين .. كل دوول بيرفضوا الإعلان
الدُستورى .. والإستفتاء اللى نزل على دماغهم زى القضا المستعجل ... ليه ياريس لما
طِلعلك مِيتين واحد من عُمال المترو ، أو غيرهم عاملين إضراب
تتنفذ مطالبهم فوراً .. ولما
يطالبك آلاف العُلماء ، والمُفكرين ، والقضاة ، ومعاهم الملايين .. تِقوم تعانِد ، وتِركَب دِماغك ويبقىَ شعارك
( ياأطُخُه .. ياأكسَرله مُخُه ). ليه بقى
ياعَم الحاج العِناد والراس الناشفَة !!
الكُل بيستغرب من حالة الإستعجال والهَروَلة ، اللى بيتَبعْها مُرسى ، وجماعته
للإنتهاء من الدُستور ثم الإستفتاء آوام .. آوام .. حالة من الشك والريبة لازم تعَشش
فى دماغك .. وتسأل نفسك ليه الإستعجال ده
؟ أحنا زمان كنا بناخد سنة وأتنين لإعداد
الدُستور .. وبلاد الدنيا كلها بتاخد سِنين لِغاية َمايفَلّوه كلمة كلمة ، وحرف
حرف .. لأن ده أساس البيت اللى حانعيش فيه كلنا .. وماينفعش سقف بيتنا يبقى
مِخَوّخ !!
و لسه لغاية دلوقت الدِماء الذكيَّة لِشباب مصر
مغرَّقة الشوارع بإيد أخوانهم ، أو إبناء عمهم ، أو جيرانهم .. معقول ياريِّس الدِم ده كله مش كفاية لك وجماعتك للتراجُع .. عموماً أنت
حُر.. واللى بيشيل قِربة مخرومة .. بِتخُرّ على راسُه .
النهاردة الخميس والمقال حايُنشر
يوم السبت .. ومن كُتر الأحداث وتسارُعها حاأكتفى بكِده .. لإنى حاسس إن من الليلة
دى للسبت حاتحصل حاجات كتيييييييييييييييرة .. وكُلِ يتغنى بليلاه !!
ـــ
تم نشر المقال بجريدة ( المصرى المهاجر ) الصادرة بلوس أنجلوس ـ كاليفورنيا
ــ الولايات المتحدة الأمريكية ــ عدد السبت 8 ديسمبر 2012
http://almasry-almohager.com/Salah_Edris120812.php
بقلـــــم
صـــلاح
إدريـــــــــس
salahedris@gmail.com
مدون بالبلــدى الفصيـــــح
تشريفكم لمدونتى
يسعدنى .. ويمتعّكم ، وقد يفيدكم
http://plackprince.blogspot.com/
ليست هناك تعليقات:
إرسال تعليق