الفلــوُووول آهُـوووه ...الفلوُل آهُوووه !!!
مش عارف ليه كلمة فلول بتفكَّرنى
بكلمة مَنخلول أو أم المَنخلول على رأى الإسكندرانية ( أجدع ناس ).. وطبعا اللى
يعرف المَنخلول ، لازم يفتكر على طول طبَق الطِحينة المَحَبش بالتُوم والكُسبَرة
والكمُون .. وطبَق تانى غويط فيه مَيَّه علشان نغسل فيه المَنخلول قبل مانغطسَها
فى الطِحينة ، وتوُورِة عِيش بَلدى مِلَدِنْ وسُخن ( لو لقيناه !! ) ،ثم نلتهِم لحم
الحيوان البسيط داخل قوقعة المَنخلول.
رِجِعتْ كلمة فلول تِتقال كتير
اليومين دول من الجماعة بالذات ومُريدِيهم .. ( مع إنهم أول وآخر من تعامل مع
الفلول من بداية الثورة ولغاية دلوقتِ !!
) ..فيقولك إيه : مُظاهرات التحرير كلها فلول !! أو اللى مُؤثر عليها وممشيها فلول
!! أو الثوار غلابة وطيبين بس وَاقعين تحت
غسيل مُخ من الفلول .. الفلول .. الفلول .. الفلوووول .. وفجأة لقينا الفلول دُوول
وَحش أخطبُوطى مُتمكن !!.. يقدر يلعب ويتحكم بمصير المصريين كلهم .. ويغسل دِماغهم
.. ويخطط ، ويدبَّر ، وينفذ ، ولا السى آى
إيه الأمريكانى !! وبعدين تعالى قوللى هنا
يعنى إيه فلول ؟ ومين هُمَه الفلول أصلاً ؟ 
الفلول فى اللغة العربية من فَلّ .. أى مَشى أو هَرب
أو خلع !! لكن إحنا فلولنا مابتخلعش لكن مُسَخََّرة ومُسيَّرة مصر غصب عن الرئيس والحكومة !!.. ومثبته الشعب
كله ومخلياه ماشى على مزاجها!! .. والفلول هى اللى حرقت المجمع العلمى !.. وقتلت
شهداء محمد محمود وماسبيرو ! ، وهى اللى سرقت خراطيش الشرطة !! .. وبعدين إندارت عليهم
و بتقتلهم بخراطيشهم !! وبتضرب الجماعة
والثوار بنفس الخراطيش !! .. وهى اللى أقامت
جماعات الجهاد والتكفير
فى سيناء ! وهى اللى بتتحكم فى حركة 6 أبريل .. وكمان 10 مارس
( عيد ميلادى ) .. وهى اللى بتحشد الملايين
فى مظاهرات ضد الرئيس ، والحزب الحاكم !..
وهى اللى سلّطت أوباما على ليبيا .. ووشوشته مايصوتش
على إعتبار فلسطين دولة مُراقبة فى
الأمم المتحدة .. وهى اللى فرَّقت بين الفصائل
الفلسطينية .. وهى اللى رفعت الأسعار
، وحفرت
الأنفاق ،
وهرَّبت المساجين .. وإتنكرت فى هَيئة
عامل المَزلقان علشان تموَّت 57 طفل يادوب بيفتّحوا للدنيا
.. وهى اللى عَمَلِت عمل سُفلى للقضاة ،
ودَوبِتُه فى بُول نملة عاقر .. ورشرشته
على عتبة نادى القضاة .. وتحت عتبات كل المحاكم فى مصر ( تخيَّل بقى محتاجين كام
لتر بُول من النملة العاقر علشان ندوب فيها العمل ..
وماتستهونش بالحكاية لأن التخطيط ده بدأ من بداية الثورة .. والفلول كلهم متجندين
يدُوروا على كل النملات العاقر علشان يقدروا بوفروا البُول الكافى ) والنتيجة
أمامكم آهيه .. وعلى عينك ياتاجر .. نجحت خطتهم والعمل السُفلى بان مفعوله .. والقضاة أتقلبوا فلول وثاروا على
الرئيس ونظامه .. وطبعا الفلول هى اللى
حرقت مقرَّات الجماعة !! .. ودلوقت بتعمل مُؤامرة كُبرى على الرئيس!! .. يانهار
أسود ومنيِّل بسُتمِيت نِيلة سُودة !!
آتارى الفلول دى كَيان هايل ومُنظم جداً وقادر يتحكِّم فى مَصيرالعِباد
والبلاد، والبلاد التانيَة ِ أكتر
من أمريكا وروسيا والصين .. دى فلووول يابــا .. ولو شِيلنا اللام حايبقى فووول ..
وأنت عارف بقى تأثير الفول !! ويظهر الفوول أثر فعلاً على أدمِغة الجماعة ..
وخلاّهم يلّوًّشوا !! .. ويتخبَّطوا .. ومش عارفين كوعهُم من بووعهُم !!
بالذمة مش مكسُوفين من نفسكم وأنتم بتقولوا كده ؟ .. وأنتم عارفين مين هُمَّه
الفلول .. المُفترض إن الفلول هُمَّه اللى
ساعدوا ، أو تعاونوا ، أو ساندوا ، أو عملوا ، أو أيَّدوا ، أو أتكلموا مع النظام السابق !! يعنى الفلول هُمَّه رؤساء الجامعات اللى لسه فى مراكزهم بعد الثورة
من الصف الأول والتانى والتالت كمان .. وهم رجال البوليس من رُتبة لِواء ونازل ولِسَه
فى الخِدمة .. ورجال الجيش وبعض الوزراء فى الحكومة الحالية وبعض مُستشارى الرئيس
، وكل وكلاء الوزارات الحاليين .. وبعض المُحافظين الحاليين ، وكل رؤساء الأقسام
فى المصالح والهيئات والشركات الحكومية وغير الحكومية .. وشيوخ الأزهر .. وقساوسة
الكنائس ، ورؤساء الصُحف ، ووزير ورئيس ومذيعين ومذيعات التليفزيون المصرى .. وأُقعُد
عِدْ بَقى كده لغاية ماتوصَل للعامل البسيط فى
مَركز شباب نجع أبوالرُكب ..
أفتكر عيب قوى تتهموا الفلول اللى
هُمَّه مش عارفين ولا حاسبين نفسهم فلول من الأصل .. والفلول الحقيقية فى السجن
وكام واحد هربانين بره وجُوَه مصر .. وبما أن الجماعة هى اللى بتحكُم .. يبقىَ هى
اللى عليها تمسك الفلول وتوَرينا الدلائل على إنهم فلول وِلاد سِتين فى سَبعين .. وهُمَّه اللى موقعِين بين الجماعة
والشعب كله !!
بالتفكير العقيم ده تبقى مصر كلها فلول .. ويبقى عندهم حق لما يقولوا إن
اللى فى الميدان فلول !!.. و ياعزيزى كلنا فلول !!
وبكده يبقى مافيش أمام الجماعة ( علشان تضمن
السلامة ) إلا حاجة من الإتنين :
إما
يأخونوا الفلول !!.. أو يفلولوا الإخوان !!!!!
**************
ــــ
تم إعادة النشر بجريدة ( فيوتشر شرم ) ــ عدد السبت 8 ديسمبر 2012 http://www.sharmnews.com/?p=16197
************************
ـــ
تم نشر المقال بجريدة ( المصرى المهاجر ) الصادرة بلوس أنجلوس ـ كاليفورنيا
ـ الولايات المتحدة الأمريكية ــ عدد السبت 1 ديسمبر 2012
http://almasry-almohager.com/Salah_Edris120112.php
بقلـــــم
صـــلاح
إدريـــــــــس
salahedris@gmail.com
مدون بالبلــدى الفصيـــــح
تشريفكم لمدونتى
يسعدنى .. ويمتعّكم ، وقد يفيدكم
http://plackprince.blogspot.com/
ليست هناك تعليقات:
إرسال تعليق