فالنتاين
الحمـــــــــــــــــــــير
ـــــــــــــــــــــــــــــــــــــــــــــــــــــــــ
الأسبوع ده قررت عدم الكلام فى السياسة
.. لأن ماعنديش جديد أقوله .. لأن الحكومة المصرية ماعندهاش جديد تعمله .. وقررت
أحكيلكم عن فالنتاين الحمير ، وحفلة جميلة
حضرتها .. وشهدت فيها محاولة قتل الحمار بعجر .. وأختطاف معشوقته الحمارة شكورة ..
بس لو أنت برضه غاوى سياسة يبقى ياريت
تحاول قراءة مابين السطور .. وأكيد حاتلاقى سياسة .. ولو فشلت يبقى خلينا فى اللى
نفهمه أحسن .. ( الحمير ) .
ولأنى من مدة طويلة ماحضرتش حفلات ..
فقد قبلت الدعوة الحميرى .. ولبست اللى
على الحبل كله .. وذهت للحفلة .
وفي جو مليان حب وبهجة ... في دنيا هادية
ولطيفة طالع منها ريحة الحب و العشق والروث المجفف المنبعث من قاعة الحفلة ( اسطبل المبرطع )
بدرب الجميز فى عزبة المصدى .. .. ووسط
أقواس مبهجة من البرسيم ، والتبن ( ولأول
مرة أشوف برسيم أحمر زى فانلة الأهلى .. وتبن فوشيا زى فانلة الزمالك ) .. إتجمعت الحمير من كل شكل ولون ... وعلى أنغام أغنية
) بحبك يا حمار( ... الحمير ترقص .. وترفس... ليعلنوا للعالم أن عيد الحب
عندهم لايوجد شبيه له بين
الأعياد ... هو يوم مليان .. بالنهيق ، والعياط ، والصوات ... يوم من غير مشاغل ، ولا شقى .. ولاتحميل ، ولاضرب بالكرباج ،والخرزانة
.. (طبعا ياعمنا مش عيد حب الحمير .)
وعلى البوفيه الأرضى تراصت أشهر أنواع الطعام
.. يدءا من شوربة البرسيم .. مرورا بالجزر المسلوق .. وكالينوللى التبن .. وقشر
البطيخ المعجون بمياه المِسقة .. وعيدان القصب الممصوص ..وأنتهاءا بمحشى
الحمير وهو عبارة عن أوراق اللفت الخضراء المحشية بالذرة المطحونة .
الست الفاضلة الحمارة ( برطمانة ).. ومن ملامحها اللى عليها مسحة جمال تقدر تعرف إنها كانت حمارة حلوة وشقية فى شبابها .. وهى أم الحمار (بعجر) تحاول أن تفرح ضناها وتسعده ... وبتدور له من مدة طويلة عن حمارة بنت حلال ومأصّلة ..وترضى بقليله تكون له الزوجة المخلصة ذات النهيق الممتع ... ومافيش فرصة تدور وتنقى أحسن من اللمة الحلوة دى من الحمير ... وبدأت بالفعل تتكلم مع الحمارات صاحباتها وجيرانها من الأسطبلات اللى حواليهم ، عن ولدها وجماله ... وفلوسه الكتير اللى جمعها من عرقه وشقاه ..وشحطته ليل ونهار بين الغيطان .. وأسواق الخضار .. وأسواق الروبابكيا .. وركوب العيال والكبار فى الجناين .. والحوارى .
والحمار( بعجر ) صبور.. غيور.. أتركب كتير المسكين .. وعمل ضهره مداس للى يسوى واللى مايسواش .. وشال بلاوى مايقدرش يشيلها غير الجبال لكن ربنا كرمه ..وبعد كام سنه بقى الحمار الكبير .. والمعلم بتاع الحمير .
وشَرَف الحفله بعد ماوصلته دعوة رسمية من منظمى الحفلة ــــــ
رابطة الرفق بالإنسان الحقوقية ــــ... ( الحمارة كيكى ..وجوزها الحمار خَنْفَر ) اللى دخل
الحفلة بذيله الطويل الأنيق.. وقوامه الممشوق ... ويرتدى
أحدث الأزياء من البرادع المستوردة ..وبعض الحمير شايلين الشنط بتاعته ، وهو
يمشي مفتونٌا بنفسه ... ويقول ياأرض أتهدى ..
ماعليكى أددى !!.. ومراته كيكى لاتقل عنه غرورا وفشخرة .. ببردعتها المزينة
بالترتر وخّرَج النجف .. وحِدوة كعب عالى مبتكرة ومصنوعه من الجلد القوى .. وتضع
لونا جديدا من الروج بلون زرقة النيلة ، ويتوافق
مع لون الحِدوة الجلد !! وتتعطر بالعطر النفاذ ( أكوا ميلون ) .. وهو برائحة قشر
البطيخ الرائعة والمستخرج من المراعى الأسترالية الشهيرة .
ويبدأ الحفل البهيج ... ويصعد الحمار الأسود المتصابى .. والمتخصص فى تقديم حفلات البهايم ( بلعوط ) على الخشبة ليرحبَ بالضيوف ، وكافة الحمير التي جاءت من بعيد .. ومن كل زريبة ،وغيط رغم بُعد المسافات .. ويعلن عن بداية الحفل التأسيسي لعيد حب الحمير.
تتقارب الحمير
من بعضها
.. و تذوب عشقاً .. والكل هائم بحمارته.. وكل حمارة ضايعة في حمارها..
اما
الحمير البيبى ، صغار السن فهم يستمتعون باللهوِ في أصناف الطعام و الحلويات المصنوعة من البرسيم والتبن . .. كل ده وصوت المطرب الحمار وهو يغنى .. (
العنب .. العنب .. العنب ) .
ويقترب الحمار ( بعجر ) من حبيبته
الحمارة ( شكورة ) و يغني
لها !!
عفواً ... ينهق لها بأغنية :ــكل عام وانت الحب / يارب ما تفرقنا
حبيبي مهما ترفسني / بيكبر حبنا معانا ...
على نهيقك انا بصحى / وعلى رفسك انام الليل
اذا دمعي نزل مني / حوافرك تكون منديل
تمر سنين .. وتيجي سنين / وانا وياك احلى حمارين
وينهي الحمار أغنيته ..ويكمل (بعجر) كلامه اللى مليان غرام ... وشكل بعجر كده متعلقٌ بحمارته شكورة من مدة طويلة لدرجة أنه قال لها
(( قولي أحبكِ كي تزيد حميرتى
فبغير حبكِ لا أكون حمارا ))
ولكن ظروف عمله جعلته يبتعد عنها ، وعن نهيقها الدائم .... كذلك هيّ لا زالت مخلصة له بحبها ... تحمل له كل مشاعر العشق الحيوانية ، مستعيدة ذكرياتهما معا فى غيط الحاج بهنسى ، وهما يتشاركان فى نقل محصول الطماطم ، والجرجير ، والبرتقال .. ويتناوبان دوران الساقية مع التور (فووقان ) ...
إلا إنها هذه المرة طلبت منه أن يتقدم لخطبتها ، لأن سيرتها بقت على كل لسان فى الأسطبلات والزرايب ... لأن عيون بعض الحمير والبغال تترصدها من زمن .... خصوصا البغل اللى أسمه ( بليلة ) أبو دم تقيل .. وبمجرد سماع بعجر لأسم بليلة غريمه القديم ، نهق بصوت عالٍ ... وأتجنن ... وأتنطر من الأرض واتجه إلى وسط الحفلة يدور عن البغل ( بليلة ) .. وفى هذه اللحظة ..كانت الفرقة تعزف أغنية ( جرب نار الغيره )
وأترسمت على وجه ( بعجر ).. تكشيرة كبيرة وملامحه غاضبة ناهقة ... ولعابه يسيل من فمه المسمسم ...وهو يبحث فى جنون وعصبية عن البغل ( بليلة ).... فتذكّر أن هذا العيد مخصصٌ للحمير فقط ، مش للبغال ..ويقترب ( بعجر) من أمه ( برطمانة ) ويعرفها انه بيحب شكورة من زمان وقررَّ يتجوزها ... فرحت الأم حتى رَفّسِت و قعدت تزغرد ( عفواً تنهق ) ، فالحمارة شكورة من الحمير الجيدة الأصيلة .. ذات الصبر الشديد .. رغم أن ظروفها المالية تعبانة شوية مقارنة مع عائلة الحمار (بعجر) ... وعائلتها مش ولابد فأبوها الحمار ( زغرب ) عاش ومات وهو بيجر عربية عم فرحان بتاع الفول .. ولكن يشفع لها أنها كانت ضمن الأسماء المنقولة لمركز التطوير و التحمير .. وفى الآخر ستكون (شكورة ) حرم الحمار( بعجر ) ويتوجوا علاقة العشق القديمة بالزواج الميمون .
في هذه الاثناء يدخل غريم بعجر البغل ( بليلة ) و معاه شلة من البغال القبرصية الصايعة .. واللى بيقولوا عليها أشهر البغال ، واللي بتتميز بقوة العضلات ، و سرعة الحركة ... وليه لا ؟ فالبغال حيوانات هجينة نتيجة لتزاوج غير شرعى بين الحمار والفرس.. فاللبغل صبر الحمار و قوة الفرس ... دخل (بليلة) متحفزا وناويا ع الشر ، يدور ويفتش عن الحمار( بعجر ) اللى خطف منه الحمارة ( شكورة ) ... ولَمَحُه من بعيد فى ركن الحفلة يلعق بلسانه الطويل المياه المخلوطة بالسكر فى الحوض المحفور بجوار البوفيه .. ، قرّب منه بتلصص وخسة .. و رفسه رفسة جامدة ، قاسية ، مليانة حقد ، وحسد ، وغيظ حميرى .. وسقط (بعجر) على الأرض ياولداه ... و الحمير تنهق ، وتنهق ... أما الحمارة (شكورة ) فقد أغمى عليها من خَضِتها على حبيبها .. و هربت البغال البلطجية ،و أطفئت الانوار ، وأتقلبت الحفلة من رقص وغناء ، إلى نهيق وبكاء ورفس ... ونقلوا الحمار(بعجر ) على الوحدة البيطرية القريبة من الحفل .. وكشف عليه الدكاترة .. وقالوا عنده أرتجاج فى المخ، ونزيف داخلى ،ولازم له نقل دم .. بس فصيلته نادره ( أو. شيى ) وأحتاروا حايجيبوا الفصيلة النادرة دى منين دلوقت ؟.. والدنيا ليل قرب الفجر .. والدكاتره قالوا لو مااتنقلوش دم خلال ساعة حايموت !! .. فطلبت الحمارة (شكورة ) أن يحللوا دمها لأنها مش عارفه فصيلتها أيه ؟ (طبعا مش حماره) !! وكانت المفاجأة أن فصيلة دمها ( ب . هسس ) وهى فصيلة نادرة وممكن تعطى أى حمار .. وأتحلت المشكلة .. ونقلوا الدم مباشرة من (شكورة ) (لبعجر) .. وياعينى على منظرهم والأتنين نايمين ممددين جنب بعض .. وبينهم خراطيم الجلوكوز .. وشكاير نقل الدم .. صورة جميلة ، لقطها الحمار ( زُنفل ) علشان يحطها على صفحته بالحمير بوك .. وأتلاقت عيون العاشقين .. ولمحت فى شكورة عيون بعجر الأمتنان .. ولمح بعجر فى عيون شكورة الحب ،والحنان .. وسرح كل واحد منهم فى عيون التانى .. وقلوبهم مليانة أحاسيس حميرية حلوة .. وفجأة وجدوا كل حمير الحفلة حواليهم ..وهم بيغنوا ( أركب الحنطور .. وأتحنطر ) ..وأتنقلت الحفلة من الأسطبل الكبير ، للعناية المركزة .. وفضلوا يرقصوا .. ويغنوا لغاية ما الشمس طلعت .. وخرجوا من الوحدة البيطرية .. وهم بيغنوا ( بوس الواوا ) .. بعد ماأتطمنوا على بعجر ، بعد نقله لغرفة النقاهة و(بعجر وشكورة ) بيبصوا عليهم من وراء الستارة.. والسعادة تملأ عيونهم وقلوبهم .. ولسان حالهم بيقول ( ده أجمل عيد حب حميرى عشناه ) .
وأثناء عودتى من الحفلة مشيا على الأقدام بعد
ماعربيتى إتدغدغِت بسبب تدافع البغال
القبرصية عند هروبها وهى مرعوبة .. لقيت
البغل ( بليلة ) بيجرى وهو مرعوب .. و بعد
ماهربوا كل أصحابه البغال القبارصه .. معتقدا إن بعجر مات ، وإن الإعدام بالرصاص
مصيره .. فمسكته ، وضربته كام شلوت ، وكام
لسعة بجر يدة لقيتها فى الشارع ، وفهمته إن بعجر ماماتش وبخير ، وفجأة لقيته
بيتنطط من الفرحة ، وبيرفس برجليه الإتنين مع بعض ، ولما بطل رفس ركبته لغاية البيت ..وهو بيعيط
ويرجونى إنى أكلم صاحبى ( بعجر ) علشان يسامحه ،ومايبلغش عنه شرطة الحمير.. وقد وعدته بذلك ،
وتم بالفعل فقد سامحه بعجر .. أحتفالا بيوم الحب وضرورة التسامح مع الآخرين ..وعلشان
خاطرى ، وهو يعلم مقدار حبى وأحترامى للحمير .. ودعانى لحفل زواجه بشكوره . .. ويمكن فى يوم ما أحكيلكم عن حفل زواج بعجر وشكورة ..فقد كان
حفلا أسطوريا تحكى به كل الحيوانات وتتحاكى
لغاية دلوقت .
وكل عيد حب
وأحنا والحمير طيبين .
بقلـــــم
صــلاح إدريــس
مدون
بالبلــدى الفصيـــــح
تشريفكم لمدونتى يسعدنى .. ويمتعّكم ، وقد يفيدكم
http://plackprince.blogspot.com/
ليست هناك تعليقات:
إرسال تعليق