حكومة تايهة .. واللى يلاقيها ياخدها !!
وقعدنا 3 أيام بلياليهم (والحاج التايه ) يزَعق بصوته الجعورى الأقوى من صوت حمارة !! حكومة تايهة ياولاد الحلال .. تعرفهم من وشوشهم العِكرة .. ويتميزون بالغباء الشديد وتقدر تلاحظة بسهولة على ملامحهم .. وحاتلاقى هدومهم وسخة لأن بقالهم 3 أيام تايهين وماحدش غيّر لهم !! اللى يلاقيهم له الأجر والثواب على الله .. والثواب حايبقى مضاعف لو أنك لقيتهم وبعدين غرقتهم فى براميل جاز وبنزبن ( من اللى بيترموا فى الصحرا ) .. وبعود كبريت ظغنن تولع فيهم .. وتفضل واقف لغاية ماتتأكد أنهم بقوا فحمة !!..ولك الأجر والثواب على الله .. وعليهم مكافأة مجزية من تبرعات المصريين !!
لكن ربك ماأردش لنا الخير .. ولقينا الحكومة كلها ( للأسف ) فى أماكن متفرقة..
لقينا الرئيس مرسى بيصلى الجمعة فى توشكى. ، وأحد المستشارين صرّح بأن
الرياسة قررت تخلى الجمعة مرتين فى الأسبوع .. وإضافة جمعة ( أحتياطى ) يوم
الثلاثاء .. علشان الريس ياخد راحته فى الوعظ والإرشاد .. والحمدلله أن الواحد شاف اليوم اللى يحكم مصر
فيه (خطيب جامع )!!
أما الكتكوت النونو رئيس الوزراء القنديل ، لقيناه بيلعب المزرعة الحديثة .. وبيوزع هدايا على ستات الأسرة عبارة عن ( مطهر موضعى )!! .. وبيحاول يقترض من كل الأصدقاء والأعداء علشان يدفع فاتورة الكهربا ء لأنه لو مادفعش الفاتورة حايقطعوا الكهرباء .. ومش حايعرف يلعب سلفنى شكرا تانى ..ويتضاعف عجز الموازنة .
ولقينا الواد زكى بِشلة ، والواد أباصيرى برشامة ، ومعاهم المعلم عبده ألحقنى ..التلاتة الأندال دوول كانوا خاطفين وزير الاستثمار ومخبيينه فى بدروم أم بعجر الداية .. وكانوا طالبين فدية 2 مليون جنيه !! ولما ماحدش سأل ولا عبّرهم نزلوها لغاية 300 جنيه .. وفى الآخر أنتهت على 1000 جنيه همه اللى حايدفعوها لأى حد يرضى ياخد الوزير !!
وزير الأوقاف وشيخ الأزهر بقى كانا
يحتفلا بالمفتى الجديد ، والتلاتة أتشالوا هيلا بيلا من على الأكل ياحرام ..
وأترحلوا لسيناء .. علشان جماعات الجهاد هناك كانوا عايزين يفهموهم الدين الإسلامى
الصحيح !!
وزيرى الرى والبيئة لقيناهم قاطعين النفس من الجرى وراء بقعة زيت جديدة ..ولعبقريتهما فقد توصلا لحل رائع للتخلص من حكاية بقع الزيت المتكررة دى !! .. وهو أن يولعا نار جامدة فى مجرى النيل تحت البقعة ..وبكده الزيت حايتبخر وكمان أى سمكة ماشية بالصدفة حاتتقلى على طول !!.. ويبقى بذكاء نادر خلصنا من بقع الزيت وأكلنا سمك مقلى !!
وزير التنمية المحلية كان متقوقع فى عوامة على النيل بيفكر فى قرار عبقرى
مايخُرش الميه هو تأجير ميدان التحرير .. وكل ميادين مصر لقطر
!! وهيه بقى تشيل شيلة المتظاهرين والمعتصمين بطريقتها لأن الميادين ستصبح تحت السيادة القطرية !!
وزير الداخلية ياولداه كان محتاس بيدور على عربيته اللى أتسرقت من أمام
الوزارة من كام يوم .. وفى الآخر عِرف إن الواد ( بِنسه السريع ) هو اللى سرقها
وباعها فى العريش ..وأتهربت بعون الله من الأنفاق .. وهنا الراجل سلّم أمرُه لله
!!
وزير المواصلات كان مزنوق فى إشارة مرور رمسيس من شهر سبتمبر الماضى .. ولما زهق أخيرا قرر يركب المترو .. لقى الأبواب مقفوله والعمال مُضربين .. وماكانش أمامه غير إنه ياخدها دِنجه دِنجه على رجليه .. ولحقناه قبل مايعدى أحمد حلمى !!
وزير الصحة كان تعبان شوية ، وبيعانى من عِرق النِسا ، ولأنه لايثق فى
المستشفيات المصرية فقد نقلوه بطائرة خاصة لزمبابوى لتقدم الطب هناك !!!
وزيرى
التعليم ، والتعليم العالى كانا فى
شقة الأستاذ عبده الموس المدرس بيتابعوا
دروسهما لتقوية لغتهم الأنجليزية لزوم
مقابلة ضيوف الدولة من الوزراء الفرنجة !!.. وأتعلموا إزاى مايعملوش ( درايفنج )
وهما ( درونك )!!
وزير الرياضة كان خرمان كورة وكان
بيتفرج على دورى الحوارى للكرة الشراب .. والمقام فى حارة الكراكون بكوم
الشقافة .. وعلى أنوار الكلوبات أم
فتايل !! وعلى طريقة اليهودى اللى كاتب
على محله ( حلاق وترزى وتصليح ساعات ) .. كان الوزير يحفذ الجماهير لأنتخاب الحرية
والعدالة فى الأنتخابات القادمة .. واللى حايعطيهم صوته حاياخد إما صاروخ .. أو
شمروخ .. أو خازوق هدية !!
أما باقى الوزراء فلقيناهم متجمعين مع بعض فى فيللا بالمقطم بتاعة وزير الأتصالات وبيتفرجوا على القنوات الأباحية كلها والوزير بيمسحها واحدة .. واحدة ، ولأن القنوات بالملايين فالمتوقع من أنتهاء الفُرجة فى مايو .2019 .. بالإضافة أنهم هاريين نفسهم فُرجة على قنوات الرقص الشرقى !! فبعد إلغاء قناة التيت من النايل سات .. ظهرت قناة التيت فى نفس يوم إلغاؤها على النايل سات .. بس بتردد جديد .. ومعاها قناتين رقص جداد هما ( توم تك .. و .. دلع 3 ) ..وفيه إشاعة بتقول إن المرشد ومكتب الإخوان كانوا واخدين وصلة وبيتفرجوا فى الخباثة !! بس مش عايز أظلمهم وبأؤكد على إنها إشاعة والله أعلم بحقيقتها !!
المهم إن الفايدة الوحيدة للشعب المصرى إنه لغاية مانوصل لـ 2019 ..الوزراء وقتها مش حايتبقى منهم إلا شوية عضم من كُتر الفُرجة !! .. فنحطهم فى قُفة ونرميهم لأى كلب مسروع !!
بقلــم
صــلاح إدريــــس
***
ـــ
تمة نشر المقال بجريدة ( الفراعنة اليوم )
الخميس 14 مارس 2013 ــ على الرابط
التالى :ــ
http://www.pharaohstoday.com/%D8%B5%D9%84%D8%A7%D8%AD-%D8%A5%D8%A
صـــلاح إدريـــــــــس
salahedris@gmail.com
مدون بالبلــدى الفصيـــــح
تشريفكم لمدونتى
يسعدنى .. ويمتعّكم ، وقد يفيدكم
http://plackprince.blogspot.com/
ليست هناك تعليقات:
إرسال تعليق