أستقبال إمبراطورى

أستقبــال إمبراطــورى لبوتيــن

ــــــــــــــــــــــــــــــــــــــــــــــــــ

            حد  فيكم شاف أستقبال بوتين الرسمى   ،  من شوية  فى  قصر القبة ..  خلونى أوصفه لكم ..  أولا  موتوسيكلات الحرس الجمهورى  رافقت الضيف  من مكان إقامته   ، لحد باب القصر  الخارجى   ( بقالنا زماااان ماشفناش الموتوسيكلات دى ) .. وبعدين رافقه عدد 24 من فرسان الحرس الجمهورى على الخيول العربية الأصيلة  فى شوارع القصر الداخلية    .. ثم عودة للموتوسيكلات  قرب باب القصر الداخلى .. وأثناء ذلك أطلقت المدفعية 21 طلقة ..  وكان الرئيس السيسى  مستقبلا على سجاده حمراء زاهية ( الظاهر أنها جديدة ) عاملة  زى  (الريد كاربيت ) بتاعة مهرجان كان السينمائى  .. وأستقبل السيسى  الضيف العظيم  بحرارة مصرية خالصة ..ثم عزفت الموسيقى العسكرية  السلام الروسى ،  ثم المصرى  .. ثم  رحبت مجموعة كبيرة من الأطفال  ( الحلوين المنورين )  وهى ترفع الأعلام الروسية  الضيف  ، وهى تهتف بعبارات التحية باللغة الروسية والعربية ..  ثم بدأ السلام والتعرف  على كبار المسئولين فى البلدين ،  ثم جلسة ثنائية رايفة أمام المدفأة  بين الرئيسين  وصوروا  بقى يامصورين   ،  وحاجات ومحتاجات ،  وواضح طبعا إنبساط  ،  بل إنشكاح بونين على الأخر هو واللى معاه  .

      بصراحة الأستقبال  إمبراطورى عظيم .. والسيسى شكله بيضرب عصفورين بحجر .. يكسب ود وتأييد روسيا  ، حكومة وشعب للمواقف المصرية ولكل تعاون ممكن  .. والعصفور التانى هو أنه بيطلع لسانه لأوباما  ، وبيقوله أمك فى العش ولا طارت  !! أنتم أستقبلتم إرهابيين ( سريا ) فى البيت الأبيض ,, وأحنا بنستقبل رئيس دولة عظمى ، على مرأى من العالم كله  ( وهو فى أضعف حالاته ) ولكنه يستحق منا هذا الأستقبال العظيم  ، لأننا على ثقة من  عودة روسيا  للساحة الدولية  ،  كقوة عظمى . وكفاية أن بوتين واللى معاه طايرين من الفرح  ، وعندهم أستعداد لتقديم عيونهم لمصر .. ولو مش مصدق أسأله لما يقابلك بكره .