بالبلــدى الفصيـــح :
ليليان داوود
ـــــــــــــــــــــ
ليليان داوود مذيعة لبنانية مثقفة جدا ، وتقدم برنامج
(الصورة الكاملة ) على قتاة أون تى فى .. تتميز بأنها تذاكر جيدا موضوع الحلقة بتاعتها ، والسيرة الذاتية
لضيوفها .. وهو مايفتقده أغلب مذيعينا
ومذيعاتنا .
ليليان بقالها كام يوم بتتعرض
لحملة شعواء من يعض المجانين المنحرفين ذهنيا ، ويهاجمونها بشراسة وقلة أدب ، وخروج عن اللياقة
والأصول .. وأخيرا عملوا صفحة تطالب برحيل ليليان داود من مصر .. والسبب انهم معترضين على
بعض آراؤها الشخصية ، واللى بيقولها آلاف
المثقفين ، والصحفيين ، والكُتاب ، فى كل مكان .. ولما لقوا أن السبب ده مش كفاية
بدأوا يلفقوا كلام تانى ..على لسانها من
اللى ماشى اليومين دوول .. بتهين مصر المصريين
.. بتشتم فى السيسى .. بتطالب المصريين اللى مش عاجبهم كلامها بالرحيل .. وكلام
خايب من كل لون .. وبرضة علشان أتأكد من قبل ماأكتب المقال بحثت عن أى كلام من النوع ده ، على جوجل
ويوتيوب ، تكون ليليان قالته فلم أجد أى شىء على الإطلاق ، والموضوع كله تلفيق
وأفتراء عليها!!
ومن أولها كده أنت بتطالب برحيلها من بيت أبوك لمؤاخذة ..
ومين اللى أعطاك الحق تطرد ده
وترحب بده .. مش يمكن أنت نفسك غير مرغوب فيك .. ولو فرضنا إن المختلف معاك
فى الرأى مصرى مش لبنانى حاتقتله
مثلا ، ولا تقف تحت بلكونته وتحدّفه
بالطوب والطماطم المعفصة !! أحنا بقينا للأسف
نسفّه ، ونحُط ، ونحقّر ، ونلعن سلسفيل أى حد يختلف معانا فى الرأى .. يعنى
ياتكون معايا ياإما أنت عدوى!! .. أيه
الخيابة وقلة الحيلة ، اللى وصلنلها دى ..
وحرية أيه اللى كلنا بنطالب بيها وأجنا مش طايقين
رأى تانى غير رأينا .. عدالة أيه
اللى عايزينها وأحنا أصلا نازلين ظلم فى
بعضنا لأتفه الأمور!! شفافية ومصداقية أيه اللى بنطلبها من الدولة
، والجميع وأحنا
بنتنفس كذب ، وبنلفق الكلام ،
والصور ، والمواقف للمختلف معانا فى
الرأى.
كفايانا بقى تمسكنا بالرأى الواحد بتاعنا بس .. ولازم نسمع
رأى تانى ، وتالت ، ورابع ، وعاشر ، فالأختلاف رحمة .. ويكفينا شعار الإمام الشافعى رضوان الله عليه (( قد يكون رأيى خطأ يحتمل الصواب .. ورأى غيرى
صوابا يحتمل الخطأ )) .. لكن تقول لمين ؟ ومين يسمع .. علّم فى المتبلّم .. يصبح
ناسى .. ولكل داء دواء يستطب به .. إلا الحماقة أعيت من يداويها .
بقلــــــــــــــــــــــــم
صـــــــــلاح إدريـــــــــــــــس
salahedris@gmail.com
مدون بالبلــدى الفصيـــــح
ــــــ
ليست هناك تعليقات:
إرسال تعليق