المقال هام جدا جدا .. تم نشره اليوم الخميس 15 أكتوبر
بجريدة الوطن .. ويهمنى رأيك جدا .
بالبلدى الفصيح
:ــ
اللى مايشوفش م الغربال .. يبقى أعمــى !!
ـــــــــــــــــــــــــــــــــــــــــــــــــــــــــــــــــــــــــــــــ
بعد
ترقب وبحث ومراجعة .. أنا ضد المشروعات القومية العملاقة !! بإستثناء مشروع قناة السويس الجديدة ، ومايتبعه
من تنمية لمحور القناة ، لأنه من المشروعات الواجبة منذ زمن طويل ، ومضمونة النجاح
، وقد حققت القناة فعلا عائد زيادة فى نفس شهر إفتتاحها والحمدلله .
ـــ لكن فيه مشروعات تانية واضح للأعمى فشلها قبل
بدءها ، فمثلا ماينفعش نصرف مليارات على
ملايين الأفدنة البور لأستصلاحها ، وعائدها حايرجع بعد 5 أو 6 سنين ، وكمان مش
حايرجع بالفائدة المطلوبة !!ّ والأحسن
أننا نحسن زراعتنا الموجودة فعلا ، وننوعها ، ونسعى للتصدير ، ونقعد مع الفلاح
الحقيقى ، ونشوف مشاكله وبلاويه ،مثلا بنك التنمية الزراعى اللى بياخد منه فوايد
أكتر من 30% ، ومشاكل كتيرة فى الزراعة
مايعرفهاش غير الفلاح .
مثلا ليه مايكونش التسويق مباشر من الفلاح للمستهلك ؟، كما وعد الرئيس عند بداية توليه ، الخطوة دى لوحدها حاتخفض سعر الفواكه
والخضروات لأكثر من 70 % بدل الغابة المسعورة فى أسعار الخضروات اللى بتشتكى منها
كل البيوت الغنية قبل الفقيرة
ـــ الأحتياطى
النقدى أنخفض أكتر من 2 مليار دولار فى 8 شهور !!
ـــ الدولار فى أرتفاع مستمر .. ومحدش لاقيه .. وشكلنا حانرجع للسوق السوداء ، ونخبط تانى
فى الحيطة !!
ـــ حانبتدى البناء فى العاصمة الإدارية الجديدة ،
وحاتتكلف مليارات ، ويستمر العمل بها سنوات
مش محتاجينها قوى كده دلوقت ، واللى يعوزة البيت يحرم ع الجامع!!
ـــ المؤتمر
الأقتصادى بتاع شرم الشيخ اللى فرحنا بيه كلنا ، وهللنا له كثيرا .. للأسف لغاية
النهاردة لم يتنفذ 3% من التعاقدات اللى تمت .. بسبب معوقات الروتين ،والمتىخلفين الباركين ومعششين زى الغربان فى دواوين الوزارات ، ولايريدون أى تقدم لمصر ،
وكأنهم يعملون لحساب الأعداء !! تخيل أن حلم وهدف الشباك الواحد لإنهاء أعمال
المستثمر ، طلع فاطشة ، ووهم كبير .. لأنه لغاية النهاردة لم يصدر قانون الأستثمار
بطريقة نهائية ، يعنى باللائحة التنقيذية بتاعته ، بعد ماطلعوا عيون اللى خلفونا
وعملوا للقانون ده 14 مسودة .. تصور !! وبعد كده القانون سلقوووه قواو قوام علشان يلحقوا المؤتمر ، طلع
فيه أكتر من 33 عوار دستورى ، وكمان بنود
فى نفس القانون بتخالف وتعارض بعضها تماما .. يعنى بند يقول يمين .. وبعدين بند
تانى يقول شمال .. ولغاية النهاردة الوزير الباشا اللى أصدر القانون المعيب بيطالب ببعض التغييرات فيه من حذف وإضافة !!
وهو بسلامته لسه مطلع القانون من كام شهر بنفسه !!!
ده غير أن المستثمر لازم يحصل على موافقة 78 جهة بــ 199 إجراء إدارى علشان يتوافق على مشروعه .. يعنى يدينا
ويديك ويدى المستثمر طولة العمر ، والورثة بقى من الجيل الثالث همه اللى حاينفذوا
المشروع ، بعد مايااادوب يكونوا أنهوا الأجراءات وحصلوا على كل الموافقات .
وحاجات كتير قوى قوى محتاجه كُتب
علشان نتكلم عنها !!
ـــ أحنا بنعيش معاناة يومية فى حاجات كتيرة ،
ولازم نعطيها الأولوية الكاملة .. زى أكتر من 6000 مصنع مقفول وعمالتهم فى الشوارع
!! ولو بحثنا مشاكلهم وحليناها حاتشتغل
المصانع ، ويشتغل العمالة الضخمة اللى بيتفللوا فى الشمس !! وحايجيبوا
عائد بالمليارات خلال شهر واحد .
ـــ السياحة لو أهتمينا بها ،وركزنا
عليها ، وجندنا كل مجهوداتنا ، للنهوض بها ،وعودتها ،
حاتجيب لنا ملايين الدولارات السريعة خلال شهرين على الأكثر.. فالمعروف أن
السياحة هى العائد الأسرع ربحا فى
الأقتصاد .
ـــ الأهتمام بعشوائيات المدن ، ومشاكل القرى
المنسية من نقص مياه الشرب ، أو صرف صحى ، أو مراكز شباب ، ومراكز ثقافية .. لأن ببساطة لو عايز شعب يفهم ويساعد يبقى لازم توفر له أبسط وأول
أحتياجاته الأساسية .
ـــ طبعا
فيه تقصير فى حاجات تانية كتير ..
زى الصحة ،والتعليم والمواصلات ، والمرور ، والزيادة السكانية ،وغيرهم من مشاكلنا اليومية ، لكن الحاجات دى مسئوليتها
بتتوزع مابين الحكومة والشعب .. ويلزمنا ثورة سلوك على أنفسنا ، مع صحصحة
الحكومة وثورتها على الروتين والفساد
،علشان نحقق كل أمالنا وأحلامنا .
أوعى حد يقوللى أنت مالك قلبت ع الحكومة كده مرة واحدة ....ده مش صحيح
طبعا لكن اللى مابيشوفش م الغربال يبقى
أعمى .. وأحنا كلنا لازم نكون عين اللى بنحبهم ،وخايفين عليهم ، علشان نوريهم
خطأهم وخطاهم .. ونكشف لهم الطريق اللى يوصلهم ويوصلنا بالسلامة ، ونولع كشافات هيلوجين جامدة على الحفر والمطبات
اللى حفرها الأعداء ،على طول الطريق، علشان نقع فيها وتتكسر رقبتنا .
بقلـــــــــــــــم
صــــــلاح إدريــــــــــس
ليست هناك تعليقات:
إرسال تعليق