اللى أتلسع من الشوربة .. ينفخ فى
الزبــــادى !!
لليوم الخامس على التوالى تشتد المظاهرات فى تونس فى الذكرى الحامسة لثورة الياسمين .. بدأت
بمظاهرات للبطالة .. ثم تدخل أصحاب المصالح ، وبدأت المظاهرات تكبر، وتزيد فى تونس
كلها .. وكأن الأيام بتعيد نفسها ، وظل سقف المطالب فى الأرتفاع ،حتى طالب
المتظاهرين اليوم بإقالة الرئيس والحكومة .. و الرئيس الباجى قائد السيبسى أتهم
رسميا قطر بتمويل وتعزيز هذه المظاهرات
والقلاقل !!
والمثل المصرى بيقول : اللى أتلسع من الشوربة
.. ينفخ فى الزبادى .. أو لايُلدغ مؤمن من جحر مرتين .. ولكن هاهم التوانسة يتلسعوا
تااااانى من الشوربة .. وبرضه بيمدوا أيديهم لجحر التعابين ، اللى أتلدغوا منه قبل
كده .. الحالة اللى همه بيطالبوا بتغييرها دلوقت
أفضل شوية فى بعض النواحى من النظام السابق .. وأقل شوية منه ، لكن الأهم
هى النتائج اللى كلهم عاشوها لخمس سنوات .. فكيف يصل بهم الغباء لتكرار نفس
المشاهد ونفس الأحداث ؟، وماشيين بالعمى
الكلى لمصايب أكتر وأكبر ، والمرة دى مش
حاتستمر 5 سنوات أخرى !! لآ
المرة دى حايبقى دمار شامل ،
وياريتهم يبصوا ،ويراقبوا اللى بيحصل مع جارتهم
، الحيط بالحيط ليبيا ، ويشوفوا
اللى بيحصل فيها .. واللى أكيد أكيد هذه الفوضى الحالية حاتعطى الفرصة ( إن لم تكن
أعطت وخلاص ) لداعش ومحركيها من أصحاب
المصالح ، بالدخول إلى تونس ، وأستغلال مايحصل ، وزيادة الفوضى ،وسكب البنزين على النار ،علشان تولع أكتر
وأكتر .. وبعدين نرجع نقول ياريت اللى جرى ماكان .. ياريتهم يسمعوا فنانهم
العظيم ( لطفى بوشناق ) لما غنى وقال ((
خدوا المكاسب .. والمناصب .. لكن سيبولى الوطن )) .. لأن الوطن هو الأبقى
والأهم لمستقبل الأجيال القادمة ، لتعيش فى أمن وأمان وإزدهار ، فقدت تونس الألاف
من خيرة شبابها لتحقق لهذه الأجيال العيش
والحرية والكرامة والعدالة ..
لغايية النهاردة مات 3 فقط ورجل شرطة و40 جريح فى هذه المظاهرات .. ياريت نكتفى بكده بقى ، ويرجع اشقائنا التوانسة لعقلهم ، ويحافظوا
على مكاسبهم البسيطة علشان ربنا يزيدها،
وينميها ..
وبأقول للأغبياء من المصريين اللى بيصطادوا
فى الميه العُكرة ، وبيصرخوا بأن تونس
كانت المثل بالأمس .. ولازم تبقى المثل اليوم .. لأ وحياة شنبك ياكتكوت أنت وهو ، اللى حصل معانا فى 25 يناير 2011 كان ثورة
حقيقية شارك فيها الشعب كله .. وأتسرقت
بعد كده ،وتحولت لكارثة ،عايشين بيها ،وبتوابعها لغاية دلوقت .. وبسببها بنعانى كل
أنواع المعاناة طوال الخمس سنين اللى فاتت
.. صحيح الفساد لسه موجود ، والأمانى اللى أتمنيناها فى ثورة يناير لم تتحقق كلها
!! لكن محدش يقدر ينكر أن فيه مكاسب كتيرة أتحققت .. وبدأ يتضح ويبان الطريق الآمن
لنا جميعا ، والمصريين البسطاء بالذكاء
الكافى أنهم مايكرروش اللى حصل .. وطوال
الخمس سنين ولغاية النهاردة وأحنا بننفخ فى الزبادى .. ولا يمكن أبدا أن تلسعنا الشوربة مرة تانية !!
بقلــــــــم
صــــلاح إدريـــــس
salahedris@gmail.com
تم
نشر المقال بجريدة الوطن عدد الجمعة 21 يناير 2016
view-source:http://alwatneg.org/article/4147/_%D8%A7%D9%84%D9%84%D9%89_%D8%A3%D8%AA%D9%84%D8%B3%D8%B9_%D9%85%D9%86_%D8%A7%D9%84%D8%B4%D9%88%D8%B1%D8%A8%D8%A9_.._%D9%8A%D9%86%D9%81%D8%AE_%D9%81%D9%89_%D8%A7%D9%84%D8%B2%D8%A8%D9%80%D9%80%D9%80%D9%80%D8%A7%D8%AF%D9%89_!!
ليست هناك تعليقات:
إرسال تعليق