السيسى ومرتضى منصور .. والأولتراس .

السيسى ومرتضى منصور .. والأولتراس .

هاجم الرئيس السيسى أمس فى مداخلة تليفونية  مع عمرو أديب ، الحكومة  ،وتعامل سلطات الأمن مع رسام الكاريكاتير( إسلام جاويش) .. وأقر بإخفاق نظام الحكم في مصر في "التواصل والتفاهم" مع الشباب .. كما قال عن مشكلة الأولتراس : ((أننا لم نلتفت ،أو نهتم بكلام سابق لأحمد شوبير، حول الأولتراس، وأنه يجب أخذ الأحتياطات اللازمة معهم ،و الجلوس معهم ،والأستماع اليهم ..

ودعى الرئيس الأولتراس بأختيار 10 أفراد منهم ويشكلوا لجنة ، للأطلاع على كل التقارير والمحاضر التى تمت بخصوص شهداء بورسعيد ، وأن يبحثوا بأنفسهم بدقة ليعرفوا كلا الحقائق ، وأن الدولة ليس لديها ماتخفيه .. كما قال ، أنا لا أريد أن أسبب القلق للمصريين  ، ولكننا فى مرحلة تحديات كبيرة جدا جدا .. ولكننا على الطريق الصحيح وحاتشوفوا بأنفسكم ))

وكعادته كان الرد على الحكاية دى بذيئا من مرتضى منصور .. وقعد يصرخ ويقول: (( أنا أول واحد قعد مع الأولتراس ودول جماعة إرهابية مسلحة ،ولايجب على الرئيس الجلوس معهم .. ولو جلس معهم  سأطالب بالجلوس مع جماعة الأخوان )).. وكمل مرتضى بذاءته على عمرو أديب  لأنه رفض دخوله فى مكالمة لبرنامجه وقال بالحرف الواحد ((أوربت مش عزبة أبوك علشان ماترضاش تدخلني معاك في البرنامج، هناك مهلة حتى 15 فبراير لحل أزمتي مع الإعلام ، وإلا لن تدخل كاميرا إلى مباريات الزمالك أو إذاعة المباريات)) .. وبكده يبقى مرتضى منصور  بيعتبر نادى الزمالك عزبه أبوه !!

المشكلة ياأخوانى أن الدولة والمسئولين والكل كليلة بيعاملوا الشباب على أنهم رُضع صغار ، وكل واحد عامل فيها أب ،وكبير، وبينصحهم وبس ، من غير مايعرف أيه هى مشكلتهم الحقيقية ، ونسيوا كلهم أن الأب اللى عنده ولد واحد  بيتعب فى معاملته، ونصيحته ، وكلهم نسيوا برضه المثل اللى بيقول (( إن كِبر أبنك خاويه ) .. يعنى تكون صاحبه ،وتناقشه، وتسمع منه من غير ماتفرض رأيك عليه  ، ولو شوفت أن رأيه صح ، وعنده حق .. يبقى لازم على طول تتعامل معاه من هذه النقطة ،علشان تنجح فى حل مشاكله بجد .. وساعاتها حاتشوف قدرات الشباب الحقيقية .. لأننى مؤمن تماما أن مستقبل البلد دى فى إيد شبابها  مش شيوخها، ولا مسئوليها ولا منافقيها .. أعطوا الشباب قرصة علشان تطلعوا أحلى مافيه .. وأحلى مافيه مش حايطلعه إلا لما يقتنع أنك بتتعامل معاه وتناقشه على أنه راجل بجد ،مش عيل صغير  بتهدده بالضرب، أو تمنع عنه المصروف !! .