إزاى تواظب على الصلاة بحُب ومن غير تعب .
ــــــــــــــــــــــــــــــــــــــــــــــــــــــــــــــــــــــــــــــــــــ
ناس كتيير مابتصليش إلا فى شهر رمضان .. وآهو رمضان قرب .. ياريت بقى تحافظ على المواظبة على
الصلاة .. وحاأقولك طريقة سهلة ،ولذيذة تخليك تحافظ على صلاتك ،وتحبها كمان
وياريتك تبدأها من دلوقت وماتستناش شهؤ رمضان ..
كام خطوة كده تعملهم أسبوعين ،أو تلاتة ..وان شاء الله مواظبتك تزيد بشكل ملحوظ..
أولاً ترَقبّ أوقات الصلاة.. قبل مايأذن روح إتوضى .. ده ثواب لوحده أصلاً .. بالإضافة لـ إنه لما يأذن وتكون جاهز وعلى وضوء هتتشجع أكتر بكتير إنك تصلي على طول ..
صلاتك على وقتها ليها ثواب أكبر وأكمل ..
ده غير إنك كده بتعالج أهم المشاكل وهي التسويف والتأجيل والتأخير..
هتلاقي نفسك خلصتها بدري فـكانت خفيفة على قلبك وماحسيتش بـأي تقل.
حاجة كمان
ماتصليهاش كده وخلاص . خليها معاد فضفضتك مع ربنا
قسّم السجدات .. أول سجدة مثلا اشتكي لربنا من حاجة حصلت معاك ف يومك..فضفضله هترتاح ..وجايز فضفضتك دي تكون هي سبب ف الحل الي ربنا يبعتهولك بعدها .. وياريتك تكلم ربك زى مابتكلم صاحبك ..أو حبيبك اللى مابتخبيش عليه حاجة .. وكلامك معاه واضح ، ومن غير فذلكة ، وبلغتك ،ولهجتك العامية العادية ،ومن غير ماتحتاج تعمل فيها (أمرؤ القيس ) وتتكلم لغة عربية فصحى ، علشان تبقى على طبيعتك وبراحتك ..
تاني سجدة إشكره على حاجة فى يومك.. خللي أحداث يومك مُرتبطة بكلامك مع ربنا ..فالصلاة عشان تبقى دايماً متجددة.. وتبقى إنت دايماً مشتاق تروح تصلي ،وتتكلم ،وتحكي ،وتفضفض
.. تالت سجدة إدعي لنفسك بكل اللي تتمناه فى يومك .. وإختم دعائك بحاجات تتمناها فى آخرتك .. من رضا ربنا ،ودخول جنته بلا حساب ،أو سابقة عذاب، وإن ربنا يهديك ،ويهدي بيك ، ويرزقك الإخلاص ،ويتقبل منك ،ويعينك ،ويقويك على كل اللي يرضيه عنك .. وهكذااا
آخر سجدة خليها دعوات لحبايبك .. شوفت واحد صاحبك النهاردة مهموم مثلاً .. إدعيله بتفريج الهم ، شوفت صاحبك التاني بيغلط.. إدعيله بالهداية .. وهكذااا.. حتى الدعوات دي لما تخليها مرتبطة بتفاصيل يومك هتساعدك تشتاق للصلاة أكتر ، وتستناها عشان تدعي بيها ،وتحل أمور يومك كلها من خلالها..
وإختم ده كله بدعوات كتير إن ربنا يرزقك المواظبة على الصلاة ..ويتقبّل منك ،ويعينك على نفسك ،وعلى الشيطان ،ويوهبك التعلّق بالصلاة حد الإدمان..
حاجة أخيرة .. كل يوم إحفظ خمس آيات .. إقرأ بيهم في الخمس صلوات ..حبيت تقرأ بآية واحدة كل صلاة.. او تقرأهم كلهم في كل صلاة ..براحتك
المهم إنك كده هتضرب تلات عصافير بطوبة واحدة😃😄
أولاً هتحفظ كل يوم قرآن جديد .. وتحمي نفسك من هجر القرآن.. بالعكس دا انت ممكن تتفكرّ في الآية ،وتحس إنك أول مرة تفهمها لما تقرأها لوحدها كده وتركز فيها ، عشان تحفظها..
ثانياً هتساعد نفسك على التركيز فى الصلاة .. لإنك بتسمّع حاجة جديدة .. لازم تبقي مركز تماماً عشان ماتغلطش ، فـمفيش سرحان مع التركيز ..
ثالثاً هتستنى الصلوات عشان تسمّع فيهم .. هتدوّر عليهم عشان تتأكد من حفظك ،وعشان إنت دوقت ،وجربت إحساس هاايل ،هو حفظ القرآن ،والتركيز فى الصلاة في نفس الوقت..
ربنا يرزقكم الثبات ،ويزيدكم مواظبة على الصلوات ،و يوهبكم من عنده حُب وقُرب ...يااارب
والأهم أنكم تصلوا صلاتكم حبا .. مش فرضا .
ليست هناك تعليقات:
إرسال تعليق