نص العمى .. ولا العمى كُله !!
كتير من المصريين أتصدموا من القرارات الأٌقتصادية اللى ورا بعض .. ورا بعض
!!... وخصوصا الناس البسيطة اللى مش فاهمه غير أن الحكومة بتغلى عليهم عيشتهم وحياتهم
!! .. ورغم أن السيسى شرح ضرورة إتخاذ هذه الأجراءات كذا مرة فى خطاباته .. لكن
كتير من الناس مافهموش ، أو ماأستوعبوش .. أو مش عايزين يفهموا بالعِنية كده !!
أنا مع
القرارات الأقتصادية دى طبعا .. لكن مش مع التوقيت أبدا .. فالقرارات كان ممكن تستنى
أسبوعين تلاتة كمان ـ ومانصبش البنزين ع النار .. لكن ناس كتيرة بتقول إن الدولة لازم تثبت هيبتها .. وقراراتها لازم
تكون صارمة ،ولا تتأثر بأى عوامل أخرى ، مهما كانت خطورتها .. وهو منطق ووجهة نظر
مقبولتين بالطبع ، ولابد من أحترامهما .
عموما اللى حصل حصل ..ومفيش حاجة فى أيدنا دلوقت .. ولكن لتخفيف الحِمل
المعنوى على المواطن .. وعلشان نشعره بالعدالة
.. كان لازم الحكومة تتخذ الأجراءات اللى أتكلمت عنها من أسبوعين تقريبا ،
وقالت أنها تحت الدراسة زى :
ضم الصناديق الخاصة لميزانية الدولة ، وتخفيض
مرتبات الوزراء بنسبة 30% .. وتخفيض المستشارين للوزراء والهيئات بنسبة 75% ..وللبعثات
الدبلوماسية بنسبة 50% على الأقل من أعدادها ..
وضبط الأسواق وأسعارها .. وزيادة الرقابة وتكثيفها على الأسعار ، وبعد زيادة أسعار المحروقات يبقى حاترتفع أسعار المواصلات ،وأهمها طبعا الميكروباصات ،والتاكسيات ،والمترو ،والقطارات .. وكلها بتمس المواطن الغلبان مسّ مباشر!!
ولازم يتعمل حساب ده كويس قوى ..
بأن يتم تسعير الميكروباصات تسعيرات رسمية جبرية ، ومترافبة كويس قوى قوى .. ولو ضرورى زيادة تذاكر المترو والقطارات يبقى فى
أقل الحدود ، وكمان ياريت الحكومة توفر أتوبيسات حقيقية للنقل العام ، نظيفة وقوية
ومجهزة تماما ،زى مابنسمع من كل الحكومات السابقة من عشرات السنين !!، ويبقى كده بتقوم
بدورها الأصلى فى نقل المواطنين ، بدلا من أعتمادها على الميكروباصات اللى بتمص دم
الناس كل يوم بلا رقيب أو حسيب !!.
كل
القرارات دى لو صدرت مع فيضان أرتفاع الأسعار ،أكيد كانت حاتوزن الأمور شوية .. وتظهر بعض العدالة اللى بينتظرها البسطاء وغيرهم .. ويشعر الجميع أن
الحكاية لاتمس الفقراء فقط ..ولكن الأصلاحات الأقتصادية تشمل كل نواحى ، وفئات
الدولة .. وصحيح أن
الأصلاحات الأقتصادية دى كانت لازم تتم من 20 سنة وأكتر !! لكن ماحصلش إلا
دلوقت وماكنش أمام السيسى والحكومة إلا
أتخاذ هذه القرارات القاسية غصب عنهم !!.. وإلا كنا حانلاقى نفسنا بعد شوية فى
مصايب أكبر وأخطر بكتير جدا .
السيسى عمل زى الجراح اللى شايف أن إيد
المريض فيها صديد
،ولازم لها جراحة ،وتنظيف قوى ، وسريع .. وتجفيف الصديد بأى شكل .. ولكن لو
أستنى شوية ، وقال بعدين زى مااللى قبله قالوا ، يبقى الغرغرينا حاتضرب فى الأيد !! ومن المؤكد أنها
حاتتقفطع يعنى حاتتقطع !!
أنا والله مش بأدافع عن السيسى كشخص ..
ولكنى بالعقل كده بأوزن الأمور .. وأشوف الدنيا رايحة فين ؟ وليه ؟ .. السيسى باصص
لمستقبل أولادنا
، وأحفادنا .. علشان مايتعبوش
ويتبهدلوا أكتر مننا !! . يمكن تكره السيسى وتنتقده النهارده .. لكنى واثق أنه
حاييجى يوم تقول ربنا يباركله الراجل ده .. أحنا ماكناش مستوعبين اللى بيعمله !!
النهاردة السبت أجتماع مجلس المحافظين ..
يارب يكون فيه شوية قرارات زى اللى قلتهم .. علشان يبقى على الأقل نص العمى .. ولا العمى كله !!
بقلـــــــــم
صــــلاح إدريــــس
salahedris@gmail.com
تم نشر المقال بجريدة ( الوطن ) عدد السبت 5
نوفمبر 2016
http://www.alwatneg.org/tfr/1144
ليست هناك تعليقات:
إرسال تعليق