صلاح الدين.
ـــــــــــــــــــــــــــــــــــــــ
أبوي يا عيني سماني صلاح الدين..
نسي وهو بيختار اسمي إنه يشتري لي زمن بيعرف يطرح الأبطال..
وسيف يعرف يسَيَّح دم مش للرقص لما يطبل الطبال..
نسي يختار جيراني في الحياة من قبل ما يجيبني..
لكن ما نسيش يسيب لي اسمي ويسيبني..
أبوي يا عيني سماني صلاح الدين..
في دنيا الجبن فيها هو طعم العيش، وهو المية هو الطقس..
في دنيا أجدّ حاجة فيها هي الرقص..
ومطلوب مني أطلع إيه؟..
أديني طلعت، إيوة طلعت يابا باخاف..
باخاف وأنا هدمتي دايبة ولقمتي حاف..
وتسألني باخاف على إيه؟ باخاف من إيه؟ أقول ما أعرفش..
لكن ما أقدرش أعيش وما أخفش..
وكان لازم صلاح الدين؟..
يا أبوي ما كان كفاية شكوكو، أو شحات، كفاية اسم أعرج بيه، مادام أنا ما اتخلقتش بجناحات بتطير..
دي أصعب حاجة في الدنيا إنك أنت تكون صغير بس تتنادى باسم كبير.
*****************
الشاعر صلاح عبدالله
ليست هناك تعليقات:
إرسال تعليق