دستور (فتاكات شيل أيدك لأقطعهالك !! )
ـــــــــــــــــــــــــــــــــ
ــــــــــــــــــــــــــــــــــــ
يتم الآن فى مجلس الشعب.. إنتخاب اللجنة التأسيسية للدستور .. واللجنة دى من 100 عضو .. 50 منهم من داخل المجلس .. والـ 50 التانيين من خارجه
والمفروض أنهم بيمثلوا كل جموع ، وفئات الشعب المصرى .. من نقابات ، وأحزاب ، وأقليات ،وعمال ، وفلاحين ، وطلبة .. وأيضا خبراء بالقانون الدستورى ، وعلماء دين ، وفكر ، وثقافة ، وفن ، ولابد أن تكون كل فئات الشعب المصرى ممثلة فى هؤلاء الـ 50 من خارج المجلس !! أزاى ؟ مش عارف !! لكن الأغلبية أخدت القرار وخلاص ..
ماشى !!
الإنتخابات ماشية إزاى بقى دلوقت جوه المجلس الموقر ، أقولكم :ـ
فيه ورقة بتتوزع على الإخوان والسلفيين و هى ( برشامة ) للغش منها وكتابة أسماء من فيها من أعضاء بالمجلس الموقر .. لأن الأعضاء لايعرفون من يختارون من زملائهم !! آدى أول القصيدة كفر !! أما بصفة عامة لكل الأعضاء فقد تم توزيع كشوفات بها 3000 أسم ليختاروا منها 100 أسم ( 50 من المجلس و50 من خارجه ) دون تحديد أى نقابيين أو أحزاب أو غيره .. فهى أسماء وخلاص !! والعضو عليه أن يضرب الرمل ، ويوشوش الدكّر !!علشان يعرف يختار مين ؟؟ .. والمفاجأة أنه لازم يختارهم فى خلال ساعتين فقط لاغير !!!! يعنى العضو ماياخدش أى فرصة يسأل حزبه .. أو يستفسر عن العضو اللى حايختاره !! ويشوف إذا كان ينفع ولا لأ .. رجل صالح .. ولا البعيد شيخ منصر .. بيفهم كده ودماغة حلوة .. ولا البعيد بهيمة ومايعرفش يقول إلا موافقون !! وهل الأعضاء دول ممثلين فعلا لكل أطياف الشعب المصرى .. ولا ممثلين علينا الدور وخلاص !!
الحقيقة الحكاية ماتطمنش .. والفيران بتلعب فى عبّنا كلنا !! وشكلها مؤامرة مدبّرة لإختيار لجنة تؤسس دستور يمشى المصريين على العجين مايلخبطوش .. وأبقوا قابلونى بعد 100 سنة لما نيجى نغير الدستور مرة تانية !!
فإذا كان إختيار اللجنة التأسيسية للدستور بهذا الشكل ، وهذا الغش ॥وهذا التسرع الغير مبرر !! يبقى الدستور حايطلع (دستور فتاكات شيل إيدك لأقطعهالك )
!!!!!!!!!!!!!!!!!!!!!
صــلاح إدريــــس
مدون بالبلــدى الفصيـــــح
ليست هناك تعليقات:
إرسال تعليق