الرئيس القادم .. حرامى ..ولا حشاش .. ولا بتاع نسوان ؟؟
ـــــــــــــــــــــــــــــــــــــــــــــــــــــــــــــــــــــــــــــــــ
تم نشر هذا المقال بجريدة ( عين الحقيقة ) السبت 31 مارس 2012 .. وفى مساء يوم نشره تم ترشح خيرت الشاطر رئيسا للجمهورية عن حزب الحرية واللعدالة .. مما أثار لغطا شديدا حول المقال .. وكانت ردود الأفعال كثيرة جدا جدا خلال اليومين الماضيين .. وأنا أدعوكم لقراءة المقال كاملا وبهدوء وتمعن .. ولاتنسوا وأنتم تقرأو ن الكلمات فوق السطور .. أن تقرأوا أيضا مابين السطور !!
**********
فى البلاد اللى بتفهم ، واللى بيقولوا عليها العالم الأول ـــ مش العالم التالت والرابع ذيّنا ـــ الناس دى بتختار رؤسائها بطريقة مُحْكمة جداً ، وماتخُرِّش المية !!..
عندهم بعض الجرائد ، والمؤسسات البحثية العامة ، والخاصة شُغلتها الأساسية هى البحث الدقيق .. على المُرَشَحِين
للرِئاسَة قبل الهَنا بسَنة !! يعنى بمُجَرد ماصاحبنا يقول أنا مُرَشِح نفسى للرئاسة ، أو للعُمُودِية ، أو حتى لرئاسة الحىّ .. تبدأ عَجَلة البحث عن الرجل ، وتجيب قرَارَه من يوم ماأتولد .. الأسرة مُتمَاسكة ، ولا لأ ؟.. الأب خَمُورْجِى ، والأم
الله أعلم ..ولا لأ ؟ .. هل يحرِصُون على متابعة ابْنهم ، وتفوقه ، ولا سَايْبينُه على مَزاجُه ؟
في مراحله الاعدادية والثانوية ,كان شاطر ولا بليد ؟ ॥ كان حلو مع زمايله ॥ولا عُدوانى وقلبه أسود ؟ ॥ كان بيحترم أساتذته ؟ ولا قليل الأدب معاهم و بيحطلهم بارود فى جيوبهم ؟ ماهى معدلات ودرجات نجاحه طوال سنوات دراسته ؟ ॥
كان بيشرب حشيش ولا لأ ؟.. بتاع بنات وخلبُوص .. ولا هادى ومحترم ..؟؟
وبعدين ينتقلوا للجامعة ويبحثوا فى مواظبته .. ودراساته .. وكفاءاته .. وهل هو طمُوح ولا خَبُؤَة ؟.. مُبْتَكِر وعنده مَوَاهِب .. ولا خيبة وطِيشَة وبُروطة ؟ .. علاقته بالبنات فى الجامعه .. وهل علاقته كانت ببنت واحدة بس ( جيرل فِريند يَعْنى ) .. 
ولا كان فاتِحْهَا على البَحَرى ..وقلبُه مَسَاكن شعْبيَة ؟؟॥
بعد كده ييجُوا لِحَياته العملية بعد الجامعة .. هل نجح
بدِرَاعُه وتَفوْقه الشخصِى ؟.. ولا بالوَاسِطَة والمَحْسُوبِيَة ؟.. هل رَشَىَ ، أو أرتَشَى علشان يحقق مصالحه فى يوم من الأيام ؟ .. هل زوجته وأولاده بيحبوه ، ومترابطين معاه وموافقين على كل مايقوم به ؟ .. ولا قرفانين منه ، ومش طايقينه ، ولا طايقين كل اللى بيعمله ؟..
أهل الحىّ من جيرانه شايفينه أزاى ؟.. وزمايله فى العمل .. ومنافسيه فى شغله .. كل دول شايفينه بـأى شكل ؟ عنده مخالفات مرور كتيرة ؟ ولا ماعندوش خالص ؟ دخل السجن كام مرة ؟ وليه ؟ .. عنده أمراض نفسية وعصبية ولا لأ ؟ وياترى حد من عيلته كان عنده
أمراض نفسية ؟ وهل هذه الأمراض وراثية ؟ 
وهل أى فر د من أسرته دخل السجن ولماذا ؟
هل عنده أى نوع من أنواع الشذوذ أو البارانويا ؟ ॥ يعنى راجل عنيف بيضرب مراته وولاده ؟ هل بيخاف من الأماكن العالية أو المغلقة ؟ هل هو مُوَسوس وشكاك ؟ هل هو جبان وبيخاف من خياله ؟ هل هو سريع فى أتخاذ القرارات ؟ هل دائما يختار قراراته بهدوء وعقلانية ولا متسرع وأهوج ؟ ।
هل هو قارىء جيد للكتب ، ومثقف ، وواعى ؟
ولا بيكتفى بقراءة الخطوط العريضه بالجرائد ، ودُمْتُم ؟ هل يؤمن بالرأى والرأى الآخر ؟ ولا مابيشوفش غير رأيه هوَ بَسْ ؟ هل يُفضل المصالح العامة على مصالحه الخاصة .. ولا مايهموش غير تحقيق مصالحه فقط ؟
ونتائج كل البحوث دى تتنشر على العامة .. فى الجرائد الكبرى .. وأجهزة الأعلام كلها .. وتبقى فضيحته بجلاجل .. أو سيرته العطره تؤهله للمنصب الرفيع .
وفى الآخر ماهو برنامجه الأنتخابى تفصيليا .. وكل ناخب
يبدأ البحث فى البرنامج الأنتخابى وهل حايفيده كواحد من الشعب إفادة شخصية مباشرة أو غير مباشرة .. وهل فى البرنامج أى بنود قد تضره أو تضر غيره من فئات الشعب ؟ وبعد أن يستقر الناخب على المرشح يقوم بالأحتفاظ ببرنامج المرشح اللى أختاره علشان يحاسبه على كل بنوده بعد ماينجح .. ويسأله أنت مانفذتش البند رقم كذا .. ورقم كذا من برنامجك الأنتخابى اللى أنتخبناك علشانه .. ويحاسبه على تقصيره ، ويحثه على تلافى ذلك .
ناس كتيرة حاتقولك ياعم أحنا مالنا ومال الدوشة دى كلها
.. أحنا اللى يهمنا هو البرنامج الأنتخابى للمرشح بتاعنا .. طيب ياأخويا يابتاع البرنامج ..تعال نلقى نظرة سريعة للبرامج الأنتخابية بتاعة كل المرشحين بتوعنا بلا أستثناء .. حاتلاقيها كلها نسخة واحدة .. يعنى الكل بيقولك (( المواطن ، والحد الأدنى للأجور، والتعليم ، والصحة ومحدودى الدخل )) .. ولما تيجى تدوّر على تفاصيل دقيقة لكيفية تنفيذ هذه البنود ماتلاقيش .. علشان لما تيجى تحاسبه فيما بعد برضه ماتلاقيش حاجة تحاسبه عليها .. ده غير أننا مانعرفش أى حاجة عن أى مُرَ شَح غير عُمْره .. ومُؤهلاته ، ويمكن توَجُهاته .. وكان الله بالسر عليم .. ومافيش أى معلومات غير كده .؟. لكن سيرة ذاتية ، كاملة ، ومُفصّلة زى الدول المتقدمة .. ماتلاقيش
.. (وخبينى ..وغطينى أحسن العيال بيقرّصُونى !!)
وفيه ناس كتير حاتقولك أحنا لما ندوّر فى تاريخ المُرَشَح القديم ، وتاريخ أسرته ده عيب ، وغيبه ، وخُصُوصِية وكلام خايب زى ده كتير !!.. لكن أنا بأقول لكم لأ .. وألف لأ .. تاريخ الإنسان لا يتجزأ .. ومن شبّ على شىء شابَ عليه .. فلا يمكن أن أنتخب حشاشاً .. أو بتاع نُسوان .. أو جبان .. أو متردد ومهزوز .. أو راشى أو مرتشى .. أو سجين سابق ، أو من عيله نص كم .. أو أب خمورجى أو أم ليست فوق مستوى الشبهات ..!!!
الرئيس اللى حاأختاره لازم يكون كاملاً مُكمّل بقدر الإمكان ــ فالكمال لله وحده ــ لازم أكون متأكد من أخلاقه وتديّنه وسلوكه ، وتفكيره ، وسعة مداركه ॥ لازم أكون عارف توجّهاته السياسية ، و‘يمانه بالرأى الآخر ॥ لازم أثق فى قدرته على التخطيط لــ 50 سنة جاية ॥ لازم أثق فى مقدرته على إختيار وزرائه ، ومساعديه بكفاءة ، ومقدرة عالية ॥
والأهم أننا لازم نعرف كلنا أن الإنسان من طفولته لكهولته هو شخص واحد .. وجُوّاه كل المساوىء والمميزات ، وبتفضل معاه لغاية مايموت .. وأسرته اللى ربته لها التأثير الأكبر على حياته .. فإذا كانت أسرة كريمة ، وصالحة أفرزت ولدا صالحا .. وأن كانت أسرة فاسدة طالحة .. أفرزت دون شك ولدا فاسدا ماينفعش ببصلة .. وطالما أن المُرَشَح قد أرتضى أن يكون شخصية عامة .. يبقى أحنا مسموح لنا ندوّر فى أدَق .. أدَق تفاصيل حياته .. من ساعة ماأتولد لغاية دلوقتي .. مش بس كده .. لكن لازم ننشرها ونعرّف الناس كلها باللى أكتشفناه فى تاريخ المُرَشَح ..سواء كان ذلك خيرا، أوشرا .. لأن الحكاية مش سيرة حلوة ، وسيرة سيئة .. لأ . ده مستقبل شعب ، وأُمّة عظيمة ، حايكونوا فى إيد الرئيس القادم اللى حانختاره .. يبقى لازم نحسن الإختيار .. ونفتّش .. ونبعْبش فى تاريخه كله .. ونطلّع كل المساوىء ، والبَلاوى السُودة .. قبل الإيجابيات والتاريخ الأبيض .. لأنه حايبقى كبيرنا ورئيسنا اللى حايحكمنا ويتحكم فى مُستقبلنا ومُستقبل ولادنا وأحفادنا .. ولازم نختاره براحتنا وأحنا عارفين كل حاجة عنه .. يعنى على مية بيضا ... مش كده ولا أيه ؟
صـــلاح إدريــــــس
مدون بالبلــدى الفصيـــــح
تم نشر المقال بالصفحة الثالثة والثابتة بعنوان ( بالبلــدى الفصيــح ) ــ بجريدة (عين الحقيقة ) الأسبوعية ـ بعدد السبت 31 مارس 2012.
ليست هناك تعليقات:
إرسال تعليق