القــط أصلــه أســــــد

القُــط أصلـــــه أســـــــد

ـــــــــــــــــــــــــــــــــــــــــــ

القط أصله أسد  .. كلام غلط مليون فى الميه .. والحكاية أن القط المغرور لما بيبص لنفسه فى المراية الكذابة  ، بيشوف نفسه أسد .. لكن فى الحقيقة هو قط .

هى دى حكاية الجماعات الإرهابية .. من يوم 30 يونيه لغاية النهاردة أعلنوا عن الحشد والتجمع والثورة أكتر من 16 مرة ..!!  أقواهم كانت يوم ذكرى أعتصام رابعة .. وفى كل مرة ــ للأسف  ــ الإعلام بيصدقهم ، وا لأمن بيحشد القوات ـ والناس بتدخل بيوتها وماتطلعش  ، أو حتى تبص من الشبابيك ، ويتجمع الكل أمام الشاشات  ، مترقبين ومتربصين .. منتظرين  الثورة والأنفجارات  .. ودايما بيطلع الفيلم  كله فشنك .. فلا بيقدروا يحشدوا ، ولا يهببوا ، لأن أنصارهم خلاص ياإما بيخافوا من الأمن والشعب ، ياإما مابقوش يصدقوا الجماعات دى ، والمرتزقة اللى بيأجروهم بقوا يحسبوها صح  ، ويقولولك أيه فايدة آلاف الجنيهات  ، وأنا متعرض للموت أو للسجن !!

وأكتشف القط أخيرا ، أنه قط ، ومش أسد ولا حاجة !! لكن برضه غبائه الأزلى بيصور له أنه ممكن يكون أسد !!

والعيب الأكبر  مش على القط  !! لكن العيب على اللى أفتكروه أسد ،  من وسائل الأعلام ، وروجوا لصورته على أنه أسد ، مع أنهم ياأخى عارفين كويس أنه قط ، لكن علشان يبيعوا كويس  لازم يستغلوا صورة القط اللى أصله أسد .. وعلى رأى الصديق العزيز الكاتب الصحفى / أحمد الصاوى اللى كتب النهاردة على صفحته  (( الثلاثة يشتغلوننا :ـ  الحكومة  والأخوان والأعلام ))

ومايبقاش فاضل غيرنا أحنا المصريين .. اللى لازم نتأكد تماما أن اللى فاكر نفسه أسد  .. ماهو إلا فار مذعور ، كل همه يجرى ، ويستخبى فى أى جحر وسخ ، خوفا من الجزم و الشباشب اللى نازله على راسه .

************

بقلــــــــــــــــــــــــم

صـــــــــلاح إدريـــــــــــــــس

salahedris@gmail.com

مدون بالبلــدى الفصيـــــح

http://plackprince.blogspot.com