لما تشوف حاجـــة .. قول حاجــــــــــــــة .. If you see something.. Say something

لما تشوف حاجـــة .. قول حاجــــــــــــــة ..
If you see something.. Say something
ــــــــــــــــــــــــــــــــــــــــــــــــــــــــــــــــــــــــــــــ
        مش عارف ليه حاسس إن القيادة السياسية فى وادى ، وأغلبية الشعب فى وادى تانى خالص .. لما باأدخل دواوين الحكومة بألاقى الروتين الأعرج الممل ، والبامية اللى بتتقمع ، والدرج المفتوح .. لما بأمشى فى الشارع ألاقى نفس الزحمة ، ونفس ضيق الأخلاق والشتيمة من المنقى خيار .. وعلى كده قول للصبح .. نفس التحرش بالبنات .. نفس الغش فى المواد الغذائية والدواء .. نفس البلطجة والسرقات والتثبيت .. نفس مزلقانات السكة الحديد الخربانة .. ونفس القطارات اللى من جواها خرابة ،والتوكتوك أحسن منها .. ونفس الحمامات العامة ، وحمامات المطاعم والكافتيريات الوسخة شكلا ورائحة ، وبرضه الواد قاعد بطبق مليان جنيهات فضة ولازم تدفع وأنت خارج ( شُفيتم)..
ولو حاأقعد أكتب وأقول من هنا وبكرة عن سلبياتنا مش حايكفىينا أى ورق .. والعيب مش فى الدولة ياأخوانا .. العيب فينا أحنا .. فاكرين الــ 18 يوم الأولى فى ثورة يناير .. فى الـ 18 يوم دوول مصر عاشت أجمل أيامها .. ونامت على أحلى أحلامها .. والعالم كله كان بينظر لنا بإعجاب وحسد وغيرة مما نحن فيه .. فلم تكن هناك سرقات ولا تحرشات ،ولا أخلاق وضيعة ،ولا وساخة ، والكل بينضف مكانه .. والكل بيستأذن ويعتذر ويشكر ويسامح .. عشنا فى الفترة دى أجمل أيام حياتنا .. ومش عارف ليه أتخلينا عن الحلم اللى عشناه وقتها ؟ مع إنه مش حايكلفنا أى حاجة .
          المجتمع المدنى الأمريكى اليومين دوول عامل حملة أسمها :
لما تشوف حاجـة .. قول حاجــــــــــــــة ..
If you see something.. Say something
والحملة منتشرة فى كل الولايات الأمريكية زى النار فى الهشيم .. بالونات وبوسترات وعلى النت والتليفزيونات والمدارس ، وكل الوسائل المتاحة لديهم .. وهدف الحملة هو حث المواطن الإمريكى على الإبلاغ فورا عن أى سلبيات يقابلها أو يشوفها دون أى تردد .
          ليه أحنا كمان مانعملش حملة زى دى؟؟ .. وزى مابنبلغ عن أى أجسام معدنيه غريبة أو أكياس مشكوك فيها !! ليه مابنلغش فورا عن أى مرتشى يطلب منك رشوة .. ونبلغ الرقابة الإدارية عن أى فاسد أو أى تصرف سىء فى دوواين الحكومة ومهما كان الفاعل ، ومهما كان مركزه .. ليه مانقفش برجولة لكل متحرش وكل لص ؟.. ليه مانتجمعش على كل مخالف للمرور ونعرفه أن تصرفه السىء مرفوض؟ .. ليه ماننظفش أمام منازلنا ومحلاتنا ؟ فلو كل واحد فى الــ 100 مليون مصرى نظف أمام بيته فقط أو محله فقط حانصبح أنضف بلد فى الدنيا .
              الرئيس السيسى دايما يقول أنا وأنتم .. الشعب والحكومة والجيش .. الشعب وقيادته وحدة واحدة ،, ولايمكن أن السيسى لوحده أو الحكومة لوحدها حاتقدر تعمل أى حاجة من غير معاونتنا الإيجابية .. أرجوك بلغ عن أى سلبية تشوفها ، ولو خايف ممكن يكون بلاغك من مجهول .. لازم كلنا نحط أمام أعيننا الــ 18 يوم الذهبية من ثورة يناير ، ونحاول نرجعها أحسن من المرة الآولى ..أرحوك .. أرجوك .. أرجوك
لما تشوف حاجـــة .. قول حاجــــــــــــــة .. If you see something.. Say something