فضيحة التسريبات .. وقراءة هادئة

فضيحة التسريبات .. وقراءة هادئة

ــــــــــــــــــــــــــــــــــــــــــــــــــــــــــ

        أنا لا حا أهاجم .. ولا  أدافع عن حكاية التسريبات الأخيرة اللى ضربت كرسى فى الكلوب  ، لكن الدنيا لسه منورة بباقى اللمبات .. وعلشان نفهم الحكاية لازم نعرفها الأول .. فالحكاية إن قيادة الجيش لما نويت تقبض على مرسى  وحماية البلد من الأخطار اللى كانت محوطاها  ، فكروا يسجنوه فى  مكان بعيد عن أى تخمين ، ووصلوا لمعسكر رأس التين التابع للبحرية أى القوات المسلحة .. وبعد ماقبضوا على مرسى وشحنوه لهناك !! قكروا   شوية ، ولقوا أنه من الممكن محامين مرسى يطعنوا على إجراءات حبسه فى مكان غير المنصوص عليه فى القانون .. وكان وقتها اللواء ممدوح شاهين  هو  العقل المفكر للمجلس الأعلى للقوات المسلحة !! وأنا كان رأيى فيه  دايما  وبصراحة أنه لايفقه شيئا وقلقاساية  من الآخر كده .. المهم أن ممدوح شاهين تفتق ذهنه عن فكرة غبية وهى أنهم يطلعوا قرار من الداخلية والقوات المسلحة بتاريخ قديم  يقرروا فيه أن معسكر راس التين هو أحد المبانى التابعة لوزارة الداخلية .. وأتفق مع اللواء محمد ابراهيم وزير الداخلية على كده !! .. وفكروا أنهم يغيروا من معالم المبنى اللى مسجون فيه مرسى ، ويعملوه مبنى منفصل كأنه سجن تابع لمصلحة السجون والداخلية . وده هو التسريب اللى طلعته قناة مكملين  بنشر حديثهم  وهمه بيتفقوا على كده   !!

        طيب خللى اللى بيتكلم مجنون .. واللى بيسمع عاقل !!  إزاى معسكر كبير  وتاريخى للقوات المسلحة ، وكان قاعدة للبحرية طول عمره  ، ومن أيام الملك فاروق يتحول فجأة لمبنى تابع  لوزارة الداخلية !! طبعا ده أسمه غباء مُستحكم  ــ أسم الله على مقامكم ــ .. وطبعا  المحامين بتوع مرسى لو ماأستغلوش الثغرة دى لغاية دلوقت  ، يبقى حايستغلوها حتما  !!

        يرجع مرجوعنا بقى للفضيحة نفسها .. أولا الحكومة غلطت غلطة فظيعة لما طلعت بيان وأنكرت فيه الحكاية كلها ، وقالت عليها مفبركة !! وطبعا الكلام  ده غير صحيح  بالمرة !! لأن أى عيل بيرضع حايسمع الشريط حايعرف ويتأكد أنه صحيح ومش متفبرك .. صحيح الحكومة ماكانش أمامها حل تانى !! بس بيتهيألى لو أحنا عايزين نرسى قواعد الشفافية والديمقراطية بحق كان لازم الحكومة تعترف بصحة التسريب ،  وتشوف لها حجة لتبرير الموقف كله .

        وعلى فكرة ياأخوانا  مثل هذه الحكايات بتحصل يوميا ومنذ عشرات السنين وفى كل مؤسسات الدولة والمؤسسات الخاصة وحتى فى بيوتنا  ـ بأنك  تخلق مبرر لتصرف خاطىء لتظهر بالمظهر السليم .. لكن المشكلة هنا أن الحكاية أتنشرت علنا ، وبقت فضيحة بجلاجل يستغلها اللى يسوى واللى مايسواش !! والحكومة بغبائها المعتاد أنكرت  ، وأعداء الحكومة والدولة والجيش كتير وماصدقوا لقوا لبانة يمضغوا فيها عاطل على باطل .. وبصراحة عندهم حق وأنا لو مكانهم كنت عملت زيهم وأكتر .

والموضوع كله من وجهة نظرى تافه جدا  .. ويتشابه تماما مع محاكمة مبارك .. فمبارك أخذ براءة لخطأ فى الأجراءات ، ومع ذلك كثير من الناس هاج وماج ، وطلب إعادة المحاكمة  ، وحصل بالفعل والنائب العام طعن على  الحكم وأحال القضية لمحكمة النقض !! ونفس الحكاية مع مرسى  إجراءات ممكن تكون خطأ بالفعل  ، لكن ده ماينفيش أن مرسى  مجرم وجاسوس وفيه كل العِبر   .. والأجراءات بس هى اللى غلط .. وعلى فكرة خطأ الأجراءات دى ممكن تبرأه  بمنتهى السهولة من كل التهم المنسوبه اليه ، وعلشان كده حصل الأتفاق  بين اللواء ممدوح شاهين ووزير الداخلية  .

     وبأختصار كده لو حبينا نحط توصيف  أخير لكل اللى بيحصل فى البلد .. حانقول لخبطة .. عدم وضوح رؤية .. فهلوة قديمة ماتنفعش بعد ثورة يناير .. نجاح منقطع النظير فى سياستنا الخارجية .. وفشل كبير فى سياستنا الداخلية ومعالجتنا لأمور الداخل  ،  أننا محتاجين نراجع كل الأوراق من الأول ، ونرتبها صح ،  ونبدأ صح وعلى ميه بيضا ، بشفافية حقيقية .. وديمقراطية  حقيقية تمنيناها .. وحانفضل منتظرين تحقيقها مهما طال الزمن .وأن نخلق حلولا غير تقليدية لكل مشاكلنا ، لازم نستعين بقيادات شابة ، شايفة مصر ومشاكلها بعيون جديدة غير العيون القديمة ، اللى مليانة رمد ، وميه بيضا  ، وعُماص كمان .. لازم روح الشباب الواعى الفاهم  ــ مش الطايش المجنون ــ  تكون هى الروح السائدة ، ولازم نجرب نسمعلها .. ونجربها كمان .. بالبلدى الفصيح كده  محتاجين إعادة تقييم جديدة لكل الأمور ، وعُمرنا ماحاننجح ولا نتقدم  خطوة واحدة إلا إذا أعدنا تقييم كل حاجة صح  بهدوء وتروي

***************

بقلــــــــــــــــــــــــم

صـــــــــلاح إدريـــــــــــــــس

salahedris@gmail.com

مدون بالبلــدى الفصيـــــح

http://plackprince.blogspot.com