العُبــــــارة فى العِمـــــــارة .

العُبــــــارة فى العِمـــــــارة .

ــــــــــــــــــــــــــــــــــــــــــــــــ

      عندى مشكلة كبيرة ، وعايزكم تساعدونى فى حلها  بأراؤكم القيمة والتى أثق فيها .. الحكاية أن لى صديق عزيز أشترى شقة فخمة بأكتر من 2 مليون جنيه  على الكورنيش .. فى عمارة فخمة جدا ،  وبها أكثر من 90 شقة .. والعمارة موقعها ممتاز ، وبها شركة حراسة ، و2 بوابين ، و3 أسانسير .

           وقرر ملاك الشقق أختيار  مجموعة من السكان المحترمين ، ليكونوا ممثلين للملاك  ، بأسم مجلس إدارة  أتحاد الملاك ، علشان يراعوا العمارة والصيانة، والنظافة ، والأمن ، وخلافه .. وأستمر الحال زى الفل كام سنة كده .. وفجأة أنهار كل شىء !!

رجال الأمن بيتأخروا وأحيانا مايحضروش خالص !! البوابين لاينضفوا ، ولايلبوا طلبات السكان  ، الأسانسيرات  تعمل يوم ويومين  لأ .. الفئران والحشرات بدأت تظهر فى العمارة نتيجة لعدم نقل الزبالة بأنتظام .. وطبعا أشتكى السكان لأتحاد الملاك اللى بيمثلهم وبيدير العمارة .. مرة وأتنين وتلاتة  ومافيش فايدة .

    فجأة  شوية عيال من أبناء السكان غضبوا  ، فسخنوا ،و جمعوا بعضهم  وحرقوا الأسانسيرات  ، وكسروا أبواب بعض الشقق ، وتهجموا على بعض السكان من الرجال والنساء ، وكسروا كل اللمبات والمرايات على السلالم بين الأدوار !! وبكده زودوا خراب العمارة خرابا أكبر وأشمل ، بغبائهم ، وطيشهم ، وغضبهم الأعمى ،  وطبعا حايكلفهم ويكلف أهاليهم مزيدا من الأموال ، لأن العمارة تمليك والكل لازم يدفع !! ده غير أن الشرطة حضرت بعدما أشتكى بعض السكان خوفا على أنفسهم وأبنائهم وممتلكاتهم   ، وتم القبض على عدد 12 شاب منهم وهرب الباقيين ومحدش عارف مكانهم لغاية دلوقت .

   وكان لازم لأجتماع عاجل لكل سكان العمارة  لأتخاذ القرار المناسب ، وفعلا أجتمع السكان أو الملاك  وتناقشوا  لساعات  وأنتقدوا وعنفوا مجلس الإدارة  اللى تقاعص عن آداء واجبه ،  واللى وصّلهم للحالة السيئة دى .. وقرروا يكلفوا    العمارة ، وتقديم عرض أسعار لإصلاح كل شىء  ، وتقسيم تكلفته عليهم جميعا .. والأهم أنهم عزلوا مجلس الإدارة القديم  ،  وقاموا بأنتخاب مجلس إدارة جديد  أكثر ثقة وأكثر وعيا وفهما .

         هى دى بالضبط مشكلتنا فى مصر .. وتعامل  الأغبياء  مع العمارة ( مصر الدولة ) كأنها السبب فى كل المشاكل !! مع أنها المكان الذى نعيش فيه جميعا .. والواجب والمفترض أن نتعامل مع  مجلس إدارة أتحاد الملاك ( الحكومة ) بالنقد والأعتراض   ،ولعن سلسفيل جدودها  ثم عزلها ،  فى حالة عدم  قيامها بواجباتها .. لكن لازم نحافظ على البيت ( الدولة ) لأنها المكان اللى اتربينا ، وأتعلمنا ، وعشنا فيه ،وحلمنا بيه وليه ، والبيت مالوش أى دعوة بأى فساد بيحصل  جواه !! لأن الفساد من الأشخاص  ، والبيت مش شخص  يفكر ويعمل .. لكنه وطن يجمع الكل ، ويحنو علي الكل ، ويضع الكل  فى عيونه  ويغطي الكل  برموشه ... والأهم أن الوطن  لابيعرف ولا بيفهم الفرق بين المواطن الصالح  ،والمواطن الطالح فكلهم أبناءه  ، وحبه وعطاؤه للكل ..

وهنا الفرق بين العمارة ومجلس إدارتها .. وبين الدولة والحكومة ..  وبين الوطن .. والمواطن !!!

********

                                                                     

بقلــــــــــــــــــــــــم

صـــــــــلاح إدريـــــــــــــــس

salahedris@gmail.com

مدون بالبلــدى الفصيـــــح

http://plackprince.blogspot.com