حلم الــ18 يــوم

حلم الــ 18 يوم

ــــــــــــــــــــــــــــــــــ

      ثورة 25 يناير  بالنسبة لى هى الــ 18 يوم الأولى  من 25 يناير ـــ 12 فبراير ... فى الأيام دى  المصريين كلهم كانوا بيحلموا حلم واحد .. أهدافهم متحددة ، ولانقاش عليها إطلاقا .. وبشعور حقيقى جدا كانت كل بنت فى الميادين هى أختك .. وكل شاب هو أخوك .. وكل كبير أو كبيرة هما أبوك وأمك .. وكل طفل رافع علم مصر وهو فرحان  كان الجميع شايفين فيه المستقبل المشرق لمصر .. والكل متجمع  فى مجموعات  صغيرة حول براد شاى ، وساندويتشات  الفول والفلافل  ،  وهى بتغنى لمنير ، والشيخ إمام ، وأشعار نجم وفؤاد حداد ..

    فى الــ 18 يوم الأولى العالم كله  أحترمنا  ، وقدّرنا ، وبدأ يخاف مننا ، ويعمل لنا ألف حساب .. كلنا عشنا الـ 18 يوم الأولى ، وفاكرينها كويس قوى .. ياريت تقعد وتفتكر مع نفسك  كل يوم من هذه الأيام الحالمة الجميلة .. وأدعى معايا نعيش من جديد نفس الحالة ـ لكن مش نفس الحدث .