دى دولة .. ولا طابونـــــــــة ؟؟

دى دولة .. ولا طابونـــــــــة ؟؟

ـــــــــــــــــــــــــــــــــــــــــــــــــــــ

     والله ماأنا عارف ياأخوانا دى دولة ولا قهوة بلدى فى حارة بعجر العكر ؟ ( وبعيدا عن أنك مع إسلام بحيرى ولا ضده ) .. النهاردة هيئة الأستثمار قررت وقف برنامج إسلام بحيرى  ، وأمهلوا القناة 15 يوم للتنفيذ   ، وإلا سيتم إغلاق القناة كلها !! حاجة نيلة ، وتقرف بصراحة .. لأن هيئة الأستثمار شغلتها التصار يح  ،وقانونية الأرسال  ، والتمويل والأمور المالية والإدارية .. ومالهاش أى دعوة بمحتوى البرامج .. لكن علشان الأزهر بعت لهم بأغلاق القناة  خلاص .. بدال الأزهر يبقى تتقفل .. الله يلعن أبو البهايم كلهم .. وأبو اللى فرعن الأزهر ،  وفرعن كل الفراعين ( ماهو يافرعون أيش فرعنك .. قال مالقيتش حد يلمنى  ) .. أحنا دلوقت فى نفس الحكاية  .

       وبرضه من كام شهر  مجلس حقوق الطفل أرسل لرئيس الوزراء شكوى ضد فيلم ( حلاوة روح ) .. راح الشملول رئيس الوزارة منع عرض الفيلم فورا .. من غير مايتنيل يشوفه ، ومن غيير مايتنيل يسأل أهل السينما أو الثقافة .. وطبعا الفيلم زاد الطلب على مشاهدته  ، وشاهده الكل على النت  ، وعلى قنوات الأفلام بأعداد مضاعفة .. وبعدين حكمت المحكمة بعدم أحقية ولا أختصاص رئيس الوزراء بمنع الفيلم .. ورجع عرضه للسينما ،  وحقق إيرادات بالملايين  ، وأضعاف أضعاف السابق .. وأحنا بيدير أمورنا كلها ناس هبلة والله العظيم .. ناس متخلفة  .. ماتعرفش أن الممنوع مرغوب .. ومنع إسلام بحيرى ،  حايخلى الناس تدور عليه وتشوفه .. وبدل ماكان بيشوفه آلاف حابشوفه ملايين .. على النت  وببلاش .. وبعدبن حاتترفع قضية وحايتحكم لصالح القناة .. لأننا فى عصر القانون .. مش فى عصر أم بسارية .. جاتكم القرف  كل مانتقدم خطوة .. ترجعونا 100 خطوة .

   الرئيس السيسى فى كل خطاب بيطالب بثورة دينية ، وتنقية إسلامنا الحنيف من الشوائب التى علقت به منذ قرون .. وكرر الكلام ده عدة مرات .. يقوم الأزهر يعمل العكس ، ويقرر التوغل فى التخلف والرجعية ، ومحاربة الفكر بالحجر  على الفكر ، ورفع شعار أنه لافكر يعلو فوق الأزهر الشريف ..   ونتيجة لهذه الحملة التى يقودها الأزهر بكامل فكره ومشايخه وعلماؤه  ،  ضد شخص واحد !!  وقد تسبب هذا  أن طلع علينا شيخ متخلف أسمه عبد الخالق الشبراوى  وأباح دماء أسلام البحيرى .. وبدلا من الثورة الدينية   نحن على أعتاب وكسة ورجعة دينية متخلفة .. وأقسم بالله العظيم أن بالأزهر ، وفى كل مؤسسات الدولة خلايا كثيرة لاهم لها إلا إفشال السيسى ، والحط من كل مايقوم به ، وتسفيه أفكاره ، وحشد كل السفهاء  ،والتافهين ، والمرتزقة ، والمتخلفين ، لإظهار السيسى بالجاهل الفاشل .. وفى النهاية هدفهم إفشال مصر وعودتها لعصور التخلف والظلام الرجعية ..

اللهم رد كيد الكائدين الى نحورهم و اجعل تدبيرهم تدميرهم 
سألناك يا ربنا و رب العالمين و ما لنا رب سواك !

   (( يمكرون ويمكر الله .. والله خير الماكرين ))