دواعش فى مجلس النواب الجديد

تم نشر هذا المقال بجريدة الوطن  يوم الأربعاء 7 أكتوبر 2015

دواعش فى مجلس النواب الجديد

ــــــــــــــــــــــــــــــــــــــــــــــــــــــــــــــــ

حزب النور والسلفيين اللى عمرهم ماوقفوا للسلام الوطنى .. ولا تحية للعلم المصرى ، ولا أعترفوا بنصر أكتوبر .. اليومين دوول علشان الأنتخابات  بيحتفلوا بنصر أكتوبر !! وبيذيعوا السلام الوطنى فى أحتفالاتهم  !!  وبيرفعوا العلم المصرى فى سرادقاتهم !!..

محدش يقوللى ده نفاق .. لأنهم  بيعتبرونا كلنا كفار  ،والكذب على الكفار  واجب ومُباح .. فلما يكذبوا دلوقت علينا لتحقيق أهدافهم  فهو كفاح ،وجهاد على طريق الأيمان ،والنصر المبين .

أنا شايف  أن السلفيين هم الأكثر تنظيما على الأرض .. ومؤتمراتهم مستمرة ، ومتتابعة ، وكثيرة .. ومرشحيهم بيدخلوا كل البيوت ، ولسانهم بينقط عسل وشهد مكرر .

ناس كتيرة من  المثقفين وأعضاء العالم الأفتراضى الفيسبك ،وتويتر عارفين كل ده .. وأكيد مش حاينتخبوا أى داعشى منهم .. لكن الأنتخابات وصناديقها مش بالفيسبك ياشباب  ..لكن بملايين البسطاء اللى مايعرفوش أيه هو الفيسبك أصلا .. ولا يعرفوا أى عالم أفتراضى .. وعالمهم هو واقعهم اللى عايشين فيه وبس .

هنا يأتى دورك ودورى ياصديقى العزيز ، بالتوعية والنصح ، والإرشاد  ،وتوضيح الأمور بكل شفافية ،والشرح ببساطة شديدة حتى نصل لعقول هؤلاء البسطاء .. الخطر داهم ..داهم ..داهم يارجالة وياستات .. ولو لم نقف كلنا معا لدحر هذا الخطر الداهم  فقولوا علينا وعلى مصر يارحمن يارحيم .. اللهم إنى بلغت .. اللهم فاشهد .

بقلــــــــــــــــــــــــم
صـــــــــلاح إدريـــــــــــــــس