التماسيح والموظفين .. صُمٌ بُكمٌ عُمىُ خُرسٌ .

التماسيح والموظفين  .. صُمٌ بُكمٌ عُمىُ خُرسٌ   .

بحيرة ناصر بأسوان  أصبحت مفرخة طبيعية للتماسيح .. فقد

وصل عدد التماسيح فيها  حوالى من 50 ألف ــ 80 ألف تمساح ، والتمساح طوله ٦ متر،  ووزنه ٩٥٠ كيلو جرام، و (أنثى التمساح تبيض من 40 إلى 60 بيضة سنوياً(،و يأكل في المتوسط ٢٠ كيلو جرام سمك -يومياً-يعنى لو المتوسط 60 ألف تمساح ، والتمساح الواحد  بياكل 20 كيلو سمك  فى اليوم = 1200 كيلو = 438 ألف كيلو سمك فى السنة !! .

بحيرة ناصر مساحتها 350 كيلومتر .. يعنى مليون فدان مائى ، بنصطاد منها 20 ألف طن سمك سنويا  أول عن آخر .. وبنستورد 430 ألف طن من زبالة الأسماك من تايلاند ودول شرق آسيا .. وبتكلفنا ملايين الدولار !! فى حين أننا  نقدر نصدر أجود الأسماك للعالم كله !! وكمان  بحسبة بسيطة جدا جدا نقدر نوفر السمك للمصريين ، بسعر 5 جنيه للكيلو .. علما أن الفول بـ 10 جنيه الكيلو !!

غير كده نقدر نستغل التماسيح دى أستغلال لامثيل له ، لو فكرنا وحاولنا  نتعلم من أصدقائنا الأفارقة  .. فهم يستعينون  بشركات متخصصة في صيد  التماسيح بدون استخدام الرصاص،
علشان الجلد مايتخرمش ويبوظ ، و جلد التمساح الواحد ثمنه ٤ آلاف دولار .. يعنى  لو فرضنا  6٠ ألف تمساح X ٤ آلاف دولار = 240 مليون دولار ،يعى بالمصرى تقريبا 1.800.000مليار وثمانمائة مليون جنيه .. ده غير أننا ممكن نعمل مزارع للتماسيح ،  ونكبرها ،ونزودها ،وتكون مصدر دخل سنوى ثابت لمصر .. ده طبعا غير الأستثمارات ، والشركات ، والعمالة اللى حايتم إنشاؤها ، وتوظيفها لخدمة هذه المشاريع العملاقة .. مثل مزارات للسياح علشان يتفرجوا على التماسيح  ، ومصائع للجلود الطبيعية ، وكافتيريات ، ومطاعم ، وبازارات  سييتم إنشاؤها  حول المشاريع المرتبطة بالتماسيح ،على كل المدن المرتبطة بالنيل  مثل الأقصر، وأسوان ،وسوهاج ، وكل الصعيد  ، ونروج لآثارنا الموجودة هناك ، وآهى فرصة نضرب خمستاشر عصفور بحجر واحد ، لأن للأسف مفيش حد يعرف آثار كتيرة من الموجودة فى مدن الصعيد ، ومفيش حد بيروج ولا بيسوق لها  ، وسايبنها للسرقة والتجارة للمحاسيب وموظفين الآثار  !!

وأيه رأيكم  أن ميزانية معاهد بحوث الصحراء المسئولة عن ٩5% من مساحة مصر ٢١ مليون جنيه في السنة.. و ميزانية البحوث الزراعية في مصر كلها ١٣٠ مليون في السنة.. وكل الملايين دى ضايعة على المرتبات ،والمكافآت ،والكهرباء ،والمياه .. ومفيش ولا حد بيبحث ولا يتنيل !! .. ومفيش تفكير بره الصندوق .. الكل موظفين ، والكل همه بس يمضى ،ويهرب يسوق تاكسى ،ولا توكتوك   علشان يجيبله قرشين زيادة .. وآخر الشهر يقبض مرتبه من تِكِية الحكومة  .. ومفيش حد فكر يستغل بحيرة ناصر ، بالشكل اللى ذكرته، وذكره الكثيرين .. وأتعملت دراسات كتيرة عليه .. لكن تقول لمين ؟ ومين يسمع ؟

لأنهم  ــ للأسف ــ  صُمٌ بُكمٌ عُمىُ خُرسٌ   لايفقهون !!
بقلــــــــــــــم

صــــلاح إدريـــــــــس

تم النشر بجريدة الوطن الجمعة 25 ديسمبر 2015

view-source:http://alwatneg.org/article/4063/%D8%A7%D9%84%D8%AA%D9%85%D8%A7%D8%B3%D9%8A%D8%AD_%D9%88%D8%A7%D9%84%D9%85%D9%88%D8%B8%D9%81%D9%8A%D9%86__.._%D8%B5%D9%8F%D9%85%D9%8C_%D8%A8%D9%8F%D9%83%D9%85%D9%8C_%D8%B9%D9%8F%D9%85%D9%89%D9%8F_%D8%AE%D9%8F%D8%B1%D8%B3%D9%8C__!!