بالبلدى الفصيح :ــ من النوبيين لمجلس النواب الجديد
دى النوبة مَولِدى وعنوانى ،
يانموت .. يانرجع تانى !!
من كل التجارب اللى عشناها ، ولسه عايشينها
فى مجتمعنا المصرى اللى مالوش مسكة ، إن
الشحص المؤدب المحترم الطيب لانصيب له من صفاته .. يعنى لابيتعامل بأدب ، ولا
بأحترام ، ولا بطيبة .. وحقه على طول مهضوم ومتاكل من الأغلبية العظمى ، سواء على
مستوى الأفراد أو الجماعات ، والأسوأ على مستوى الدولة ومسئوليها ، ومؤسساتها !!
.. لكن قليل الأدب ، الغير محترم ، المنافق ، الخبيث ، وياسلام بقى لو كان بلطجى بياخد
حقه بدراعه .. هو ده اللى واكلها والعة .. وواخد حقه تالت ومتَلِت ، وبرضه على كل
المستويات !!
النُوبيين بقى طُول عُمرهم غلابة وطيبين ، وبيطالبوا
بحقوقهم آخر نَاس، وبيقِفوا فى آخَرِ طابُور طَالبِي الحقوق .. ولما بيطالبوا
بحقوقهم المشروعة بيطلبوها بالأدب ،والذوق
، والطِيبَة المعروفه عنهم ، والغريب أن هذه الأخلاق الطيبة هى السبب فى عدم تحقيق مَطلب وَاحِد من
مَطالبهم !! علشان كِدَه المَرَّة دِي حايقفُوا
بحَسْم ، وحَزم ، وقوة فى أوَلِ الصفوف .. وتكون مَطالبهم هِىَ أوَل المَطالب .
إن تضحيات النوبيين فى سَبيل مِصر ونهضتِها ، يعرفها المصريين والعالم كله ، ولو أنت
ماتعرفهاش ، أسمح لى أختصرها لك .. كلنا عارفين أن النيل هو شُريان الحَياة لِمصر والمصريين ، وكان لابُدَّ من وصُوله لكل قرى، ونجوع ، وبيوت مصر .. علشان كده بدأ تهجير النوبيين من بيوتهم ،وأرَاضيهم 4 تهجيرات هاجرها النوبيون ، الأولى عام 1903
لبناء سَد أسوان ، ثم التهجير الثانى عام 1912 لِتعلِيَّة السَد الأوُلىَ .. ثم عام
1932 لِتعلِيَّة السَد الثانية .. وكان خِتامُها مِسكّ فى الهجرة الأخيرة عام 1963
عِندَ بناء السَد العَالى .. وبسَبب
طِيبتهم وأخلاقِهم ــ اللِي وَدَتهُم فى دَاهِيَة ــ وَافق النوبيين بطيبة خاطِر على
الهجرَة ، علشان يتحقق المشروع القومى الكبير اللي اتبنَاه
عبد الناصر، وهو السَد العَالي ..
وهَجَرَ النوبيين بيُوتهم وأرَاضِيهم على
ضِفاف النِيل ، وتركُوا معها ذِكريَاتهم ، وتاريخهم ، وعظام آبائهم ، وأجدادهم ، علشان
مصر .. ولأن جمال عبد الناصر وَعَدهُم بالجنة الخضراء ،فى كُوم أمبُو وقال : ((حاتلاقوا بيُوت أحسَن من بيُوتكم ،
وأراضى زراعية أحسن من أراضيكم ، وحانعَوضكُم تعويضاً كريماً !! )) حلو لغايِّة
هِنا .. لقوا إيه بَقىَ ؟ وَصلَ النوبيُون
للأرض الجديدة ، وكان أسمها على مسمى فعلا ، فكان أسمُها ( وَادِى الجن ) .. فى منطقة كوم أمبو ..فهىَ أرض صحرَاويَّة
، صخريَّة ، جَردَاء عَايزه سِنين وسِنين من الإصلاح علشان يعرفوا يزرعُوا فِيها .. وبعد
مَاكان النوبيون عَايشين على مِساحة 600 كم2
على النيل ، وأراضيهم مروية بالراحة ، واللى مابيزرعش بيسترزق من صيد
الأسماك .. زَنَقُوهم فى 50 كيلو م2 فى
الصحراء .. والبيُوت بعد مَاكان مِسَاحة
البيت النُوبى تتلاءم مع طبيعَتِهم ، وحَياتِهم ،
وتتراوح مابين 600 م2 إلى 1000 م2
وزيادة ..حَبسُوهم فى بيُوت 300 م2 بالكتير .. لأ وإيه كَمان كُل العِيلة برجَالِها، وسِتاتها ،
ودوابها ،لهم بيتٌ واحدٌ ، بَعد مَاكان
لَهُم تَلات وأربَع بيُوت ،بعَدد رجَالِها .. أمَا التعويضَات السَخيَّة اللِي
إتكلم عنها عبد الناصر فهى حَاجَة تِضَحك فِعلاً .. تخيَّل أن النخلة المُثمِرة
وعُمرها مِن عُمر الأسرَة ،عَوَضُوهم عنها
بـ 10 قروش للنخلة المُثمِرة .. و5 قرُوش
للنخلة الغَير مُثمِرة ، وتعويض المَركِب اللِي طُولها مِن 10م إلى 20 م بــ 50
جنيه .
وبرغم كُل هذا الظلم ، والأجحَاف ، والإستِعبَاط
، من الحكومة المصرية ، النوبيين قبلوا الوَضْع الجَديد ، على أمَل أنَّه وَضْع مُؤَقت ، وعَودَتهُم لأرَاضيهم ،وبيُوتهم
القديمَة ،أكيد زَيّ مَاقال عبد الناصر ، ومجمُوعَته .. وأضطر 70 % من الشباب النوبى
للهجرَة من هذه الخرَابَة الجديدة ، بأمَل
رجُوعِهم لبلادهم بعد ذلك .. ورحلوا للقاهرة ،
والإسكندرية ، والسويس وغيرهم من
المُدن المِصرية ، علشان يدَوَّرُوا على رِزقهم ..بعد ما شافوا إن الخرَابة
الجديدة لا فيها رِزق ، ولا فيها أيّ
حَاجة ، غير العَقارب ، والثعَابين ، والذِئاب .
وبعد ماكانوا فاكرين أنهم حايرجعوا لأراضيهم
بعد الأنتهاء من بناء السد العالى ، وأستقرار الأمور .. ظل النوبيُون لأكثر من 60
سنة ولغاية دلوقت ، ييُطالِبوا بعودتهم ..
60 سنة يامُؤمِن !! يعنى أطول من سنوات القضية الفلسطينية .. ومَافيش حَدّ من الحُكام
لا بيسمَع ولا بيشُوف .. وياريت سِكتُوا على كِدَه !! لكِن كمَان بَدأوا
يهمِّشُوا النُوبة ، والنُوبيين .. ومَسَحُوا بأستِيكَة إسم النُوبَة من على كل
شَىء .. النَهر والسدُود ، وغيرها ، وأستبدِلُوها بأسماء تانية سَخيفة .. حتى
التاريخ النوبى اللِي هو أصل الحضارة المصرية القديمة ،والجديدة ، بَدأوا فى مسحِه
أيضا ، واللغة النوبية القديمة ، وهى أصل
اللغة الفِرعُونية ، مَسَحُوهَا بَرضُه من
كتب التاريخ ، ولا يَعرف عنها الأجيال
الجديدة من المصريين أى حَاجَة .. لكن النوبيين بذكائِهم الفِطرى حَافِظُوا على
لُغتِهم الأصليَة ، والأصيلة لِغاية دِلوقت ، وعَلِمُوها لأوَلادِهم ، وأحفادِهم
.. وكِفاية أقول لكَ أن اللغة النوبيَّة كانت لُغَة الشَفرَة بَيْن قُوَاتنا
المسلحة فى حَرب أكتوبر المجيدة ،
وكانت من الأسباب الرئيسية للنصر
المُبين ، فلم يستطِع الإسرائيليون فك هذه
الشَفرَة المُعَقدة ، عَبر أجهزة إستقبَالِهم المُتَطورَة .
وأسمح لى أن أستعير فقرة من مقال سابق لى عن
أصل النوبة ،
((يقول ديُورَانت فى الجزء الثانى من كتابه المَعروف (
قصة الحضارة ) : أن المصريين الأوَلِين ، مَولودِين من النوبيين والأحباش ... ويقول المَقريزى فى مَخطوطاته :
النوبيون يُشبهُون النيل .. فيهم كَرم
وسَمَاحه .. ويقول : كانت بلاد النوبة القديمة " كُوش " هى حَلقة
الوَصْل بين الشمال والجنوب (السُودان ودول حُوض النيل ) ويُواصِل قوله : النوبة
كان لها دَائِماً الأهميَّة العسكرية والتجارية
.. ويقول الرَائِع جمال حمدان فى كِتابه " شخصيَّة مِصر " :
النُوبة هى أصل الحضارة الفرعونية القديمة
.. وأن مَلِكات مِصر الفرعُونيات الجمِيلات مثل حتشبسُوت ، و نِفرتارى ، وتِيتى
"حَماة أخناتون " وغيرَهُن هُنَّ نُوبيات ..ماعَدا نفرتيتي التِي يُقال أنَها من أصُول
غير مِصرية .. ويقول :أن أهل النوبة ، ونُبلاؤها ، وملوكها ، هم الذين عَلَّمُوا
المِصريين والإغريق نِظام المُلك ..
ويَقول الكاتب النُوبي المَرمُوق حَجَّاج أدُول : مَهما أختلف المَؤرخون حَول الأصل النُوبي ،
فالوَاضِح لدَيَّنا أنه قد وَفدت شُعوب كثيرة
إلى مصر، ولكن على إختلافها ذابت ، وانصهَرت فى الشخصيَّة النُوبيَة فى
منطقة النوبة ، سواء قاهِرين ، أو لاجئين
، أو غازيين ، مُنذ عَهد الفراعنة ، من
العرب والأتراك ، والمَماليك ، والرُومان ، وغيرهم .. ومازَال الشعب النوبى
بَاقياً على سِمَاتِه النُوبيَة الأصِيلة ، ولم يتغيروا أبدا .
ولأن الصُورَة بتاعِة الطِيبَة ، والذوق ،
والأخلاق الحِلوَة ، بتاعِة أفلام الأبيض وأسود ،إنطبعِت فى دِمَاغ المِصريين كلهم ، ومعاهم
الحُكام طبعا ، وتأكدوا أن الناس الطيبين دول مالهمش لازمة ، ولا خوف منهم ،
وسِيبُوهم يهَاتُووا !! فليس لهم حُقوق ،
وزَيُّهُم زَيّ كل الأقليات فى مِصر ، إن ماكانش أقل .. وظلّ النوبيُون يطالبُون
بحقوقهم ، ويطالبُون .. ويطالبُون .. لكِن ودن من طِين ، وودن من عَجين ،
ومش عارف مين ابن سِتين فى سَبعين !! إللِي وَرَا مَقُولَة أن النوبيين لو أعطيناهم
أرَاضِيهم ، وبيُوتِهم فهذا سيُشكِل خَطراً وتهدِيدَاً للأمْن القومِي المِصرى !! .. لأنهم مُمكن يتحِدُوا مع أهلِهم فى شَمال
السُودان ، اللِي قرفانِين من حُكومَاتهم هُمَّه كمَان .. وينفصِلوا عن مِصر ..
وكعَادَة البيرُوقرَاطية المِصرية ،
والإستسهَال ، والإستهبَال ، ظلوا
يكذبوا على أنفسِهُم ، ويتدَاوَلوا
هذا السَبب الكاذب بينهم ، كحُكام
ومَسئُولِين ، لِغايَة ماصَدَّقوه
وآمَنُوا به .. وبَدَل مايفكرُوا ،
ويدرسُوا ويشُوفوا النوبيين ،
وأخلاقِهم ، وطبائِعهم ، وتاريخِهم
!.. لأ أستسهلوا الحِكاية !!
وأستخدموا السَبب ضِدهُم .. لِدَرجَة أن
إعَانات اليُونِسكو ،ومُنظمَات المُجتمع المَدنِي الدولى للنوبة
كان بيتم تحويلها لِغير
النوبيين ، ويَبنُون بيُوت على أرَاضي
النوبيين ويستوردُوا لهم سُكان ، من
المُنوفِيَة ، وكَفر الشِيخ ،والبُحِيرة
وغيرهم.. طيب ليه ياإخواننا ؟ يُقولولهم علشان نِدمِج المصريين فى بوتِقة
وَاحِدة .. ودَه كلام حَق يُرَاد به بَاطل ، فالهدف هو القضَاء على الهَويَة
النُوبية تمَاماً .. ونسُوا أن النوبة والنوبيين هما جُزء أسَاسِي لايتجَزأ
من التاريخ المِصرى القديم ، وإلا مايبقاش فيه تاريخ مِصرى أصلاً .. ومَهما حَاولوا يمسحُوه ، ويمسخوه !! فوالله لن يستطيعُوا أبدا لأنهم مَوجُودِين غصْب
عَنهم كلهم ، وعن مُؤامَراتِهم ، وكُتب
المؤرخين الغربيين والشرقيين ، هى خَيْر
شَاهِد ، وخَيْر مُوَثق للتاريخ النُوبي ، أصل التاريخ المِصرى القديم .
شُفت بَقى عزيزى القارىء، وأعزائى
المسئولين ،وأعضاء مجلس النواب .. النُوبيين عَانوا ، وإتبَهدِلوا ،
مع الحُكومَات المِصرية إزَاى ؟ وأكِيد عِرفت دِلوقتِ لِيه حُلوق النوبيين
وقلوبهم مَليانَة مَرارة وعَلقم !! .. وأن بَعد
60 سَنة من المُطالبات لِحقوقهم ، ومُعاناتهم ، وتَهمِيشِهم ، ومَسح
تاريخهم ،لسه مأاسترجعوش أراضيهم وبيوتهم .
أظُن يبقىَ هو دَه الوَقت اللِي يَحِقّ لَهُم
يعمِلوا اللِي عَايزينه علشان يرَجَّعُوا حُقوقِهم الضائعة !
ولو سَألتنِي حايعمِلوا إيه يَعنِي ؟
وقبل ماأجَاوبَك لازم أفكَّرَك أن بَدْو سَيْناء لم يُهَجَّرُوا من أراضيهم
حتى أيام الحُروب كلها .. وأهَالِي القنَاة ( السويس والإسماعيلية وبُورسعيد
والقنطرة ) رَجعُوا لِمُدَنِهم وبيُوتِهم فَوْر إنتِهاء الحُروب .. ماعَدا
النُوبيين !! ولأن النُوبيين مِش الحِيطَة الوَاطية بتاعِة الحُكومات
المِصرية.. فلازم يَعْرفُوا أن النُوبيين بتُوع زمَان خَلاص إما توَفاهُم
الله ، أو كَبروا وتقاعَدُوا ، أو سَلمُوا الرَايَة لأبنائِهم وأحفادهم .. والراية
ِ فى إيد مُستَقبَل النُوبة الوَاعِد ..
فى إيد الشبَاب النُوبى المُتَعلِم ، الوَاعِي ، المُثقف ، اللِي كان ضِمن ثُوَار
يَناير، ويونيه وكَتِفهُم بكَتِف أخوانهم المصريين الثُوَار .. والشَباب دَه
اللِي ثار فى ينايرويونيه على الظلم
والقهر .. دلوقت بيثور على الظلم اللي واقِع عليه شخصياً !! وحاأقولك حايعملوا إيه ؟.. أول خطوة أنهم بيطالبوا مجلس
النواب الجديد ، واللى حايبدأ الأسبوع القادم ،وهو أول مجلس نيابى لمصر الثورة ،أن يرفع الظلم عنهم ، ويرجَّع أراضيهم وقُرَاهم
، ويبنيها لهم ، ويُوَطنَهُم فى قُراهم القديمة ، ويُعوضهم تعويض حقيقى عن الــ 60 سنة ظلم ،وقهر ،وتهمِيش
.. ويُقيم مشروعات ضخمة حول أراضيهم لتشغيل شبابهم ، وضمان حياة كريمة لائِقة بهم
وبتضحياتهم ، ويُعيد كتابة التاريخ النوبى لكُتب التاريخ المصرية ، ويُقرّ
بالثقافة ، والمَورُوث النوبي القديم
والحَديث ، ويَعترف باللغة النوبية وهى
أوَل لغة مَقروءة ، ومكتوبة ومسموعة ، فى تاريخ البشرية كلها حَسب كُتب التاريخ
العالمية كلها .. والله لو إستجَاب مجلس النواب لهذه المطالب المشروعة يبقىَ يادَار مَادَخلِك
شَر .. لكِن لو تجاهلوهم ،وطنَّشوهُم وكبَّروا دِمَاغهم كالعادة زَي باقى الحكومات المصرية قبل الثورة ..يبقى فى الحالة دِي حايضطروا
مُرغمين ومدفوعين دفعا لِتغيير سلوكهم من
الأدب إلى قلة الأدب ، ومن الطيبة إلى
البلطجة وتوابعها !! خصوصا وأن أحفاد النوبيين الغلابة بعد ماعرفوا وشافوا الظلم
اللى وقع على أجدادهم ، وآبائهم ، الغُلب بقى فى نظرهم ذل وهوان ، علشان كده مابقوش غلابة ، والطيبة بتاعة القدامى بيقولوا عليها
تنازل ،وخزى ، ومهانة !!
والشباب دماؤهم حَارة .. وثائرين على كل الظلم
اللى عاشه أهلهم ،ولهذا يُهددون بأتخاذ كل الأجراءات القانونية جوه مصر ،وبره مصر
، وأظن بعد ماوصل عدد النوبيين لأكثر من 6 مليون نسمة يبقى من الحق أن يتم تناول قضيتهم بعدل يفرضه
الواقع المُعاش
ولغاية مايقرر اللى بيقرر أن يتم عودة النوبيين
لأراضيهم التى هجروها ، لازم النوبيين يبدأوا فورا فى تكوين اللوبي النوبى .. وبما
أن النوبيين أكثر من 6 مليون نوبي زى ماقلت ..فلابد من تشكيل لوبى نوبى للضغط على مجلس النواب ، والحكومة ،
والهيئات .. وأعتقد أن الرئيس عنده
خطط للنوبة زى ماقال مؤخرا عند إفتتاح المليون فدان فى الفرافرة ، ونتوقع منه خيرا
، بس لو أبتعد عنه زبانية إبليس ، وأصحاب المصالح الشخصية ،اللى بيتطلعوا لبيع
أراضى النوبة الطيبة المثمرة ، لألاضيشهم ، ومعارفهم ، لتكون منتجعات سياحية ــ لاتحتاجها مصر ــ لأن أراضى النوبة القديمة
هى موقعا مميزا جدا .. وعلى فكرة هم
أنفسهم نفس الشياطين اللى كانوا عايزين يبيعوا أرض الضبعة ، وعدم بناء المفاعل النووى عليها ، وبذل كل
السُبل لتعطيل المشروع تمهيدا لإلغائه تماما !! لا لشىء إلا لكسب ملايين الجنيهات
من بيعها ، لكن مصصر وأهلها ومستقبلها
فيروحوا فى ستين داهية .
وألنوبيون لا بيهددوا ، ولا بينافقوا علشان
ياخدوا حقوقهم المشروعة .. وللمَرَّة
المِائة بأقول لمجلس النواب الجديد ، ولأصحاب القرار فى مصر .. (( أتقوا شَر الحَليم إذا غضب )) .. ونهاية لكلامى لازم أختم بكلمات حافظها النوبيون كلهم عن ظهر
قلب وعايشين بها ،وبيتغنوا بها ، وبتلخص معاناتهم ، ووجعهم ، وأملهم ، وأحلامهم
البسيطة المشروعة.
***
ناويين لما نرجع تانــى ..
لبلاد الدهب ربّانـــى ..
جُوَّه البيت نِزرع نخلة ..
تِطرح خِير .. ونِعمل ضِلَّة ..
والعَصافِير تلقط غلَّــــــة ..
فى الحُوش الكبير والرملّة ..
جار الساقية فى العصرّية ..
نحكي حكـــــــــــاوى ..
مُشتاقين ياناس لبلاد الدهب ربانــــــى ..
***
دى النوبة مَولِدى وعنوانى .. يانموت .. يانرجع تانى ..
بقلــــــــم
صـــلاح إدريـــــس
تم نشر المقال بجريدة الوطن عدد الأحد 3 يناير 2016
view-source:http://alwatneg.org/article/4073/%D8%A8%D8%A7%D9%84%D8%A8%D9%84%D8%AF%D9%89_%D8%A7%D9%84%D9%81%D8%B5%D9%8A%D8%AD_:%D9%80%D9%80_%D9%85%D9%86_%D8%A7%D9%84%D9%86%D9%88%D8%A8%D9%8A%D9%8A%D9%86__%D9%84%D9%85%D8%AC%D9%84%D8%B3_%D8%A7%D9%84%D9%86%D9%88%D8%A7%D8%A8_%D8%A7%D9%84%D8%AC%D8%AF%D9%8A%D8%AF_%D8%AF%D9%89_%D8%A7%D9%84%D9%86%D9%88%D8%A8%D8%A9_%D9%85%D9%8E%D9%88%D9%84%D9%90%D8%AF%D9%89_%D9%88%D8%B9%D9%86%D9%88%D8%A7%D9%86%D9%89_%D8%8C_%D9%8A%D8%A7%D9%86%D9%85%D9%88%D8%AA_.._%D9%8A%D8%A7%D9%86%D8%B1%D8%AC%D8%B9_%D8%AA%D8%A7%D9%86%D9%89_!!
ليست هناك تعليقات:
إرسال تعليق